.jpg)
Nulât/tlangval hriat chhoh tan tirh vel hi chuan tupawh mai hian hmangaih neih hi kan châk ber pawl a ni awm e, saptawnga “I love you,” tih hi a awl khawp mai. Mahse mizo tawnga han leh chuan a ril raih mai, “ka hmangaih che”, han tih thlâwt mai chu a râpthlak fu a ni. Chîk takin kan chhûngril hi han inen theuh ila, mahni chhûngte, zêm khat zenpui ngei mai te hi kan hmangaih ber te an ni a, midang hmêlhriat ngai miah loh han hmangaih hi chu har deuh mai ania; mahse tupawh hian kan mamawhin kan chak ber a ni si, hmangaihtu neih hi.
Chuvang chuan hmangaihna hi hriatthiam a ngai a, mi tam takin kan hrethiam lo fo; inngainatna, ‘infatuation’ an tih ang deuh hi a awm thei. Kawppui, min duhtu tak tak neih hi thil lawmawm ber a ni a, moral support tha tak min petu an ni thei, mahse mi zawng zawngina kan zawn – hmangaihna hi chu kan hmu lo fo thin. “Ka theih tawpin ka duh ve a,” te kan ti thin. Induhna hi inhmangaihna a ni lo, kan duh chhan chu kan ngaihsan vâng emaw tha kan tih vâng emaw te a ni thei. Mi tam takin “kan hmangaih deuh neih ai chuan min hmangaihtu neih a tha zâwk, a bîk takin hmeichhe tân,” te an ti thin, mahse heihi thil dik lo hul hual a ni. Nih chu a ni khawp mai, miin min hmangaih tak tak chuan an hmangaihna hmuin keini paw’n kan hmangaih ve ngêi ang, hun a lo inher liam zel anga; mahse lehlamin an tuar chhuah kan nghâk a ni ber a, chutianga kan tih chuan kan inkhêl a ni ber, gambling ang deuh hi ania, a lo tuar chhuak peih kher lo thei, a lo peih a nih pawhin hlimna famkim chu a neih a va beisei awm loh êm, mihring ve tho a ni si a, a hmangaihna pawh a a rûk takin a dai telh telh lo ang tih tunge sawi thei! Chutianga risk lâk ai chuan a tantu nih zâwk chu a tha mai a ni – hmangaihna pe chhuaktu nih chu. Inthenna a lo awm palh pawhin theih tâwp kan lo chhuah si a, inchhirna pawh a awm tlem nge nge ang chu, “khati khân ka lo awm lo a ni aw…” tia inchhir te hi a awm duh châwk ania. Keini pawhin chutiang vêka hmangaih lêt ve chu tum nghal ila, tichuan khawvela hlim ber kan lo ni thei zawk dawn a ni.
Chuvangchuan hmangaihna kan beisei chuan kan pe chhuak hmasa phawt tur a ni, inngaihzâwnna chuan induhna tak tak a thlen theia, chu chu hmangaihnaa kan chantir dawn chuan hmangaihna chu kan pêk chhuah phawt a ngai a ni. Chumi tur chuan kan thinlung chapo tak hi kan dah tlâwm a ngai fo; hlimna thuruk chu hei hi a ni - kan kawppui te awm tura kan duh ang chuan awm hmasa ila, tin, ti lo tura kan duh chu tih loh hmasak ngam a ngai. Chumi tur chuan inngaihtlâwmna nun neih a pawimawh. Pathian pawhin kan beisei leh remruatte chu a malsâwm ngei ang, Ani chuan chapote a dodâl a, inngaitlâwmte erawh chu khawngaihna a pe si thin a (I Pet 5:5). Tirhkoh Paula khan hmangaihna dik tak chu a sawi chiang khawp mai Korinth khuaa mite hnena a lehkha thawnah khan (I Kor 13:4-7).
Kan hmangaih êm êm a kan kawppuite'n min then leh si a nih paw’n an nuna lehkhabuah thu pawimawh tak kan ziak dawn a ni tih hi i theihnghilh lo ang u. Kan hmangaihnate an hriatchhuah chângin lâwmna nasa tak an nunah a thlen ve ngei ang, kawng dik kawhhmuhtu pawh a ni hial thei a ni; thiltha ti chu kan ni ta reng mai. Tin, hmangaihna hi thlarau nun nen a inkawp tlat tur a ni. Kan Lal Isua Krista tluka entîrna tha pe an awm dâwn a mi!! “I thinlung zawng zawngin Pathian i hmangaih tur a ni,” tih chu thupui berah rawn hmangin, hmangaihna, mihringte dâwn phâk rual loh chu min rawn pe ta a nih kha, a nunna hial hlânin. Chutiang êma hmangaihna hmuh chuan mihring thinlung sual tak mai pawhin Pathian hmangaih lêt ve châkna chu a ti zual sawt a ni, a tih loh theih loh. Hmangaihna hi uanpui chi a ni lo a, lâk nat a ngai a ni; lêrh vanga mi tam tak kawp kual thinte ho hi chu engtik niah emaw chuan tlûkchhiat hun an nei nge nge thin. Mi rilru an lo tih nat zawng zawng kha anmahnia lêt hun a la awm dawn tlats.
Chumai bâkah engkimtithei Pathian pakhat dik tak kan rina hnena inhlan fo hi kan thil tih tur mâk mawh a ni - kawppui thlan chungchangah leh kan kal zel dân turah leh a tâwp (inneihna) kan thlenpui hmain. Fimkhur takzet a ngai a ni, kan khingpui Diabola lah chu sakeibaknei rûm thin angin a ei theih tur zawngin a phi ruai si thin a (I Pet 5:8). Pathian hian A hmangaih hringfate tana tha ber tur hi a hria a, kawhhmuh theuh hi a duhin a châk a; chu kawng chu hmu turin Amah kan râwn fo a ngai a ni. Mihring duhthlanna hi chu a thâmral leh mai thina, Pathian hriatpuinaa thil thlan erawh zawng chatuan atan a ni zawk. Lalpa tih chu finna zirtirtu a ni a; inngaihtlawmna chu chawimawia awmna a ni si a (Thuf 15:33). Mi tu emaw kan rilrua kan lo vei rûk em em mai, phu lo riaua kan inhriat si te pawh hi Pathianin rem a tih chuan kan tan kawng a rawn sial mai ang. Amah hi han ring phawt mai ila.
Ngaizâwng neih hi sual a ni lêm lo e, neih hi a tulna pawh a awm kher chuang lo; kan neih dan a zir a ni, zû (alcohol) ang hi a ni mai. Tisa châkna bawiha min hruailuttu leh khawvel boruak tha lo min hîp tirtu a nih chuan a tha lo na ngiang mai; zirlaia tihchhiat phahna’n leh hna lama min ti thuanawp theitu pawh a ni thei, sms thawn reng mai leh phone call siam ngun vanga sum paihralna hmanrua tha tak pawh a ni; chhungte min hlattirtuah pawh a chang thei a nia. Amaherawhchu ‘tanpuitu’ atana kan hman erawh chuan a tluk a awm lo, Pathian hnaihna kawng leh moral support - tisa leh thlarau nun tichaktuah a hman theih a ni. Chhungte hnena kan sawi chhuah ngam loh te pawh ngaihzawngte bulah chuan kan phawrh ngam maithei, zirlai zir peih loh laia min fuihtu ber pawh an ni thei e. Tin, lungngaih ni bera min tawngtaisaktu leh Pathian thu min hrilhtu pawh an ni thei. MAHSE a tha lo lam kan sawi tawh leh sawi loh (kan hriat theuh) vang erawh hi chuan ngaihzawng neih hi i uar lo ang u. Thianghlim taka ngaihzâwng neih zir hi mi huaisen ber, malsawmna dawng tlâk, thawmhnaw a ni.
Chuvang chuan hlim tak tak kan duh a, hmangaihtu tak tak kan zawng a nih chuan, tawngtaina nen, hmangaihna dik tak pêk chhuah inhuam chungin vawikhat chiah chu han bei chhin teh ang u… kan inchhîr lo ang…. Waaa nuam dawn em… Sas tê nen len dun chu… :-)
[He Article hi Bangalore Mizo newspaper Zirlaite Khawnvar (Bi-monthly), Vol. XII issue No.5, January 2007- a tihchhuaha ka ziah a ni. Kawppui te hi an pawimawh a nia. Hmangaihna tak tak i lo tem ve chhin tawh em le ka unau? - Samuel Lalrozâma Hmar]
No comments:
Post a Comment