Mizo: ‘ZORAM NI (5th March)’ LEH MIZORAM JET FIGHTER-A BOMB KHA

Kum 1966 bâwr chho vela Mizoram buai lai khan Indian Air force-ah mizo Commissioned officer pahnih Wg.Cdr. (Rtd) Lalnghinglova leh Wg.Cdr. (Rtd) Lalzawma te an tel ve a. Jet fighter hmanga Mizoram beihna (air operation) kha Pu Zawma te awmna 11 wing aṭanga hmalak a ni. Pu Zawma pawh hi Mizo ve tak mai a ni a, Mizoram operation chungchang han sawi chang vela a thin pawh a rim theihzia te a sawi fo ṭhin. Ṭum khat phei chu tum lawk pawh awm hauh lo-in Flying officer Bamzai pawh a hnek hrep phah nghe nghe a, volleyball an khelhna-ah Flt. L.t Deshpande pawh a ṭhuai hrep mai a ni awm e.

Khatih laia jet fighter leh bomber ten bomb an hman ṭhin kha 250 pounder, 500 pounder, 1000 pounder ldt. a ni a, chuti ang chu Mizoram beihna’n hman a ni lo a, Jet fighter te ralthuam hman kha 60 MMRP (Rocket Propelled) a ni a; tin, FG (Front Gun) Machine Gun kan tih ang hi a hmang bawk. Jet Fighters chi hnih- Hunters (British siam) leh Toofani (French siam) te hman a ni a, sub-sonic [ri (340.29 m / s) aia chak lo ve ve an ni]. Hunter hian 60 MMRP leh Machine gun 20 MM Caliber FG a hmang a, Toofanis hian 60 MMRP leh 16 MM caliber FG a hmang ve thung. 60 MMRP leh 20 & 16 MM Caliber FG te hi HE (High Explosives) vek a ni a; an target a va fuh hian nasa takin a explode (puakdarh) leh a, chuvang chuan a thawk na em em a ni.

11 Wing aṭangin 29 Toofanis squadron fighter 6 vel detach a ni a, Jorhat aṭangin 17 hunters squadron hmangin direct operation ti tura tih an ni. Jet fighter hmanga Aizawl beih a ṭul nachhan chu khatih laia Assam Rifles ho kha tuna Commandant office ldt. awmna tlâng (Vanapa Hall chhak)-ah chhuak thei lo-a dan beh an nih vang a ni. Assam rifles WT (wireless) tihchhiat a ni lo a, chutah chuan Zoram pawn lamah “Distress message (SOS)” an thawn chhuak thei reng a; tin, Silchar- Aizawl kawngpui dan chah a ni bawk si a, rang takin Army operation thlak theih a ni bawk lo a, Jet fighter hman a ṭul ta a ni, an ti. Tichuan March ni 5 1966 khan India sorkar chuan a ram chhung ngeia awm Mizoram khawpui Aizawl chu jet fighter hmangin a bomb ta a ni.

Hetih hunlai hian IAF hian Jet Bombers a hman chu Canberra Bomber a ni a, squadron thum a nei a, pakhat Poona-ah, Agra-ah leh Kalaikunda (West Bengal)-ah te based a ni. He’ng bomber te hi Mizoram beihna’n hman a ni lo a, kan sawi tawh ang jet fighter pangngai zawk hi hman a ni. Chuvang chuan mi tam takin Mizoram kha bomb a ni lo a, jet fighter-a beih ringawt a ni an lo tih phah ta a ni. Khatih hun lai-a Prime minister, Indira Gandhi pawhin khawvel hma-a hmai phihfai a duh vangin, “Aizawl kan bomb lo, Ration kan thlak mai a ni,” te a lo ti a, Mizo rilru pu tan chuan pai daih har tak a ni. Amaherawhchu, Oxford dictionary chuan bomb a hrilhfiah dan chu – container filled with explosives, incendiary aterial etc…. designed to explode or cause damage, tih te a ni a, tin, shell, missile, torpeds ldt. hi bomb tih vek tho a ni. Chuvangin, khi’ng min beihna hmanruate khi a target a fuha explode (puak darh) leh avangin bomb a tih theih ngei a ni. Bomber pangngai hman ṭhin 25o, 500 dtc. Pounder hmanna tlak khatih hunlai khan kan ni lo hrim hrim a, Aizawl khua a darh chhe vek mai dawn a; min beihna awm tawk explosive/bomb hmangin min bei mai a ni.

A eng apawh chu lo ni se, Mizote kha tharum nasa tak thawha beih tlakah sawrkar laipui meih pawhin min lo ngai a, min hlau ru ve hle chu a ni ngei ang a tih theih awm e. Chuvang chuan keini Mizote hi eng kawngah mah kan duai lo a, kan thiltih apiangah theihtawp kan chhuah chuan hlauh tham leh el tham kan tling zel thei a ni tih hi kan rin Pathian hian min nemngheh sak awm e. Vawiin hi Zoram ni a nih angin kan thinlungah Mizona ti thar leh ila, Zoram hi kan ram a ni a, Mizo bak hnam kan nei lo, chhungkua kan nei lo, chuvang chuan theihtawp chhuahin hmalam pan ila, inlungruala inpumkhat zelin Zofate hian khawvel hneh ngei i tum zel ang u….


(source: The zozam times feb 19, 2010 the zozam times march 3, 2010, Zoram sulhnu-Lalchhuanmawia hnamte.)
(pic: toofanis fighter)

Mizo: KHA NAGA TLANGVAL KHA

Nagaland chuan India sorkar aṭangin zalenna an sual a, kum 1964 kha East Pakistan rama training-in vawi thum an kalna a ni a, chumi ṭum chuan India ramri-ah vai sipai an lo awm vangin Myanmar ram lama Chin hills-ah an tlanchhia a, chuta ṭang chuan an hmanrua neih thar leh thiamthil tharte nen an ram hmangaih em em panin an kal a...

Chutia haw mekte zingah chuan Lieutenant Meheiping-a section-ah chua Zeliangrong chi (clan) pakhat ami tlangval, kum 18 tling ve chiah, Didin an tih chu a tel ve. Midang ang bawka tha za rual, nula chhai a hringnun chen rual a ni a, amaherawhchu a fate leh tu leh zel turete a ngaihtuahin ram nuam leh zalen zawk hrin chhuah a duh vangin rammut chu a thlang ta zawk a. Ei leh in tur a vang thei hle a, a sur a sa hnuai-a vak an nih vang pawh chuan an ke te a durh a, a vûng lêk luk hlawm a, Didin-a pawh chu a ke a vûng nasa hle a, kawṭhalo-in nasa takin a zût bawk a. Amaherawhchu tlangval tlawmngai thei tak a ni a, ei leh in an hmuh chhun te chuan a ṭhiante a kian hmasa a, ei hmasa duhlo-in a ṭanin a ṭang ṭhin a, tichuan midangin an duhtawk an ei hnu-ah a bângnawi vel a ei ve ṭhin. Chu vang erawh chuan hotute mit a tlung phah viau thung.

Chumi ṭuma an ram pana an haw pawh chuan a chauh em vangin an hotupa chuan a thil phurh leh silaite ken te chu midangin kensak turin a ti a; mahse, midang tana phurrit nih duh lo-in 'Ka ram, ka hmangaih tan chuan ka neih ang ang hi ka phur thleng ve ngei ang,' tiin a hnung berah a zui ve hnak hnak a.

Ni khat an kal hnu chuan Chohuangkhunao khua chu tlai lamah an thleng a, khaw mite chuan ei tur an lo hlui a. An han inchhiar chuan Didin-a chu a lo tel ve ta tlat lo mai a, a khawmuang deuh a ni ang tiin zawng turin an chhuak nghal a. km 2/3 vel an va zawn chuan an hmu mai si lo a, mut mu tuah zai an rêl ta a. A tukah chuan tha tharin an va zawng leh a, lungphek pakhat chungah chuan hahdam taka a lo tluzal chu an va hmu a, a lo thi reng mai a. Amaherawhchu, thih thlamuanna a nei ngei a ni tih hriatin a taksa chu na hle mah se rilru lama hahdamna nen a thi ni hian a hmuh theih a, zawngtute mitah chuan mittui a luang hlawm a. A ruang chu an hlawm a, zahawm takin an phum zui a.

Chu tlangval, khawvel nawmna pawh la temchho ve mek tur, puitling rawn ni ṭan ve chauh chuan a theihna leh chakna zawng zawng a hmangaih ber- 'Nagaland' leh a zalenna atan a hlan a. Hmelma silai lakah a thi lo a, a phurrit phur lah an ram a thlenpui hek lo. Mahse, a thawk tawp thlengin a theih tawk ni-a a hriat ve chu a ti a, a thihpui ta a ni. Pasalṭha anga hmuah a ni ve dawn lo a, a âwmah chawimawina tangka belsak a ni dawn hek lo... Nagaland ram mipui tamzawk chuan tu nge a nih pawh an hre lo ang. Amaherawhchu, a thihna chuan mitlemte nunah tumruhna thar a pe a, mei chhit alh chu a lo kangkai zel ang hian amaha thilṭha lo chhuak chu tihpunin a awm a ni.

Nation khat hian hei baka inpekzawhna hi eng nge beisei theih a neih chuang ang le... Keini ngei pawh vawiinah chuan chengrang chawiin ram kan vak lo a, zalenna sualin ram kan mu ve ta hek lo. Amaherawhchu Didin-a ang hian phurrit phurh lai kan nei ṭheuh a, he kan thil phur hi a tawp kan thlenpui ngei dawn lo'm ni? Kan kal theih chen chen tal chu? Ti chuan chu kan thil phurh chuan kan ram hi kan tu leh fate tan corruption leh hlemhletna lakah zalenna a thlen thei ang em tih ngaihtuahin kan theihna leh chakna zawng zawng kan hlan thar ve dawn lo'm ni? Engmah hi te lua a awm lo a nia, kan hnathawh/zirlai ṭheuh hi a ṭha thei ang bera kan tih hi thil ṭangkai ber, midang chophur thei leh ram leh hnam tana, he kan dam chung reilote-a, thawhna a lo ni asin!!