.jpg)
‘Tr" hian ‘T’ nihna hi a phawk zo lo hlein ka hria. Hmun tam takah ‘tr’ hman (tranpui, tringtrang, etc.) hi a rem em em laiin hmun dangah ‘tr’ hman hi a rem lo (thin, thing, etc).
‘T’ hi ngun tak leh chik taka zir chian chuan ‘tr’ angin a ri lo. ‘Tr’ ni lovin ‘T’ chang deuh faka lam a ni. Chu chu ‘t’ ( a hnuaia chhunhan) rik dan tur dik tak niin ka hria.
‘T’ hnuaia chhunhan awm kan neite, thlukna kan neite hi Mizo tawng dangdaina a ni. “Hnamdang tan chhiar/hriatthiam a har,” tih vang ngawta thlak chiah ka ruat lo.
Mizo tawnga thuziakte hi hnamdang chhiar tura ziah a ni lo. Mizo pangngai chuan a hnuaiah kan chhun- hang emaw chhun hang lo emaw ‘tr’ anga lam hun tur chu kan hre vek. Hnamdangin Mizo tawnga thuziak chhiara hriatthiam an duh chuan ‘t’ nihphung pawh chu an zir tel ve mai tur a ni.
Mizo tawng hi tawng naupang tak mai a ni a, A AW B phei chu kum 1894 atang chauha nei kan ni. Chu- vangte pawh chu a niang, thumal khat hian a thluk dan azirin awmzia tam tak a nei thei. Tawng naupang tak e ti lo chuan hnamdang tawngte aia dangdai (unigue) riauna engemaw zat a nei ve a ni. Tawng zir mi ka nih lem loh avangin a danglamana zawng zawng ka hre vek lo, ka hriat chhun tlem azawng ka han tarlang ang e:
Double adverb kan nei. Double adverd nei tawng dang hi a tam awm love. Double adverd kan neih avang hian kan thusawi a tifiah zual hle a ni. Etirnan: Satel a kal bauh bauh.
Verb tel miah lovin sentence puitling kan siam thei tlat. Entirnan: He pangpar hi a mawi hle mai.
Tawng dangah chuan hming inzawh nan “What is your name?” leh a tlukpui hman a nih laiin Mizo tawngah chuan “Tunge i hming?” tih a ni tlat. He thilah hian inhnialna tam tak a awm thei ang. Mahse, kei chuan Mizo tawng dangdaina pakhat niah ka ruat tlat. “Engnge i hming?” tih hi chu kum 20 emaw lek kalta atanga
chin chhuah niin ka hria.
[He thuziak hi ka Bangalore thianpa, ROSANGLIANA CHHANGTE ziah a ni a; Bangalore mizo Weekly official newspaper BMA AW (Vol. XII Issue No.17. Dated: May 6th, 2007)-a chhuah a ni. Ngaihdan lo seng veta che ka unau, mahni tawng vawng tha leh tihausatu te hi hnam zahawm ber an ni tlat si a. - Samuel Lalrozâma Hmar]
