.jpg)
Kum tam tak liamta khan kan ṭhianpa David-a te'n film an siam ve a, Fist of Fury zulzui-in, 'Ka lung damna tur' tih; Mizo Bruce Lee tih te-in a lar chho hle a ni. Amah hi a taima a, a infit bawk a, boruaka eng ang zawng pawha in vawrh zak zak thei kha a ni. A thil tum ber chu martial arts hi naupang te rilru siam ṭhatna a nih bakah kan taksa vawnṭhatna a ni a, kan rilru sawizawina ṭha tak a ni tih a ni a; chumi kawngah chuan a kal a, martial arts promote a duhna lamah theih ang tawkin film industry hmangin a siam ve a nih kha maw. Sawiselna chu tam, mah se, a hlawhtling thawkhat e. Amaherawhchu film siam hi mi zawng zawng tih theih a ni lo, ani chuan a thei a a ti a ni mai. Engtin nge kan tih ve ang?
Tunlai ṭhalaite pawh hian chak leh vei kan ngah ve. Missionary nih leh ram vei vanga politics khelh ve hi chak kan tam awm e, a bikin zirlaite zingah hian. Keichuan ka ngaih ve dan chuan mahni khelhmual ṭheuh aṭang hian missionary leh politician hi kan lo ni thei reng mai a ni tih hi a ni. Mizoram hi a population azanga chhut chuan missionary tirchhuak pawl kan ni e te an ti a, chuvangchuan kan vannei a Pathian zarah kohhran support theitu ṭha tak kan nei nuk hlawm a, missionary hi chu an kal zel dawn. Nang leh kei kan lo pen chhuah ve hian pakhatin tam belh mah se chuti ang kher lo chuan kan hnathawh leh zirlai aṭang hian kan lo missionary thei reng a ni. Missionary te thlen chin hmun thim leh chhengchhe mai bakah keini chu hmun changkangah ringlo mite zingah kan zirin kan thawk ta hlawm a, chu hmun ngei chu a ni dawn lo'm ni Pathian tana kan missionary theihna hmun chu? Chu thinlung chu kan nei tak tak a nih chuan nitin vwai hnih pawh ni lo, kan thil tih dawn apiangin ṭawngṭai ila, ṭawngṭai nun nen ke pen ila, Bible hi chhiarin châng pawimawh tak takte hi vawn tum phawt mai hi a ṭul a ni. Kan nunah hian ringtu nihna hi han lang phawt mai se kan kianga mite hnenah. Anni pawhin kannun an rawn awt ve ngei ang. Tichuan Pathian rawngbawltu leh kohhran hruaitu rawn tur kan nei reng bawk si, kan vannei a ni. (Keipawh heti ang hian ka awm lo a, awm ve chu ka tum :) )
Chuti ang bawkin politics lam ni se, kan ram kan vei kan ti, ram tan thawh kan chak, hotu nih te kan chak. Chumi kawng atan chuan vawiina kan awmna ṭheuhah hian Pathianin min lo dah reng mai hi a ni a. Mizoram chhunga awm tan chuan a hna leh zirlaia rinawm leh ṭha taka a thawh a, midang te aia thiam bik ni thei tura taihmakna nena a beih hi a ram tana thawhna a lo ni a. Ram pawn ami tan chuan Mizo hming tihhingṭhat hi politician ropui nihna a ni. Tu te emaw tih dana kan ram leh hnam chanchin leh mahni thiltih ṭhat te sawi kur luk pawh a ni ber lo. Mahse kan ram leh hnam chanchin hi chu a ṭha lam sawi uar ta ila... Pawl 12 kan nih lai khan tu emaw ṭhiante kha chuan vai ho bulah khan ui sa kan ei uar zia thute leh krismas dawna zu mi zawng zawngin kan in ṭhin thute an lo sawi uar a, inlak pa nan. A ṭha tho mai e, chu ai chuan kan khawtlang inkungkaihṭhat dan te leh kan ram leilung mawina te leh PAthain ringtu kan nihna te hi sawi uar ila, kan hnathawhah hian rinawmin thiam ber nih tum ila, 'Ani te chu Mizo a ni tlat a lawm' an rawn tih theih hunah chuan kan awmna hmunah politician ropui, ram leh hnam tihmingṭha leh ram leh hnam tana thawk kan lo ni mai dawn lo'm ni pu Chairman? Eng nge i lung dam ve na tur?
Missionary-a i inpek theih chuan a ṭha, a hlu khawp mai... Politician-a i inpek theih chuan a ṭha, i ramin a ko che... ṭhalaite dinchhuah a hun.. Mahse inpe thei lo pawh ni ve ve la, a chunga sawi tawh ang khian i hlu lutuk thei tho.....
Mimal ngaihdan mai a ni e...
