Mizo: Tlangval VANDUAI-Vanneia

“Keichu!! Chhas nei thei dinhmunah pawh ka la ding lo, neih pawh duh viâu mah ila, kan dinhmunin a la phâk ve lo. Thawhchhuah pawh ka la nei si loa, ka chhungte thawhchhuah hian ka pocket-money tûr pawh a daih meuh lo a niâ, pawisa dîl hlek chuan inhauh tan a ni zêl a, chuta kâra chhass lo neih ve khanglân chuan inhauhna tûr a tam lutuk dawn asin.

"Tûnah hi chuân ka chhiatloh ang ang hian ka awm mâwl tawp mai (haha), star neih teuh hi ka chan tâwk a ni hrih a. Star te han phone a, chhuâk tûra sâwm te pawh a châkawm ve thei khawp mai. Han phone ve thin mah ila sawi tûr a vâng thin khawp mai; sum chu han awm se chuan ‘naktûkah i hman chuan chhuak dûn ila,’ ti mai tûr kha ka nia, hmêl leh pian a en chuân zei nih te pawh kan hlawh ve mahna! J Mahse sum a awm si loâ, engmah sawi tur hre lem loa in mangtha leh tawp hi ngai thin a, a zia lo thei khawp mai” a ti a.

Mahse chu tlangvâl vek chuan “Kan zirlai leh kan thiltih apiangah rinawm leh rim taka Pathian bêl chunga kan thawh chuan, tuna kan star te hi changin chang lo mah ila, an aia hmeltha leh no tak tak lo chawr chhuak mêk te zinga mi pakhat hi chu kan tâ tur a ni si a” a ti leh a.

[He tlangval hi ka hmelhriat tha tak a ni a, a hming chu tarlang kher lo ila, in lo hre ve nuâl maithei si a (a bîk takin nula hoin); a thusawi ho tê hi in lo hriat ve atân ka han târ lang duh ani. Hlimna hi za-a-sâwm chu kan chunga thil thleng vâng ani a, za-a-sawmkua erawh, chû thilthleng chu kan dawnsawn dân azir a ni.

Kan nun hi duhthlannain a khat a, thlahtu bul Evi leh Adama atang tawh khân duhthlanna hian he khawvel hi a ti danglamin a her kawi ani. Rilru hah laia thil ho tê tê, mahni inngaihsânna ang chi te, ngaihtuah te hi hlimna ho tê min pe theitu a ­­­ni fo thin, mahse chu chuan kan ngaihtuahna awh khat reng lo se.

Suângtuahna khawvêla chên châng nî te awm ve zeuh zeuh a tha e, suangtuahna tel lo chuan ram ropui pawh a thlen theih loh ani, te pawh an ti hial thin; mahse chû khawvêlah chuan mi tam tak an boral thin si a...

Chuvângchuan he tlangvâl vânduai (emaw in ti) - (inla) vânneia ang hian nang pawh, i dinhmun in en chiang la, hring channa khawvêla hniak-hnung tha tak neia Pialrâl thleng ngei thei turin insiam la, duhthlanna tha chu han siam ve vat teh le ka unau. - Samuel Lalrozama Hmar (Editor BMA AW, the Bangalore Mizo Official newspaper, Vol.XV Issue no.19, Dated Aug 9th 2009]

Mizo: MIPA leh in la PA te aiawhin

He khawvêlah hian thil rê rê hi opposite (kawppui/khing lehlam) nei teuh , khawvel siam tirh atang tawh khan kan lo ni alâwm mawle. A tirin Pathianin lei leh vân a siam a, chhûn leh zân a lo awm, a nu leh pa tuâk zêlin ransa te a han duâng bawk a. A tâwp berah mihring (mipa) kawppui atân, hmeichhia a tul tlat tih hre rengin, nalh thei ang berin A han design ta a nih kha...

Hmeichhe tel lo hi chuân khawêl hi thir tlang leh lungpui sak tak mai, a chung pawha in sak theih loh, ang hi zu ni mai dâwn a! Rose pâr mawi tak ang maiin hmeichhia te hian nunze mawi leh nalh tak mai an nei tlat mai â!! "Zîng tukthuân chaw ei siam peih loh chânga min siâmsaktu chu kan nu hi a ni tlat mai", an ti thin, kawppui neite'n.

Ngai teh, mipa te mak tih phâk bâk chakna kawltu an ni!! Fa harsa leh hrehawm taka paiin an hring a, mahse hmangaihna, hlimna leh lâwmna te an vawng thiang tlat si. Â khai â!! Tanhmun sawhnghet tlat mi an ni a; dik ni a an hriatah chawl lo in an bei a, an hnial tâng tâng a, diklo nia an hriat lah an dâl kalh tlat thin; mipa te'n kan hnial hneh re re hlei nêm.

"Aih" tih hi chhannaah an hmang ve ngai lo, thil tha zawk awma an hriat chuan. Kawrtha tak hâk tûr nei lo in awm pawi an ti lo, an fa te'n a thar neih phah nân an hman dâwn phawt chuân. Thiante kaisânna leh fate hlawhtlinna vângin an biangah mittui luan châng a tam, hmelhriatte fam chan chânga thinlung puak keh hmasa ber niin zêm khat zenpui te boral chânga lungngai tawp thei lo an ni bawk; mahse tha nei tawh lo a i hriat tawh hnuah pawh chakna an la nei fan a; thlamuanna âw te, hmangaihnaa inkuah te leh thinlung chhungril tak tak a chhuâk ngainatna vânga in fawh te hian thinlung nâ a tidam thei a ni tih an hai lo.

Ngawi teh, hmeichhia te hi awm lo ta se a pa hlang mai hian engtin nge maw nî tin alu leh dal leh buhfai chhumpawlhin chaw kan ei peih ang le!! SMS ho deuh deuh tunge min rawn thawn anga, e-mail thui deuh deuh, awmzei nei lêm lo, min ti hlimtu ni ve sî, tunge rawn type peih ta ang?!! Tunge fiamthu ho deuh deuh kan thawh changtea nui uâr uâr a let tawp tawp peih ang le!! An mamawh zâwng, tha sêng lêm lo a, han tihhlawhtlinsak chânga min fak luâm peih tu tak awm ang maw!!

ÂW!! fa hrin mai bak hi nunna thar min lo va han hrin chhuah teh lul em.Vawiin hi Women's day a nihna angin kan hmeichhe hriat zawng zawng te hnenah, an hlutzia hrechhuak tharin, lâwmthu hrilhdan kawng i zawng theuh teh ang u.

Vawiinah ngei hian i unaunu leh thenrualnu te hnenah "Ka û, ka lawm e" han ti ve teh.

[Hmeichhia te ni (International Women's Day (IWD) )-a hemi ni denchhena newspaper pakhata, March ni 8, 2009-a ka ziah a ni a. He ni mai ni lo in, nitin mai hi womens's day a lo ni a ni tih hi hrechhuak thar lehin kan taksa khing lehlam te hi chhawmdawlin hlut nachang hre thar leh teh an un- Samuel Lalrozama Hmar]