.jpg)
Madras Cafe movie-ah Officer Vikram-a'n Mizoram operation (ram buai lai) chungchang a han sawi lan zuai chuan ka beng a la hle a... Khawvel, a bikin India chuan terrorist ti-a an chhàl, Liberation Tigers of Tamil Eelam (தமிழீழ விடுதலைப் புலிகள், Tamiḻīḻa viṭutalaip pulikaḷ) te'n India Prime minister hlui Rajiv Gandhi an thah vanga ram pum kan tuar leh dem thu pawh kha kan la hre reng awm e...
Sriperumbudur, Tamil Nadu,-ah kum 1991, May ni 21 khan Thenmozhi "Gayatri" Rajaratnam Aka Dhanu chuan suicide bomb hmangin a that a nih kha, mi 14 vel an thih phah nghe nghe...
Heta ka rilru-a lo lang chu he nu hi misual kan ti dawn em? LTTE pawh hi terrorist kan ti dawn em? tih hi a ni! Tih loh chi pawh a ni law'... Kan ram prime minster an that tlat a, an ramah an sipaite an kàp tlat a. Amaherawhchu, khatia an chêt chhan pawh kha eng nge tih pawh hi ngaihtuah tham ve deuh mai asin... MNF te pawh kha terrorist an ni a India ram mitah chuan. A hruaitute zawng zawng kha chu fak tlak pawh an ni lo. Amaherawhchu, a hnam sipaite erawh kha chuan mahni aia ram leh hnam an dah hmasak vang leh, hun lo la kal tura Zofate tual lènna tur hmun nuam siam an tum vanga nun hlan ngam an nihna kha hriatpui a pawimawh awm e... A tawpa thil lan chhuah dan hi chu thra ber thrin lo mah se, a chhan leh a thawktute taihmakna leh inpekna erawh hi chu fak tlak leh hriatthiampui ngai chin a awm vek a nia...
Kum 1970s, Sri Lanka sorkar lai United Front government chuan 'policy of standardisation' an tih chu university-a hman turin a chhawp chhuak a, chu chuan ram mipui tam zawk Sinhalese tawng hmangte tana an luh theihna tur kawng awlsam hawng a ni. Chu chuan hnam tlem zawk Tamil mite thin a khei ta a inang tlâng veka an awm theih nan leh Tamil mite chanvo humhim nân, Tamil Manavar Peravai (Tamil Students League) an tih chu, Tamil thralai 40 intel khawm chuan an din ta hial a ni. Chung zingah chuan LTTE military commander hmasa ber lo ni ta, leh an hotu ni zui ta, Velupillai Prabhakaran (chutih laia kum 18) mi chu a tel ve nghe ngeh. LTTE hi kum 1976, May ni 5-ah din a ni a. Marxist-Leninist ideology hmangin, an inkaihhruaina chu atheism, Pathian awm ring lo leadership a ni.
An rawn lian chho zel a, Tamil mite ram luah chin chu unite a nih theih nan leh an chanvo dik tak an hmuh theih nan an fight a, mahni nunna hial hlan ngamin an che a, hetiang record hi an siam thei hial a ni:
1. Khawvela terrorist organisation zinga ram hruaitu lian pahnih that theitu : Sri Lankan President Ranasinghe Premadasa (1993) leh Indian Prime Minister Rajiv Gandhi .
2. Suicide belts an tih mai, plastic-a siam bomb leh kawnghren siam chhuaktu an ni.
3. Suicide attack (Thih chilh pawl) atan hmeichhiate nasa taka hman uar trantu pawl an ni bawk.
4. Militant group zinga air power nei thei awm chhun a ni hial mai thei... Thlawhtheihna tê chi tam tak râl beih nân an kawl...
India leh Sri Lanka-in Peace accord an sign khan, India chuan peace keeping force a thawn lut a, mi tam tak an that a, Rajiv Gandhi thih chilhtu Dhanu-i unaupate pawh kum 1987 an that a, amah pawh hi vai sipaiin an pawngsual ni-a sawi a ni. Inthlan a lo hnai leh tawh a, Rajiv-a a lal leh chuan Peace keeping force a thawn lut leh ngei dawn si a, chu vang chuan, LTTE chuan a lal leh hi an duh tawh lo a ni ber. Dhanu-i hian a rilru natna atrangin chakna a chhar a, ama nun hlanin a ram leh hnam tan a thi ta a ni.
Tu nge dik zawk le? Mahni chanvo suala silai chawitu nge ni a, tharum nena bei leta thah chimih tumtu chu? Dik lohna kan nei threuh e...
".....Ama mite tan chuan ram leh hnam hmangaihtu, revolutionary an tih ang hi a ni a, amaherawhchu, tu emaw tana revolutionary ni apiang chu mi dang tu emaw tan chuan terrorist a ni lo thei si lo..."
___________________________________
Eng pawh ni se, heng LTTE leh MNF hnam sipaite ang hian ram leh hnam hmangaihna aw kan nei tak tak a nih chuan FB leh thriante nen titihonaah kan vision thra tak takte vaivir hi duhtawk mai lovin, chengrâng chawi theih kan neih thrat ber kan rinawmna, kan taihmakna, kan huaisenna leh kan dawhtheihnate sâwm khawmin thralai rualte hi intêl khawm ta ila, hei aia nuam zawk Zoram nuam hi kan siam thei dawn lo'm ni?
Kan hruaitute thlak a ngai kan ti a nih chuan a thlaktu turin kan ding chhuak ngam dawn lo'm ni?
Zirlai 40, thralai awm khawm, lekina an tran LTTE mahin khawvel a sawi nghin theih chuan keini chuan kan ram zîmtè hi Chhawrpial rûnah kan chantir thei dawn lo'm ni?
