.jpg)
‘Thalaite khawvel’ tia hahipa kan lo sawi fo tawh thin angin, thangtharte zingah thiamna leh finna nasa takin a pung a. Tunhmaa General line – B.A., B.Sc., B.Com. tih ringawta duhtawk thin khan, a aia thuk leh ril zawk – Professional Courses leh Technical Courses lampangah ngaihtuahna an seng tan ta a, hmasawnna lawmawm tak a ni tih loh rual a ni lo.
Amaherawhchu, ‘Modern World is the Age of Science & Technology’ an lo tih thin kha dik famkim ta hleah kan ngai ta emaw ni? Tlema zirlai bengvar deuh chin chuan Science subject laka Engineer leh Doctor nih an tum ta deuh thup a, a chang phei chuan Arts line atang hian kawng ping ta vek leh kawng awm lo ang hialah ngaih pawh a awl ta rum rum mai! Tuna rinawm leh huaisen taka Arts la hram hram tute kha lo zam reng reng lo ula, keimah anga admission buaipuia in buai ve lohna turin in tana Career tha em em pakhat, Law Career ka rawn hlui dawn che u a ni. (Class 12 ka pass hlim khan rawn tur tha ka hriat mai loh avangin CLAT exam turin ka tlai phah a, Entrance ngai lova Merit basis ah tlin theihnaah ka lut ta mai a ni.) Amaherawhchu, tun tumah chuan Admission tih hun a la nih loh avangin college tha inkawhhmuh vak aiin chumi college thaa lut thei tur leh Law Entrance tha taka paltlang thei tura tuna kan lo inbuatsaih lawkna tur lampang kan luhchilh phawt ang a. Admission notice zawng chuan admission tih dawn hnaih lampangah kan la intanpui tlang zawk dawn nia.
India ram hi khawvela Democracy lian ber tia sawi thin a ni a. Democracy rorelna reng rengah chuan mimalin lal a hrawt thei tawh lova, hna hniam ber thawktute atanga hna sang ber thawktute chunga thuneihna vawrtawp neitu chu dan (law) hi niin, tumah reng hi dan chunga leng kan awm lo. Chuvangin dan thiamte hi ngaihsan an hlawh lo thei lova, an hlu zual deuh deuh dawn a ang. Tun hma deuh kha chuan dan thiam, Law Graduate ni tur hian B.A. pass kher tul ni turah kan ngai thin a. Tun thlengin kan officer liante zingah pawh ni tura la ngai nghet tlat tam tak an la awm a ni. Kum 1982 atang khan Bar Council of India chuan Pawl 12 pass hnu a zir theih turin 5 yrs law course a rawn duangchhuak a. He system thar hian ngaihhlut a hlawh chhovin, a bul (basic) tak tak atanga hrut chho an nih avang hian a zir chhuak thei ngatte chu mite ngaihhlut leh ngaihsan an hlawhin an thiam pawh a chiang duh nge nge an ti chawk.
Kan lo hriat lawk ve mai mai atan India rama Law College tha zuala ngaihte rawn tarlang ve hrim hrim ila:-
National Law School of India (NLSIU):
Address Nagarbhavi Bangalore-560072
Phone:+91 80 2321 3161, 2316 0532/533/535
Web: www.nls.ac.in
Nalsar University of Law (NALSAR):
Address : City Office : 3-4-761, Barkatpura, Hyderabad 500 027
Phone : 040 – 27567955 / 27567960
Campus : Justice city, Shameerpet
Phone : 08418 – 245417 / 244461 / 245160
Web: www.nalsarlawuniv.ac.in
West Bengal National University of Juridical Sciences (NUJS):
NUJS Bhavan 12, LB-Block, Sector-III, Salt Lake City, Kolkata-700 098
Phone: 033-23357379/0765/0500/0534
Web: www.nujs.edu
Symbiosis Law College, Pune :
Address : Senapati Bapat Road ,
Pune Maharashtra – 411004
Phone: 91 – 20 – 565 5114, 565 1495
Fax: 91 – 20 – 565 17 11
Web : www.Symlaw.ac.in
Amity Law School, Delhi :
Address : M-44, Amity Campus, Saket, New Delhi-110017
Phone : 6569204,6529207
Web : www.amity.edu/als/
ILS Law College, Pune :
Address : Law College Road, Pune – 411004.
Phone: 91-20-25678678, 25656775
Web : www.islaw.edu
K.L.E. Law College, Bangalore:
Adress : Rajajinagar II Block Main Road, Bangalore
Phone : 080-23324529
Web : www.klelawcollege.org
A tlangpuiin 5 yrs Law Courses zir tur hian Second Division ah tal pass a ngai a, English Subject ah phei hi chuan 55 marks tal hmuh a tha. IIT a lut tura J.E.E. exam, N.I.T a lut tura A.I.E.E.E. exam a ngai thin ang deuh bawk hian, law college thaa lut tur chuan Common Law Admission Test (C.L.A.T) paltlang a ngai a. Chumi lo pawh ALL India Entrance Test te a awm a. Tin, tlema College tha filawr lem lovah chuan anmahni institution theuhah Entrance test an buatsaih thin. Amaherawhchu, Private or Society ina college an din, India sawrkar atanga hlawh la lo leh an tanpuinaa innghat lo, India sawrkar ina a pawmpui si – U.G.C. recognized College, Entrance ngai lova Merit list a tlin theihna college tam tak a awm teuh tho a ni tih hi hre reng ila. Entrance a ngaih loh avang ringawt hian a college quality a hniam bik e tihna ni lovin, sawrkar atanga pawisa dawng an nih ve loh zawk avangin sikul naupang duhthawh avanga awlsam taka admission tih theihna tam tak a awm zawk a ni. Heng zingah hian India ram pum huap college tha leh thalo tehtu NAAC pawhina grade sang tak tak a pek an awm nawk mai. Amaherawhchu, sum leh pai leh senso a hautak deuh hlek a. Nimahsela, lungphang lutuk tur a ni love, kan sawrkar laipui hi mi rethei zawkten lehkha kan zir zel theihna tur hian a inphalzau khawp asin!
Law Entrance hi thil hautak tak niin, inbuatsaih nasat pawh a ngai hle. Rilru lo ruahman lawkna fel tak nei a, lawyer nih tum sa ran kan nih phei chuan high school kan kallai atanga lo inbuatsaih lawk theih hi duhthusam a ni. Pawl 12 kan nih atang phei chuan ngaihvena uluk taka kan inbuatsaih tan ngei ngei a ngai tawh. Chutilo chu tlai a hlauhawm mai bakah inbuatsaihna tha tawk a awm loh vaih chuan inthai tlin pawh a harsa hle ang; mi nuai chuang tehmeuhin tlin tumin an bei thin si a. Mi chinchang hre deuhte phei chuan zirlai thluaktha ber berte pawn IIT ringawt tum tawh lovin Law Career lam an hawi tawh zawk an ti tawh hial mai. Law Entrance exam bei tur hian a hma fe tanga lo inkau lawk a ngai a, March thla velah hian notification an pechhuak thin tlangpuia, anmahni website theuhah emaw, a huhova Entrance an pekna, an Website intawmah Application form download theihin an siam thin a ni (an website chu www.clat.ac.in a ni e. Fela). A inbuatsaih dan pawh hi kan thiam a ngai viau. Nikum hmasa (ka inbuatsaih ve lai. fela) C.L.A.T. in question pattern an siam dan chu : General Knowledge (50 marks), Legal Aptitude (45 marks), Logical Reasoning (45 marks), English with Comprehension (40 marks) leh Mathematics (20 marks) te an ni a, a la danglam hman lutuk ka ring lo.
A inbuatsaih dan kan thiam theih nan han sawifiah law law ila:
General Knowledge: General knowledge hi IQ test na chikhat a ni a, eng ang taka bengvar nge an nih chiah tih enchhinna a ni deuh ber. Mark hmu tha tur chuan current events kan hriat mai bakah, heng subject chi hrang hrang History, Political Science, Economics, Geography, Science etc. te hi a lo berah a basic tal hriat a tha. Khawtlang leh ram puma issue lian tham thleng thar reng reng chu titipui thei tur tawka beng kan chhit ve reng a ngai tihna a nih ber chu.
Legal Aptitude : Eng angin nge kan ram dan leh court kalphung kan lo hmelhriat lawk tih enna a ni ber a. Legal Aptitude bikah hi chuan Political Science kan thiam hle a ngaiin kan phak tawk chin chinah Court kalphungte kan zirchiana kan hriat ve zulte pawh hi a tha. Tin, Crime & Detective magazine, Sherlock Holmes etc. te hian min pui thei hle bawk.
Mathematics & Numerical Aptitude: Mathematics hi chu High School Standard a ni a, huphurhawm lutuk a ni hran lem lo. Amaherawhchu, hun chep tak kara chawh chhuah zung zung a ngaih dawn avangin chawh tam tluk erawh a awm lo.
English with Composition: English ah ve thung hi chuan a bulthuma Grammer leh Composition hriat a pawimawh hle a. Tin, synonyms, antonyms tih velte leh spelling dik tak hriat a pawimawh khawp mai. Awl tea lang ni si hi pont tam tak hlauh theihna a ni ve tlat.
Logical Reasoning: Examiner tena an ngaih pawimawh ber a ni a. Chuti lutuka han inbuatsaih ngaihna vak pawh a awm hran lova, mahni pianpui finnaah a inghat thui hle. Amaherawhchu, kan reasoning a chak loh vaih chuan Lawyer tha leh rintlak nih a har khawp ang. Entrance atan mai nilo kan practice lehzelna turah pawh kan la mamawh ber tur a ni. Chuvangin, General Knowledge Refresher emaw, Competive Success Review emawa a bu tawp lama an tarlan thin solved paper te hi ngun taka lo zirchiang ve a, a reasoning part phei hi chu kan chhiara kan ngaituah reng fo a tha. Tin, Chess khelh tam hi thluak sawizawinan a tha hle bawk.
Law zir tura an duh ber chu Leadership quality nei tha, khawtlang leh School Activities a inhmang mi, thluak fing leh tha, thil ding taka ngaihtuah thei mi, thil harsa leh ulh deuh pawh awlsam leh zangkhai taka ngaihtuah thiam mi a ni a. Tin, lawyers` profession hi hna zawhawm leh ngaihsanawm berte zinga ngaih niin Prof MP. Jain phei chuan, “I always respected lawyers` profession because it is the highest profession that ever existed in the world” a lo ti hial a. Chuvangin, he profession luhchilh tur chuan nun uluk a ngai nasa bikin midang anga pawlawh tak leh zelthei mai mai chunga hlawhtlin theih a ni ve hauh lo. Tin, Lawyer hlawhtling tak ni tur chuan ‘Thu diklo pawh dik ni awm taka awihawm taka mi bum thiam; a lo diklohzia mi`n an hriatchhuah pawha awihawm taka pha mar leh thiam’ nih a ngai a. Hei hian dawt an sawi tur a ni tihna lampang ni lovin midangte hneh thei turin tawngkam thiam tak leh thluak vaivir thei tak mi an ni tur a ni tihna a ni zawk e.
Khawvel hmasawnna lo thang chho zelah hian dan hre mite hian ngaihhlut an hlawh zual deuh deuh dawn a, thawhsen loh hna a la inrawnchhawp kur nguai dawn a ni. A duh tan sawrkar hnaa lut lovin ukil hna thawt theih a ni a, Sawrkar hnaa lut duh tan pawn Law Department-ah Judicial Officer emaw, Magistrate hna emaw thawh tur tam tak a awm tho bawk a. Chu lo lehah pawh Indian Judicial Service Competitive Examination emaw Civil Service Examination a beih leh theih bawk. Tin, ram leh hnam veia politics a inthawh duh mi tan paw`n dan hremi tan chuan kawng a eng em em a, kan hruaitu hmasa Mahatma Gandhi te, Lala Rajpat Rai te, Dr. B.R.Ambedkar te leh mi dang tam takte kha Law Graduate deuh vek an ni. Mario Puzo chuan, “A lawyer with his brief case can steal more than a hundred men with guns” a lo ti hial a. Chuvangin, hun lo kal zel turah Law Career ah hian namen lovin kawng a inhawng zau zelin ngaihhlut a la hlawh chho tial tial dawn niin a lang.
Nimahsela, kan hriat theuh tur chu Arts line atang chauh hian law a zir theih e tihna lampang ni lovin khawi line atang pawha zir theih vek a ni a. A kawng a awlsam bikin a inhmeh deuh e tihna mai zawk a ni. Kan thenawm state ten Supreme Court Judge hialte an lo neih tawh laia Zofaten sawi ve tur kan la haihchham reng hi chu a tlawm thlak lua deuh e, zirlaite i tang sauh sauh ang u. A zir duh tak tak leh hrechiang duh kan awm a nih chuan editor kaltlangin min rawn be pawp thin dawn nia. Nangmahni tanpui turin ka inpeih reng e.
(He article lo ziaktu Tv. K. Remruatfela hi Serchhip khua niin,2008-2009 session khan Synod Higher Secondary School atangin Class 12 (Arts) a pass chhuak a. Tunah hian K.L.E. Law College, Bangalore ah LL.b 3rd. Sem a zir mek a ni. - Samuel Lalrozama Hmar )
