Mizo: Kan INKHELH MUAL

Kan inkhelh mual (Ring/Tatami) kil li neia siam, lian lutuk lem lo, kil khatah chuan ka thu a, ka thianpa chuan ka dâr vêl chu a malis hauh hauh a. Ka bag chu min han pe a, tui bottle ka han phawrh chuan ka rosary ah lai chu a rawn bât chhuak tel palh a, Isua, kross-a an khengbet lai lem ka han hmuh chuan ka thinlungah beiseina thar tam tak a lo lut leh a. Tichuan tui ka in zo chu mit sen râm chungin ka han melh phei a, chhungrilah chuan ka khur deuh zawih zawih, ka chau hle bawk. Ka tumpui pa, feet ruk zet a sâng, chêr ria zaih mai, zuang thauh thauh chu ka va hmu a, inti pachangin ka ding a, amah chu tawk turin ka pan phei ta a, ka ke chuan min zo tawh lo ang tih erawh zawng ka hlau khawp mai a….


Semi-final a ni a, a hmain mi pali ka lo hneh tawh a. Hei hi ka tawn tlang leh chuan final ka lût dawn ta. Rilru tawngtaina nen, ‘Pathian hmingin’ tiin ka lut leh ta a…. Ka hneh leh ta hram a, mahse ka hahin ka chau khawp mai. Chumi hnu maiah final fight an rawn puang leh nghal mai si… ka zuang lut leh… ka ke chu ka khai thei tawh mang lova, kut chauhin ka bei a ni ta, point an chhiar zo chu 3-1 in ka hneh ta lo… Mahse a ropui e, Karate ka vawikhat khelhna a ni a, a har khawp mai, inpuahchah lawkna pawh a awm si lo, he tournament hmâ ni hniha hre ve chauh kha ka ni a, experience atan tiin ka tel ve a ni.

Taekwondo leh Tangsoodo-ah te chuan National level hial Pathian zarah lo khel tawh mah ila martial arts chi hrang hrang te hian mahni dan leh dun hrang theuh an nei ve vek sia. Tun tum chu National level êm a ni lo na a, South Indian Open (2003) a ni a, state pali an rawn tel a - kei private in ka khel ve a. Ka thiante pali, Chandrashekhar-a leh midang, min tawiawmtute nen chuan college lam panin kan haw a, lawmna tur pawisa pawh ka nei si lo, ka thiante hnena lawmthu ka sawi mawlh mawlh hnu chuan ka tih theih tâwk leh hlu ber, Pathian hnena lawmthu sawi chu ka bawhzui ta mai a. Room-ah chuan ka Silver medal chu ka hum a, ka inngaihtuah a, mihring takin duhthlanna pahnih chu ka nei ve hian ka inhria - final a ka chak ta lo chu pawi ti a rilru tih hah nge ka thlan dawn inring miahlo chunga medal ka la hlauh mai chu lawmpui, tih chu.

A pahnihna zawk chu ka thlang ta a ni. Pathian pakhat dik tak kan rin hi a nung tak zet ani tih ka hre chhuak thar leh a. Mihringte hi Pathianin duhthlang thei turin zalenna min pe bawk a, kan duhthlanna leh ngaihtuahnate hian kan nun a kaihruai thei teh khawp mai. Kan duhthlanna te hi kaltlangpui tur chuan Pathian râwn fo tur a ni. Mahni finna a innghah ching mi chu thil ti sual der a ni teh meuh mai. Chutiang bawkin kan nun hi inkhelh leh infiamna mual a ni a, nitin mai hian beihtur hi kan nei reng a ni. Kan hmaah hian harsatna te hi lian leh chak hmel deuh hian a rawn ding fo thin a.

Kan zirlaiah rokhawlhna hrang hrang kan tawk thin. A kuma kum hlauh hial te pawh kan awm fo. Mahse beidawng lo ila, Pathian kan hnenah a awm tlat ani tih hi hria ila, kan hmaa beih tur kan neih, hlauhawm hmel zet chu hneh tawh angin thlîr ila, Pathian zarah kan hneh ngei bawk ang…. chu harsatna leh manganna aia chak Pathian kan nei si a. Tin, hlawhchhamna kan tawh chang te pawh hianin Pathianin kan tan kawng tha zawk a ngaihtuah ang tih hi ring tlat ila. Lalpa’n thil engkim hi chhan nei theuhin a siam si a (Thuf 16:4).Khawvel thila hlawhchhamna te hi thlarau tân hlâwkna a ni fo thin tih hi i hre nawn leh bawk ang u…


[He Article hi Bangalore Mizo newspaper, BMA AW(Weekly), Vol. XII issue No.2, January 2007- a tihchhuahaha ka ziah a ni. Huai takin i hmelma te chu han bei ve teh le ka unau - Samuel Lalrozâma Hmar]