.jpg)
Zephyr Drama-a an sawi ang deuh khân, calculator age-ah kan thang chho ve a, han ti ve khang lâng ila, tunah computer age-in a rawn zui a; kan têt laia phone neih thar ve te kha chuan a rawn ri kha lâk kan inchuh luih luih thin a, khâwlthluâknei te phei chu hmuh tûr pawh a awm mang lo, ram hla taka mi te chanpuâlah kan dah deuh tawp mai anih kha mawle. Tunah chuan mobile phone leh internet-in min rawn rûn ta a; herhsâwp chunga thu chungin khawvêl kan fang chhuak thei ta a lo nih hi.
Chutiang chuan keini hmuh phâk maiah pawh khawvêl hi a thang nasa a, Delhi khawpuiah pawh mizo te chu kan thang ve zêlin kan changkâng {kan ti dâwn nge kan CK (CK lampum chiah hi ka hre chiah lo a)} ve zêl a, hnathawk pawh a kum têlin kan tam belh tih kan directory atang ringawt pawhin a hriat theih awm e. Tunah halai tam tak chu zâwlkhawpui atangin, zirna leh hna tha zâwk beiseiin, an rawn pêm thla ruih ruih mêk a nih hi. Pâwl 12 kan zawh hi chuan a hniak tam lam lam tiin Mizoram quota beisei leh hmelhriatte tih ang zuiin kan kal leh dûl dûl mai thin bawk a nia. Zofâte hi thil thiam thei deuh mai kan ni a, chuvangchuân thalai te hian tûn âi hian hmathlîr han ti zâu leh deuh ila a duhawm khawp mai. Chu tur chuan kan hmanraw neih that ber - internet hi hmang tangkai ila lehkhabu leh chanchinbu/phêk te chhiar i uar ang u.
Keipawh Aircraft maintenance engineering, Zofate la tih ngai êm êm loh, future a bright dawn nge dâwn lo tih pawh hriat loh zirzoin, aviation industry chu ka âr khawthim dâi ve mek a nih hi. He khawvelah hian zofate hi kan la tlem hle a, airport-a “Enga?” han tihpui tur hi an awm mang lo. Kut leh ke zungtanga chhiar zawh thei vek kan la ni, chutih laiin kan hmârchhak unau te chu hmuh tur an awm thahnem fû lawi si. Kawng thar, mahni tuina lam te hi dap ngam ve zel ila a tha khawp mai.
Mizote hi hnam huaisen tia inchhâl kan ni a, combat sports-ah pawh hian kan tha khawp mai. Mahse street fighter tha tak tak te hi huaina tûr hun takah hian kan huai leh thin si lo; kan thil chîn tha lo vangtein kan inelpui te chu nghakhing nau awm ang maiin chhaih leh dûrh dûrh a tul ta si thin a nih hi. Tin, ‘ruih lai huaina’ te hian ‘harh fim huaina’ a tluk lo a, inchhuanga Âka hmui pû ni awm tak te hi hnam dang zîngah kan zakzum leh fu si. Ngei zawng te hmaa ngawi hêm tawng lâwng lâwng ngama zu leh zuk leh hmuam nghei ngam leh si lo i ni ve em? Enge kan hneh loh tâk chu?? Mahni kan inhneh ta lo a ni, midang chu ka hâ se.
Pathian zâra India ram aiawha inkhel tura kan zin chhuah chang te hian Zofate hi ram dang mi te beih ang hian han ti ve ta ngat ila chuan ram ti hmingtha tûr hi kan tam tih ka hrechhuak thar fo thin. Hlawhtlinna kan chawimawi dân te pawh hi thlâk a ngai, thiamtheihna ai chuan taimakna hi i sawi uar ang u; mi hlawhtling te kan kawmin an hlawhtlinna thurûk zawh nachâng hria ila. Tin, kan hun kalta te thlîr lêt chânga taima taka hah thi kûla kan lo thawh theih chhan kha Isua Krista vâng zâwk a lo ni tih hi hriat nawn fo a va tha bawk em.
“Khua pawh a dur chuan ruah a sur nge nge”, tih a nih kha. Taima leh dawhthei taka rilru thianghlim nena beih hnua kan la hlawhtling lo a nih chuan Krista kan la nei tak tak lo a ni mai thei e. Vanduai ve hrim hrim tea kan inhria anih chuan i inenfiah ang u. Pathianin thil re re chhan nei theuhin a siam thin, tih a nih kha. Hun lo la thleng tur chu kan kutah a awm tih hre rengin kan chhungkua leh thenrual thate nen i infuih tawn mawlh mawlh ang u nîtinin. Hlawhtlinna tel lo chuan ram leh hnam a chawisan theih si loh. I ram leh hnam leh Pathian tan enge tih i inhuam ve le?!
[He Article hi Banfalore Mizo Newspaper-BMA AW (Vol. XV Issue No. 16, July 19, 2009 )-a Editor ka nih laia ka ziah a ni a; Delhi Mizo newspaper- DUHAISAM(Phur Châng Châng-ly, Vol. I issue No.5, Tahrik ni 2, Tomir Thla, kum Sanghnih leh sâwm)-a tihchhuahah chhuah nawn leh a ni. Hei hi Delhi version zak a ni. Kan ram leh hnam hmasâwnna'n enge i tih ve theih le ka unau - Samuel Lalrozâma Hmar]
No comments:
Post a Comment