Mizo: Kan INKHELH MUAL

Kan inkhelh mual (Ring/Tatami) kil li neia siam, lian lutuk lem lo, kil khatah chuan ka thu a, ka thianpa chuan ka dâr vêl chu a malis hauh hauh a. Ka bag chu min han pe a, tui bottle ka han phawrh chuan ka rosary ah lai chu a rawn bât chhuak tel palh a, Isua, kross-a an khengbet lai lem ka han hmuh chuan ka thinlungah beiseina thar tam tak a lo lut leh a. Tichuan tui ka in zo chu mit sen râm chungin ka han melh phei a, chhungrilah chuan ka khur deuh zawih zawih, ka chau hle bawk. Ka tumpui pa, feet ruk zet a sâng, chêr ria zaih mai, zuang thauh thauh chu ka va hmu a, inti pachangin ka ding a, amah chu tawk turin ka pan phei ta a, ka ke chuan min zo tawh lo ang tih erawh zawng ka hlau khawp mai a….


Semi-final a ni a, a hmain mi pali ka lo hneh tawh a. Hei hi ka tawn tlang leh chuan final ka lût dawn ta. Rilru tawngtaina nen, ‘Pathian hmingin’ tiin ka lut leh ta a…. Ka hneh leh ta hram a, mahse ka hahin ka chau khawp mai. Chumi hnu maiah final fight an rawn puang leh nghal mai si… ka zuang lut leh… ka ke chu ka khai thei tawh mang lova, kut chauhin ka bei a ni ta, point an chhiar zo chu 3-1 in ka hneh ta lo… Mahse a ropui e, Karate ka vawikhat khelhna a ni a, a har khawp mai, inpuahchah lawkna pawh a awm si lo, he tournament hmâ ni hniha hre ve chauh kha ka ni a, experience atan tiin ka tel ve a ni.

Taekwondo leh Tangsoodo-ah te chuan National level hial Pathian zarah lo khel tawh mah ila martial arts chi hrang hrang te hian mahni dan leh dun hrang theuh an nei ve vek sia. Tun tum chu National level êm a ni lo na a, South Indian Open (2003) a ni a, state pali an rawn tel a - kei private in ka khel ve a. Ka thiante pali, Chandrashekhar-a leh midang, min tawiawmtute nen chuan college lam panin kan haw a, lawmna tur pawisa pawh ka nei si lo, ka thiante hnena lawmthu ka sawi mawlh mawlh hnu chuan ka tih theih tâwk leh hlu ber, Pathian hnena lawmthu sawi chu ka bawhzui ta mai a. Room-ah chuan ka Silver medal chu ka hum a, ka inngaihtuah a, mihring takin duhthlanna pahnih chu ka nei ve hian ka inhria - final a ka chak ta lo chu pawi ti a rilru tih hah nge ka thlan dawn inring miahlo chunga medal ka la hlauh mai chu lawmpui, tih chu.

A pahnihna zawk chu ka thlang ta a ni. Pathian pakhat dik tak kan rin hi a nung tak zet ani tih ka hre chhuak thar leh a. Mihringte hi Pathianin duhthlang thei turin zalenna min pe bawk a, kan duhthlanna leh ngaihtuahnate hian kan nun a kaihruai thei teh khawp mai. Kan duhthlanna te hi kaltlangpui tur chuan Pathian râwn fo tur a ni. Mahni finna a innghah ching mi chu thil ti sual der a ni teh meuh mai. Chutiang bawkin kan nun hi inkhelh leh infiamna mual a ni a, nitin mai hian beihtur hi kan nei reng a ni. Kan hmaah hian harsatna te hi lian leh chak hmel deuh hian a rawn ding fo thin a.

Kan zirlaiah rokhawlhna hrang hrang kan tawk thin. A kuma kum hlauh hial te pawh kan awm fo. Mahse beidawng lo ila, Pathian kan hnenah a awm tlat ani tih hi hria ila, kan hmaa beih tur kan neih, hlauhawm hmel zet chu hneh tawh angin thlîr ila, Pathian zarah kan hneh ngei bawk ang…. chu harsatna leh manganna aia chak Pathian kan nei si a. Tin, hlawhchhamna kan tawh chang te pawh hianin Pathianin kan tan kawng tha zawk a ngaihtuah ang tih hi ring tlat ila. Lalpa’n thil engkim hi chhan nei theuhin a siam si a (Thuf 16:4).Khawvel thila hlawhchhamna te hi thlarau tân hlâwkna a ni fo thin tih hi i hre nawn leh bawk ang u…


[He Article hi Bangalore Mizo newspaper, BMA AW(Weekly), Vol. XII issue No.2, January 2007- a tihchhuahaha ka ziah a ni. Huai takin i hmelma te chu han bei ve teh le ka unau - Samuel Lalrozâma Hmar]

Mizo: KURTAI nge thlum CHINI !??

He hla hi mahnia duet tur a nia, mahse aw (voice) hi a inang tur a ni lo :-D

(Video hi youtube-ah pawh a en theih : Kurtai/Chini - Youtube )

Hmeichhia:

Valmawi i hmangaihna hi tuar a har ngei;
Mualza kâr danah pawh leng mah ila,
Nghilh ni reng hi i awm dawn lo.

Mipa:

AW duhlai ka hmangaih che,
Tuanna tlâng pawh dang mahse,
Zawh che ka nuam ngei e,
KURTAI nge thlum CHINI??
Aw ka dâwn thiam lo,
Aw ka dâwn ngam lo….



[Hrilhfiahna: Distance relationship nge nghet awm dun relationship tihna a ni.  Hmangaihnaah hian hla takah, inhmu phak loin awm mah ila kan rinawmna leh hmangaihna te hi a ngai reng em?? 

Kurtai leh Chini hi thil thlum ve ve a ni a, mahse a nihna chu a in ang hauh lo mai, khawi hi nge thlumin tui zawk le?? Rinawmna duh chuan rinawm hmasak a ngai tih hi hre nawn leh ang u. I hmangaihna hi khawiah pawh, eng ang dinhmunah pawh a thlum dan a ngai reng em le ka unau?? He zawhna hi i kawpppuinu/pa i zawh hmain nangmah i inzawt hmasa fo dawn nia; "pe rawh u, chutichuan pekin in awm ang.... In tehna ngai bawkin an tehsak leh dawn si che u a,” - Luka 6:38 , tih ziak ang deuh khan.

He artikul a ngaihdan te hi kan tawmpui ve em le : "Hmangaihna ka la na na na" - Samuel Lalrozâma Hmar]

English: A new 'ART'

Centuries ago, in a village in mainland China, a peasant woman went to fetch some water; at the stream she witnessed a fight between a tiger and a large bird. With a keen sense of observation she witnessed the fight. According to the tale both the animals died.

After the fight she went home late in the evening, and when her husband finally found his wife he tried to hit her for taking so long. But she dodged the blows using the techniques (of the bird) she observed in the fight; her husband finally gave up and curiously asked her about her new skill, she told him about her experience during the day then she taught her husband the new art, thus, a new form of kung fu style was born and is practiced till today in China and all over the world.

Therefore it is not always that the physically strong will win, to win in any situation we need agility, awareness, patience and a strong will power. All discoveries and inventions of the world were made because the inventors thought a little different from you and me. They were curious, asked questions in their mind, and carefully observed what’s happening around them.

So now it’s your turn to bring about a new revolution, to make new discoveries and help yourself and others; we can start with little and small things, starting from our studies, for example we know that a chemical mixture of hydrogen and oxygen makes water (H2O), but I guess many of us never asked why and how, we just learnt it because it’s there in the book. We must also try to remember things, faces, places and the things happening around us than just dozing away in one of our useless day dreams. Surely it will be of some help someday in the near future. The ability to have a keen observation must be cultivated in our daily life, such is the quality of a true warrior. And finally having faith in the Lord is one thing that we must never let go of, God has given each and everyone of us good abilities and a reasoning mind, so let us make use of that gift; with the power of the one true God, everything is possible.




[I wrote this article for the Mizo Students' Association, Bangalore's website, in 2007. It was republished at Mizoramexpress.com in the year 2010. What are you going to invent my dear friends?- Samuel Lalrozâma Hmar]

Mizo: ‘Nghâk ngam’ TESTIMONY

                                                 ‘Nghâk ngam’ TESTIMONY

                                                                                                -Samuel Lalrozâma Hmar(Sammy)

                                                                                                       s/o Dr.Thangchungnunga

            “Thihna hlim kawr ruam zawh mah ila thil tha lo rêng rêng ka hlau lo ang, nang ka kiangah i awm si a,” tih Bible thu lâr tak mai hi thinlung taka sawi a awl lo khawp mai. Thihna hlim kawr hi kan zawh ve fo ka ring. Kohhran hruaitute huaihawtnain Camping chi hrang hrangte hlim leh lâwm takin, intuai thar duha, hman leh peih te ho chuan, kan hmang fo thin a nih hi. A khamawm loh angreng thin khawp mai ti te pawh kan awm laiin mi tam erawh chuan  camping tih thu hi kan tihin kan nuihzat titih deuh riau ni tein a hriat theih thin, a châng chuan. ‘Awmzia a awm lo,’ tih te leh ‘piangthar tawh reng a lâwm,’ tih thâwm te a tam thin khawp mai. Mahse thil pakhat kan hriat hmaih chu heti ang camping leh thusawi han ngaihthlâk hrim hrim te hi thil hlâwkthlâk tak a ni, tih hi a ni.

            Piangthar tûr leh pianthar tum ngawr ngawrin kan lût a nih chuan a dik lo deuh mai thei bawk. Kan nun hi thîr tuiêk thei ang mai a ni a, tha taka châwma tuaihnûm reng loh chuan tuiêk leh sulrûlin a ei chhiat ang mai hian thimah a in chiah rup thei a ni. Chuvâng chuan nun kawng kalsiam zawh dan dik zâwk hriat thar nân leh tuna chatuanna pana kan zin kawng zawh hi a dik tâwk nge kawng thar leh tha zawk a awm tih finfiahna’n te a ni zawk si. Hriat hnu pawh hi thil tha  nih chuan hriat hriat hian a chiang bik fo. Lehlam zâwnga thlir dâwn chuan inkhâwm te pawh a tul hlei nem, mahniin Bible a chhiarin a tawngtai theih a, theologian tam tak kawm tur an awm bawk; tunlai khawvel changkângah internet hmangin thil tam tak a inchhiar kuak theih bawk.

            Kan camp duh lohna chhan tam tak chu Speaker vâng, thiante an tel dawn loh vâng, kan zah hrim hrim vâng leh mamawh loa kan inhriat vâng tein a ni tlângpui fo. Inkhâwm leh heti ang camping ang huna thusawitute hi an inpuahchah ve nasat ngei a rinawm. An thusawi zawng zawng chu hriat a har a, hriat pawh a theih loh; mahse point pakhat tal, pawimawh tak, a lâk ve theih a ni, tih hi hria ila. Tlar khat lek emaw an châng behchhan emaw te pawh a ni thei e. Ngun taka kan ngaihthlâk phawt chuan hriat belh emaw hriat thar emaw pakhat tal, kan nun khawih danglam thei thil a awm dâwn a ni tih hi a haiawm loh a, a chiang a ni. Tin, Pathian thlarau thianghlimin a luahna hmuna hun hman hrim hrim hi malsâwm dawnna chikhat a ni ve tlat bawk. Khawi hmuna camp ho zingah pawh hian hlâwkpui êm êm lo inti te pawh an awm maithei a, mahse inchhîr tak erawh zawng an awm lêm pawh ka ring lo.

            Pâwltlâk thla, ni ngâ 2010 khân Bangalore Hmar Students’ Association chuan kum danga tih thin ang bawka Sikpuiruoi huaihawt leh a tumnaah chuan chawpchilh tak maiin a hmâ zânin martial arts show nei turin min rawn sâwm leh thut mai a. Rilru tawngtaina nen mi ka han sâwm kual nghal a; a hmaa tihpui thin te, BMA keh HSA lamah te pawh. Mak angreng takin Inrinni a ni naa tumah an lo hman lo tlat mai. Châk tak tak te pawh an lo thei lo ve tlat; Marital art tuipui non-mizo ho te pawh ka va bia a, sabbath a lo nih angin an lo inla kulmûk tlat bawk si, Kristian lo ho lah program pawimawh nei an lo ni fur.

            A tûk chawchhûn ei zawh chuan a theih ngang dâwn lo nia ka hriat hnuah thianpa Japhet leh vice president te pahnih chu ka va hrilh ta a. Mahse thianpa chuan ti hram tura min ngen vângin thianpa Mama ka sâwm chhuak a, kawng sirah thing bung leh tile vel zawngin kan chhuak a, duh tawk kan ngah hnuah chuan Mesak nen kan in tawng a, puih min lo châk hlauh mai a. Thianpa Andrew a rawn thleng hlauh mai bawk a, ka han enpui zuai zuai a minute sâwm vel, ho dâwn hle mai ti rilru chung chuan kan phei ta a. Mama, hman lo tura ngaih pawh chu a lo hman leh thut bawk a, thil vel chu ka taksaa vaw bungtu (Iron body demonstration) turah ka hmang ta a. Kan ti dawn rau rau a nih chuan Video a cover ve hrim hrim chu ka duh a, Bangalore-a missionary awm Pu Josiah ka va phone a, mahse a lo chhuak tlat mai. Kan thu a, tawngtaina hun ka hmanpui a, a hun a lo thlen chuan inhliam lo leh tluang takin kan ti zo thei ta a, mipui pawh an lawm ve hle a ni. A hnuah chuan video-in an lo la tih min hrilh a, mahse digital camera-in a ni a, a fiah vak pawh ka ring lêm lo a, lâk loh ai chuan a tha e, ka ti a. Mahse en theiha a lo awm hnuah chuan, minute thum lek ni mah sela en tlâk tak leh fiah tha takin a rawn chhuak lawi si.

            Tichuan, chu program hman hnu, chumi kum vêk, Bangalore-a camping naa kan thusawitu thusawi pakhat chu, chû ka thil tawn nen chuan ka hmehbel lo thei lo a. ‘Pathian hian a duh hunah chuan min chawimawi mai a ni, thiltha kan tih te pawh hi tih lan vak a lo ngai lo, a tul a tih hunah chuan a rawn tilang mai a ni,’ tih a sawi chuan a hma kâra ka thil tawn chu min hriatchhuah tîr a. Keima lamah chuan theih tâwk ka chhuah ve a, ka beidawn hnuah Pathianin ka tum zawng zawng aia ropui zawkin min chawimawi ta a lo ni si tih ka han hriat hian lâwmin ka biangah mittui a luang ta hiala, tih tur chu a awm lo naa ka chiang thar hle a ni, Lalpaah hian. Amah ring chunga thil kan tih hi chuan a duh (a tul) hunah tak min châwi sâng mai a lo ni. Thusawituin a sawi anga Sari te nupa ang deuh khân mihring hian hming thatna’n tih tur kan nei ve nia inhriat tlat châng te leh kan duh anga thil thlen tîr tum tlat te pawh hi a awm thei a, a awm fo bawk.

            Mahse chuti ang zâra ropuina chan chu kawr pakhat, rei tak hâk hnua hlih a tul ang tlat hian hlih sakin kan awm leh tho tho thin; mihring mihrinna atanga ropuina lo chhuak hi chuan rei a daih ngai lo, mahse Pathian rinchhana beiha ropuina hi chuan hausakna a thlen a ni tih ka hrechhuak thar leh a ni. Chutiang zêl chuan mitin mai hian Pathian nghah ngam zir thar leh te pawh hi a lo va tha dâwn êm, tih te ka ngaihtuah thar leh a. Noa pawh khâ kum zâ dâwn lawng a tuk khân rei tiin a phun ru mai thei a, mahse rinna nena a nghaha a tihhlawhtlina tak kha an chhungkaw chunga malsâwmna thlentu a lo ni ta a nih kha. Keipawhin camping-naa thu tlemte ka hriat chu ka hlawkpui ve hle ta tihna a nih chu.

            Hei, IT khawpui, Bangalore atangin Zofate zawng zawng chibai ka rawn bûk che u a; kum kalta han thlîrlêta Pathianin min kaihhruainaa hlawhtlinna kan tawn te hmuh tumin hmalam hun thim tak anga lang fo hi beiseina nen chuan zing nichhuah hma chiaha hun thim tak, a hnua rawn eng kuar, ang maiah a chang dawn si, tih hi hre thar leh ang u. A ni, chu hun thim reilote hnuah chuan ni eng mawi tak chuan leilung a rawn en si thin ang hian kan nun hi Pathian nen chuan mite leh keimahni tan ngei êng duhawm a lo ni fo dawn a ni, tih hi i hre thar leh bawk ang u. Kan Pathian chuan “Nangni lama ka rilru putzia chu ka inhre si a, in hun hnuhnung tawpah chuan beiseina pe tûr che uin thil tha lo ni loin thatna ka ngaihtuah asin (Jer 29:11),” a tih kha maw! Lal Davida ngeiin a thil tawn atanga sawiin, “LALPA chu ka zawng a, tin, ani chuan mi chhâng a, ka hlauhzawng zawng lakah chuan mi chhanhim ta a (Sâm 34:4),” a tih ang khan i intihuaiin, Pathian thiltihtheihna hi nghâk ngamin, i intawngtaipui tawn thar leh ang u hmiang.

[He Article hi Bangalore Mizo newspaper, BMA AW(Weekly), Vol. XV issue No.39, December 2009- a tihchhuahah, Jt.Editor ka nihlaia ka ziah a ni a; a hnuah tlem ziah belha chulmam leh deuh niin 'Christian Outlook' monthly magazine, August 2011 issue-ah tihchhuah leh a ni.


 Enge i testimony ve le ka unau? - Samuel Lalrozâma Hmar]

Mizo: HMANGAIHNA ka la nâ na na

Nulât/tlangval hriat chhoh tan tirh vel hi chuan tupawh mai hian hmangaih neih hi kan châk ber pawl a ni awm e, saptawnga “I love you,” tih hi a awl khawp mai. Mahse mizo tawnga han leh chuan a ril raih mai, “ka hmangaih che”, han tih thlâwt mai chu a râpthlak fu a ni. Chîk takin kan chhûngril hi han inen theuh ila, mahni chhûngte, zêm khat zenpui ngei mai te hi kan hmangaih ber te an ni a, midang hmêlhriat ngai miah loh han hmangaih hi chu har deuh mai ania; mahse tupawh hian kan mamawhin kan chak ber a ni si, hmangaihtu neih hi.

Chuvang chuan hmangaihna hi hriatthiam a ngai a, mi tam takin kan hrethiam lo fo; inngainatna, ‘infatuation’ an tih ang deuh hi a awm thei. Kawppui, min duhtu tak tak neih hi thil lawmawm ber a ni a, moral support tha tak min petu an ni thei, mahse mi zawng zawngina kan zawn – hmangaihna hi chu kan hmu lo fo thin. “Ka theih tawpin ka duh ve a,” te kan ti thin. Induhna hi inhmangaihna a ni lo, kan duh chhan chu kan ngaihsan vâng emaw tha kan tih vâng emaw te a ni thei. Mi tam takin “kan hmangaih deuh neih ai chuan min hmangaihtu neih a tha zâwk, a bîk takin hmeichhe tân,” te an ti thin, mahse heihi thil dik lo hul hual a ni. Nih chu a ni khawp mai, miin min hmangaih tak tak chuan an hmangaihna hmuin keini paw’n kan hmangaih ve ngêi ang, hun a lo inher liam zel anga; mahse lehlamin an tuar chhuah kan nghâk a ni ber a, chutianga kan tih chuan kan inkhêl a ni ber, gambling ang deuh hi ania, a lo tuar chhuak peih kher lo thei, a lo peih a nih pawhin hlimna famkim chu a neih a va beisei awm loh êm, mihring ve tho a ni si a, a hmangaihna pawh a a rûk takin a dai telh telh lo ang tih tunge sawi thei! Chutianga risk lâk ai chuan a tantu nih zâwk chu a tha mai a ni – hmangaihna pe chhuaktu nih chu. Inthenna a lo awm palh pawhin theih tâwp kan lo chhuah si a, inchhirna pawh a awm tlem nge nge ang chu, “khati khân ka lo awm lo a ni aw…” tia inchhir te hi a awm duh châwk ania. Keini pawhin chutiang vêka hmangaih lêt ve chu tum nghal ila, tichuan khawvela hlim ber kan lo ni thei zawk dawn a ni.

Chuvangchuan hmangaihna kan beisei chuan kan pe chhuak hmasa phawt tur a ni, inngaihzâwnna chuan induhna tak tak a thlen theia, chu chu hmangaihnaa kan chantir dawn chuan hmangaihna chu kan pêk chhuah phawt a ngai a ni. Chumi tur chuan kan thinlung chapo tak hi kan dah tlâwm a ngai fo; hlimna thuruk chu hei hi a ni - kan kawppui te awm tura kan duh ang chuan awm hmasa ila, tin, ti lo tura kan duh chu tih loh hmasak ngam a ngai. Chumi tur chuan inngaihtlâwmna nun neih a pawimawh. Pathian pawhin kan beisei leh remruatte chu a malsâwm ngei ang, Ani chuan chapote a dodâl a, inngaitlâwmte erawh chu khawngaihna a pe si thin a (I Pet 5:5). Tirhkoh Paula khan hmangaihna dik tak chu a sawi chiang khawp mai Korinth khuaa mite hnena a lehkha thawnah khan (I Kor 13:4-7).

Kan hmangaih êm êm a kan kawppuite'n min then leh si a nih paw’n an nuna lehkhabuah thu pawimawh tak kan ziak dawn a ni tih hi i theihnghilh lo ang u. Kan hmangaihnate an hriatchhuah chângin lâwmna nasa tak an nunah a thlen ve ngei ang, kawng dik kawhhmuhtu pawh a ni hial thei a ni; thiltha ti chu kan ni ta reng mai. Tin, hmangaihna hi thlarau nun nen a inkawp tlat tur a ni. Kan Lal Isua Krista tluka entîrna tha pe an awm dâwn a mi!! “I thinlung zawng zawngin Pathian i hmangaih tur a ni,” tih chu thupui berah rawn hmangin, hmangaihna, mihringte dâwn phâk rual loh chu min rawn pe ta a nih kha, a nunna hial hlânin. Chutiang êma hmangaihna hmuh chuan mihring thinlung sual tak mai pawhin Pathian hmangaih lêt ve châkna chu a ti zual sawt a ni, a tih loh theih loh. Hmangaihna hi uanpui chi a ni lo a, lâk nat a ngai a ni; lêrh vanga mi tam tak kawp kual thinte ho hi chu engtik niah emaw chuan tlûkchhiat hun an nei nge nge thin. Mi rilru an lo tih nat zawng zawng kha anmahnia lêt hun a la awm dawn tlats.

Chumai bâkah engkimtithei Pathian pakhat dik tak kan rina hnena inhlan fo hi kan thil tih tur mâk mawh a ni - kawppui thlan chungchangah leh kan kal zel dân turah leh a tâwp (inneihna) kan thlenpui hmain. Fimkhur takzet a ngai a ni, kan khingpui Diabola lah chu sakeibaknei rûm thin angin a ei theih tur zawngin a phi ruai si thin a (I Pet 5:8). Pathian hian A hmangaih hringfate tana tha ber tur hi a hria a, kawhhmuh theuh hi a duhin a châk a; chu kawng chu hmu turin Amah kan râwn fo a ngai a ni. Mihring duhthlanna hi chu a thâmral leh mai thina, Pathian hriatpuinaa thil thlan erawh zawng chatuan atan a ni zawk. Lalpa tih chu finna zirtirtu a ni a; inngaihtlawmna chu chawimawia awmna a ni si a (Thuf 15:33). Mi tu emaw kan rilrua kan lo vei rûk em em mai, phu lo riaua kan inhriat si te pawh hi Pathianin rem a tih chuan kan tan kawng a rawn sial mai ang. Amah hi han ring phawt mai ila.

Ngaizâwng neih hi sual a ni lêm lo e, neih hi a tulna pawh a awm kher chuang lo; kan neih dan a zir a ni, zû (alcohol) ang hi a ni mai.  Tisa châkna bawiha min hruailuttu leh khawvel boruak tha lo min hîp tirtu a nih chuan a tha lo na ngiang mai; zirlaia tihchhiat phahna’n leh hna lama min ti thuanawp theitu pawh a ni thei, sms thawn reng mai leh phone call siam ngun vanga sum paihralna hmanrua tha tak pawh a ni; chhungte min hlattirtuah pawh a chang thei a nia. Amaherawhchu ‘tanpuitu’ atana kan hman erawh chuan a tluk a awm lo, Pathian hnaihna kawng leh moral support - tisa leh thlarau nun tichaktuah a hman theih a ni. Chhungte hnena kan sawi chhuah ngam loh te pawh ngaihzawngte bulah chuan kan phawrh ngam maithei, zirlai zir peih loh laia min fuihtu ber pawh an ni thei e. Tin, lungngaih ni bera min tawngtaisaktu leh Pathian thu min hrilhtu pawh an ni thei. MAHSE a tha lo lam kan sawi tawh leh sawi loh (kan hriat theuh) vang erawh hi chuan ngaihzawng neih hi i uar lo ang u. Thianghlim taka ngaihzâwng neih zir hi mi huaisen ber, malsawmna dawng tlâk, thawmhnaw a ni.

Chuvang chuan hlim tak tak kan duh a, hmangaihtu tak tak kan zawng a nih chuan, tawngtaina nen, hmangaihna dik tak pêk chhuah inhuam chungin vawikhat chiah chu han bei chhin teh ang u… kan inchhîr lo ang…. Waaa nuam dawn em… Sas tê nen len dun chu…  :-)


[He Article hi Bangalore Mizo newspaper Zirlaite Khawnvar (Bi-monthly), Vol. XII issue No.5, January 2007- a tihchhuaha ka ziah a ni. Kawppui te hi an pawimawh a nia. Hmangaihna tak tak i lo tem ve chhin tawh em le ka unau? - Samuel Lalrozâma Hmar]

Mizo: HMASÂWNNA chhermei

Vânrâng chhûm kara chhawrthlapui ên no riai chânga, Chhohreivung leh Sikeisen te’n
Thangvân zâwl an thaikawi châng hian; ai ang a tho leh thin, Zofalêng zawng te’n,
Thiam thang pho a hmatiâng kan sâwnna hi. Âwnthing zâra chang hnah vul leh
Chhawkhleipâr tin mawi Zofate u, sîr sâwnin laichhuat i chhir zêl ang aw.


Aw Zonunmawi, zâm chichiaiin, hmatiang sâwn zel ang che aw!
Chung Pathianin mal min sawm zel anga;
Aia u te zah leh inlungrualna te pâr vul reng se.
Khuanu duat Zofate u, Siamtu fakin hmatiang i pan zêl ang aw.


Thiamrûn belh vanga lêng dang zawng khûmin, zotlângram leh phâi khaw sumtuâl kan hrût chhuak,
Khelhthiam lêngrual te’n, ram mawiin, lawi ang thangin thlang-sâppui an khûm zo ta,
Rimawi tumthang tuma zâi tin vâwrin, ‘huthang’ lêng hril kan tling zo ngei,
Malsâwmtu, chung Pathian thu hrila ke pênin, ram thim kan ên mêk zêl e.


Aw Zonun! Fam ta kûngpui miril Chalngêng zawng te hre reng la, thâmral mai lo se.
Lêngi mawina leh finna te; chaltuaia huaisenna leh tlawmngaihna te;
Hnam tawng leh zia, inpumkhatna te hi; thâmral a’n zawng phal mai lo la,
Ar ang pâu lo a Siamtu hriain, hmasâwnna chhermei châwi nung zêl rawh aw.



[He hla hi Zofate khawvel hmun tina mi tana buatsaih 'hla (song/poem) inphuahsiak' (Bangalore Mizo Association-in Silver Jubilee lawmna hun a event tam tak a buatsaih zinga pakhat)- a lawmman pakhatna ka lakpui a ni. Phuah ve tawp mai, natna khuma zânmu chhîng thei loa ka zâl laiin inspiration ka hmu ve a. Chhiar ve mai mai teh ka unau :-).Trophy mawi tak leh pawisa fai Rs.2000/- keng telin CHHINLUNG MAGAZINE vol XX-ah chhuah a ni. - Samuel Lalrozâma Hmar]

Mizo: ZORAM vei LUNGLÊN

Zan a lo thlena, khua a tlai dawn hian, Zoram Vei Lunglen an tih hian, Delhi a cheng, Zoramveia thinlungah (eng pawh ti se), nu nau vei vanglai ang maiin, loh theihlohin hmun a luah thin a. Hetianga lunglenna ram a thlen tawh hi chuan, ama khawvelah, tuma tihbuai theihlohin a cheng thin a. Hetih hun hian a ni, kan Zoram khi, Zofate mahni a ro in rela awm tirin, an luah ram zawng zawng khi insuihkhawm tirin, ram khatah a dah a, sakhaw pakhat biain a awm tira. Zofate chu inpumkhatna nen, lungrualna ruamah, ramdang leh hnamdang ngai leh awt bik lovin a len tir a, an chhehvela hnam tin te zah leh tluk lohin a awm tir bawk thin a. He a thinlunga Zoram thar, a ma ka ngei atanga kan dawn hi i han bih chiang teh ang....

Zoram thar a Zofate chuan, kan Lalpa Isua Krista rawngbawlin kil tinah chanchintha an puang darh a. Ram chhunga awm te lah chu, diknain ro a rel avangin, thlamuang takin Lalpa fakin an chawimawia. A ni telin hma an sawn tual tual a, an hmasawnna chu engmah rengin a dal zo lo, thihna hneha tho leh, Krista Isua ngei chuan an hma a hruai avangin. An hmasawnnaah chuan hnufual bik reng reng an awm lo va, an zain pheikhai rual takin hmatiang an sawn a, intluktlanna leh zalenna an tih hi ang khat veka an neiha, a taka an nunpui avangin, khawpui leh thingtlanga awm chu duhthlan tur reng a awm chuanglo. An hmasawnna thuruk te chu Rinawmna, Taimakna leh Thawhrimna a bul an tan vang mai a lo ni a. rinna chu thiltih tello in thi a ni tih hria a nunpuiin , an thu rel reng reng chu thiltihin a zui nghal thina, an kova tla chu an hlena, midang leh hundanga tih atan an khek ngailo mai zawk alo ni.

Zoram tharah hian, ram hruaitute chuan, tumah hleih leh thlei bik reng reng nei lovin, DIKNA a rorelin hma an hruaia, mipuite entawn tlakin hna an thawk a, an hnungzui ve loh chu zahthlak khawpin an thawkrimin an rinawma. Hei hi, Party Politics tih vela in ham buai lovin, mitha leh rinawm mipuite'n an thlan chhuah vang mai alo ni bawk a. A hmain hetiang ang renga hnam impumkhat leh inlungrual, rinawm leh taima khawvelah hian an la awm ngai lova, an hnuah pawh an awm reng a rinawmloh. Hlawhtlinna thuruka kawng thum an Sahuai-thing-vawn tlat te chu :- 1. Thawhrimna. 2.Thawhrimna. 3. Thawhrimna a ni a, Zofate zingah chuan Beidawng tih hian hmun a neilo hrim hrim mai a ni. Nitin mai chu,"Yesterday is history, tommorrow is a mystery, today is a gift, that's why it's called Present" tih thu angin, Lalpa thilpekah an ngai nghet hmiaha, beiseina nung nen thlirin an hmang thin a lo ni. He hun leh Damlai Pialral an tih hian danglamna reng reng a nei awm lo e....

Zoramveia hian Delhi-a Zofate hnenah ti hian thu min hnutchhiaha," Ka unau duhtakte u, ka Ram Vei Lunglen hi a taka chantir theitu chu nang leh kei kan ni a, midang tihtura dah lovin, insuihkhawma inpumkhatin, pakhat angin kan hmaa tihtur awmte i hlen ang u... zamtur kan ni love, kan hmahruaitu hi,' Keiin Khawvel ka ngam ta' ti tu ngei, kan Lalpa Isua Krista a nih avang hian; beiseina nung nen hmatiang i sawn ang u..." tiin, Zoram Thar lo ding turah hian kan tel ve loh hlauin min rawn ngen ngawih ngawih a ni. A ni chuan, a Ram Vei Lunglen hi a thlen tur thu a Sahuai-thing-vawn tlata, kan Lalpa Isua Krista lokal tur kan rin ang hian a ring bur mai a ni. Delhi a Zofate hian engtin nge kan chhan dawn le???

[He Article hi Delhi newspaper DUHAISAM(Phur Châng Châng-ly), Vol. I issue No.3, Tahrik ni 21, VauThla, kum Sanghnih leh sâwm a tihchhuaha ka thianpa duhtak HLIMPUIA CHHANGTE ziah a ni. Engtinnge i ngaihtuah ve thin le ka unau - Samuel Lalrozâma Hmar]

Mizo: HMASÂWNNA

Zephyr Drama-a an sawi ang deuh khân, calculator age-ah kan thang chho ve a, han ti ve khang lâng ila, tunah computer age-in a rawn zui a; kan têt laia phone neih thar ve te kha chuan a rawn ri kha lâk kan inchuh luih luih thin a, khâwlthluâknei te phei chu hmuh tûr pawh a awm mang lo, ram hla taka mi te chanpuâlah kan dah deuh tawp mai anih kha mawle. Tunah chuan mobile phone leh internet-in min rawn rûn ta a; herhsâwp chunga thu chungin khawvêl kan fang chhuak thei ta a lo nih hi.

Chutiang chuan keini hmuh phâk maiah pawh khawvêl hi a thang nasa a, Delhi khawpuiah pawh mizo te chu kan thang ve zêlin kan changkâng {kan ti dâwn nge kan CK (CK lampum chiah hi ka hre chiah lo a)} ve zêl a, hnathawk pawh a kum têlin kan tam belh tih kan directory atang ringawt pawhin a hriat theih awm e. Tunah halai tam tak chu zâwlkhawpui atangin, zirna leh hna tha zâwk beiseiin, an rawn pêm thla ruih ruih mêk a nih hi. Pâwl 12 kan zawh hi chuan a hniak tam lam lam tiin Mizoram quota beisei leh hmelhriatte tih ang zuiin kan kal leh dûl dûl mai thin bawk a nia. Zofâte hi thil thiam thei deuh mai kan ni a, chuvangchuân thalai te hian tûn âi hian hmathlîr han ti zâu leh deuh ila a duhawm khawp mai. Chu tur chuan kan hmanraw neih that ber - internet hi hmang tangkai ila lehkhabu leh chanchinbu/phêk te chhiar i uar ang u.

Keipawh Aircraft maintenance engineering, Zofate la tih ngai êm êm loh, future a bright dawn nge dâwn lo tih pawh hriat loh zirzoin, aviation industry chu ka âr khawthim dâi ve mek a nih hi. He khawvelah hian zofate hi kan la tlem hle a, airport-a “Enga?” han tihpui tur hi an awm mang lo. Kut leh ke zungtanga chhiar zawh thei vek kan la ni, chutih laiin kan hmârchhak unau te chu hmuh tur an awm thahnem fû lawi si. Kawng thar, mahni tuina lam te hi dap ngam ve zel ila a tha khawp mai.

Mizote hi hnam huaisen tia inchhâl kan ni a, combat sports-ah pawh hian kan tha khawp mai. Mahse street fighter tha tak tak te hi huaina tûr hun takah hian kan huai leh thin si lo; kan thil chîn tha lo vangtein kan inelpui te chu nghakhing nau awm ang maiin chhaih leh dûrh dûrh a tul ta si thin a nih hi. Tin, ‘ruih lai huaina’ te hian ‘harh fim huaina’ a tluk lo a, inchhuanga Âka hmui pû ni awm tak te hi hnam dang zîngah kan zakzum leh fu si. Ngei zawng te hmaa ngawi hêm tawng lâwng lâwng ngama zu leh zuk leh hmuam nghei ngam leh si lo i ni ve em? Enge kan hneh loh tâk chu?? Mahni kan inhneh ta lo a ni, midang chu ka hâ se.

Pathian zâra India ram aiawha inkhel tura kan zin chhuah chang te hian Zofate hi ram dang mi te beih ang hian han ti ve ta ngat ila chuan ram ti hmingtha tûr hi kan tam tih ka hrechhuak thar fo thin. Hlawhtlinna kan chawimawi dân te pawh hi thlâk a ngai, thiamtheihna ai chuan taimakna hi i sawi uar ang u; mi hlawhtling te kan kawmin an hlawhtlinna thurûk zawh nachâng hria ila. Tin, kan hun kalta te thlîr lêt chânga taima taka hah thi kûla kan lo thawh theih chhan kha Isua Krista vâng zâwk a lo ni tih hi hriat nawn fo a va tha bawk em.

“Khua pawh a dur chuan ruah a sur nge nge”, tih a nih kha. Taima leh dawhthei taka rilru thianghlim nena beih hnua kan la hlawhtling lo a nih chuan Krista kan la nei tak tak lo a ni mai thei e. Vanduai ve hrim hrim tea kan inhria anih chuan i inenfiah ang u. Pathianin thil re re chhan nei theuhin a siam thin, tih a nih kha. Hun lo la thleng tur chu kan kutah a awm tih hre rengin kan chhungkua leh thenrual thate nen i infuih tawn mawlh mawlh ang u nîtinin. Hlawhtlinna tel lo chuan ram leh hnam a chawisan theih si loh. I ram leh hnam leh Pathian tan enge tih i inhuam ve le?!

[He Article hi Banfalore Mizo Newspaper-BMA AW (Vol. XV Issue No. 16, July 19, 2009 )-a Editor ka nih laia ka ziah a ni a; Delhi Mizo newspaper- DUHAISAM(Phur Châng Châng-ly, Vol. I issue No.5, Tahrik ni 2, Tomir Thla, kum Sanghnih leh sâwm)-a tihchhuahah chhuah nawn leh a ni. Hei hi Delhi version zak a ni. Kan ram leh hnam hmasâwnna'n enge i tih ve theih le ka unau - Samuel Lalrozâma Hmar]

Mizo: Hnam dang NUPUI/PASAL neih hi (ESSAY)

He khawvel kan chênna hmun zîm lêm lo takah hian thil nung chi hrang hrang, rawng leh pianhmang inanglo tak tak kan insûlpêl nuk mai a; chi (species) khat rau rau pawh chênna leh thanchhoh dân (environmental factors) inan loh vâng leh thil dang tam tak vângin kan inanglo nuai mai a nih hi. Kum 2004 thlenga thil nung chi hrang hrang hriat theih chinah pawh khân thlai (plants) chi 287,655 leh ransa (animals) chi 1,250,000 lai mai an awm a ni awm a (Ref. IUCN - International Union for Conservation of Nature).

Chutiang bawk chuan mihring te pawh hi rawng leh pianphung inanglo tak tak khawvêlah hian kan inzârpharh a. Mi ngo te, mi hâng te leh a dang dang te chu tawng, nunphung leh sakhaw khat neiin kan inkhuar hranga, hnam khat/chi bil (ethnic group) angin kan awm ta a nih hi. Chu hnam (race) chhûng ngeiah pawh chuan inthenna (sub-tribes/ castes) a la awm leh fo thin [ e.g., Zohnahthlâk –Lusei (Sailo, Chhangte etc.), Hmar (Varte, Zote etc.), Mara (Tlosai, Chapui), Lai (Bunghai, Bawihtlung) etc.]. Tin, a nu leh a pa, thil nung tê ber atanga lian ber thlengin kan awm theuh hi a hai awm loh. Hei hi inthlah chhâwng tura duan kan nih vang a ni tih a chiang a, Siamtu themthiamzia lanna tha ber mai pawh a ni hial awm mang e. Chu inthlahchhawnna (process) kal zêl nân chuan mihring te pawh nupui/pasala inneiin, damchhûnga chen dun a inpuih tawn zel chu kan chîndan pangngai a lo ni chho ta a nih hi.

Hnam dang nupui/pasala neih hi thupui (topic) pawimawh leh zâu tak mai a ni a, hnam dang tih hian a huam zau thei khawp mai bawk. A sawr bing têt theih ang bera kan beih dâwn chuan, kan chhûngte hnai tak tak (blood brothers) tih loh hi chu hnam dang an ni thei vek mai awm e, amaherawhchu a hnahthlâk ang zâwnga chhût hian zir chian a awl deuh ang chu. A hnahthlâk chhûnga inneih pawlh hi chu a pawmawm hle a, mahse hnahthlâk pâwna inneih hi a pawmawmin a tha em, tih erawh hi zawng thu khel fê ngai a ni ve tlat. Mithiam (Scientists) te chuan an chhuiin an chîk nasa a, ran leh thlaiah te chi tha zâwk siam chhuak turin an inthlahpawlh (cross-pollination/ hybrid breedings) tîr a, hmun hrehawm leh chhengchhe zâwka nung thei tur leh chi hrisel tha zâwk siam chhuah hna an bei nasa a ni. Chûng atang te chuan chi inthlahpawlh hi engemawchenah chuan a tûl a ni tih a hriat theih awm e. Mihringte dinhmunah pawh hian hnam hrang hrang te hian thatna leh thatlohna kan nei theuh a, hnam dangte thatna chu la ve thei turin inthlah pawlh chu a tulna chin a awm thei em tih hi zawhna pawimawh tak a ni.

Kawng lehlamah chuan hnam hi ral ve mai thei thil a ni bawk a, khawvêl mâwitu leh khawsak khairualtu (ecological balance) ransa leh thlai tam tak kan chân ta a nih hi. Tunlaiah pawh chi thenkhat, ral mai thei dinhmuna ding (endangered species) an awm teuh mai. Mihringte pawh hi kan bâng chuang lo, chuvang chuan hnam dang nupui/pasala inneih hi chîn dawklaka neih chi erawh zawng a ni hauh lo mai. Hnam mumal nei lo, mi zah pawh kai phâk lo nih hialna thlen thei a ni, ze nghetlo neihna a hrinchhuak a, rilru nghetlo tak put a awl, a mimal ang pawhin than a har tak zet a ni. Mahni hnam humhalh thiam apiang hnam changkâng leh entawntlâk, thang chho zel an nih tâk hi.

Hnam hrang anga kan awmna chhan ber pakhat chu kan mizia inan loh vâng a ni deuh bera, mize inang khat chu hnam khatah kan inchhûng lût a, tawng thar te pawh a lo piang ta thin a ni. Thlah pawlh te hian hnam kalphung leh mize inanglo tawn chhoh tur harsa tak tak an nei nual a. Mahni nihna tak chianlohna (identity crisis) an nei duh khawp mai bawk, a bîk takin naupang te’n. Khawtlâng (society)-ah demna leh enhranna a awm lo thei loa, khawvel kalphungah pâ te hnam chu chhawm tho mah ila, ‘hnam nei lo’ tia insawi leh inendawng a awm duh châwk.

Chulam ai maha harsa lehzual chu hnam kalphung leh sakhaw thar (cultural practices and prejudices) luhchilh hi a ni. Kum puitling nih tawh hnuah inzir thar leh tur a awm dâwn ta a lo nia. Nupui pasala kan neih tâk chhungte endawng leh demna (ostracization and condemnation) tawn tlang tura inpuahchah a ngâi bawk. Vladimir Piskacek-a leh Marlene Golub-a te ziah “Children of interracial marriage, interracial marriages: Expectations and realities (1973)”- ah chuan thlah pawlh fate beih pui ber chu identity crisis hi a ni, an ti a; chû thlîr dân chu nû leh pâ te chungah a innghat nasa hlê a ni, an ti bawk. Nu leh pâte, an ngaihdânah, an inlungrual chuan an fate pawh ngaihdân fel tak neia buai loin an thang chho thei dâwn a ni, an ti a, khawtlânga demna awm te pawh nu leh pain an kaihhruai that chuan tha takin an tâwn tlang thei dâwn bawk a ni.

Tin, hnam zia ina a ken tel tlat chu tawng hi a ni; mahni tawng mumal tak leh hausa tak nei chu a zahawm bîk a, hnam rohlu pakhat pawimawh tak, hnam anga min thliar hrang ber tu pawh a ni. Chuvang chuan mahni hnampui ngei nupui pasala neih a, mahni hnam tawng te tih lâr chhoh hi hnam humhalh dân kawng chi khat a ni. Khawvela hnam pui leh changkang ber ni a ngaih, sâp (English) ho hi hnam inthlah dal ve mai mai lo an ni a, khawvel a inbengbel hmasa pawh an ni rêng a, an tawng (English) te pawh international language-ah kan hman tak hial hi. Chutihlaiin keini zo-hnahthlâk te tawng ve hi chu a hausa loin hriat a hlawh loa, a mi te pawh hian mi hriat leh zah kan la kai thei tak tak lo a nih hi. =awng hi hnamkhat, chhûngkua anga min chêntirtu leh thlamuanna min petu a ni. Thisen zawmpui, zêmkhat zenpui te nên mualza kârdana lên lai pawha nun khawnawmna min petu ber chu mahni tawnga tawngpui tur an lo awm ve hi a ni. Tin, tawng inang hman hi nupa inkâr pawha thlamuanna leh inlungrualna thlentu pakhat pawimawh tak a ni ve a ni. Chhunni tlaitluan hah taka hman zawh hnua zân mut chhîn hmaa khumlaizâwl titî, mahni tawng ngei maia han chiârpui theih neih tluk hi chu a awm lo a ni. Hei hian inngainatna a tizual duh hle. Ram hranah, mahni tawng theihnghilh hial khawpa awmin, tawng dang hman nuam ti zâwk te kan nih ngawt loh chuan nun khawhar leh thimlai bera thlamuanna min petu chu tet tê atanga chûn leh zuâ te’n min chawi lenna aw kâ ngeia hmangaih ber te bula chhûngril nun phawrh chhuah hi a ni, tih hi hai der tum mah ila a chiang a ni. Hei hi tawng inang hnam innei te’n hnam dang, tawng danga tawng te, tânga pawm te laka an thil hlêp pakhat a ni.

Amaherawhchu thil nung zawng zawng hi a tul dana insiam rem (adjust) thei vek kan ni a, thlai te pawh hi êng lam pana to kawi ve zêl thei an ni. Chutiang bawk chuan mihring te, thil nung zawng zawnga chungnung ber, phei hi chu kan insiam rem thei tak zet a, hun reilotea mize thlâk thei pawh kan ni. Chû kan insiam remna kawngah chuan hmangaihna hi hmanraw tangkai tak, kawng tha leh dik tak min hmuhtirtu a ni. Ringtute (believers of the true faith) nitin chaw tha ber – Bible-in a sawi angin suala piang theuh kan ni a, suahsualna khawvelah hian hun kan hmang ral chu a ni ber. Chu sualna khawvel tinungtu leh hlimna kâwl êng thlentirtu chu Pathian thupêk ropui ber innghahna - hmangaihna (Marka 12:29) hi a ni. Hmangaihna chuan thinlung hrehawm a kaitho a, rilru suangtuahna leh ngaihtuahna khawvel pawhin a thlir phâk ngai loh muanna thlentu a ni fo thin. Hmêl leh rawng te a thlîr ve loa, hnam a thliar hrang hek lo, tawng inan loh vanga inthliarhranna pawh a khuh thei a ni; ama tawngkam hran liau liau a nei ve a, hnam inanlohna chu a hneh thei ngei dâwn a ni tih a dem awm loh hle. Chuvangchuan kawppui tur, damchhûnga riahrun rempui tur, atân hi chuan thinlung chhungrila hmangaih tak tak te leh min hmangaih ve ngei tu neih hi a tul a ni. Amaherawhchu, fimkhur a ngai tak zet; mahni hlimhlawpna vang mai maia nawm chenpui tura in kawp te a awm thei, damchhûnga inchhîrna thlentu tur a lo ni dâwn tih hi theihnghilh loh a tha. ‘Compromise’ an tih ang te hi a awm tur a ni lo, kan duh vak loh te’n min hmangaih em em a hriat vânga khawngaih neih te hi thil tih miah loh tur ani. Hmangaihna te pawh hi, mihring kan nih angin, dai ve zel thei a ni a; kum a lo tamin, hnam dang an nih ngat phei chuan, inanlohna hrang hrang awm te chu a zual chho duh a, hnam zia leh nunphung te hi tupawhin kan âwn lo thei si loa. Tirkoh Paula’n hmangaihna dik tak Korinth khuaa mite hnena a lehkhathawna a ziah (I Kor 13:4-7) ang hmangaihna hi chuan nun inthlâk thawkna emaw thil ngaihhlut ber chân ngam hialna emaw pawh a thlen thei a ni. Hun kal tawh (History) kan thlîr lêt chuan hmangaihnain khawvel a den chhuah dân tam tak kan hmu thei. Tun hnai maiah pawh Sap ram lal fanu Princess Diana leh Prince Charles te inneihna hlawhtlinglo tak chuan khawvel a nghawr hle a, hmangaihna dik tak nên kut an suih loh chu a pawi ta a nih kha. Chuvangchuan Kristian chhungkaw lungrual tak din tur chuan hmangaihnaa tan a ngai a ni.

Tin, sakhuana (religious practices) hi thil pawimawh tak pakhat, mihringte pum khata min siamtu leh min thendarhtu a ni leh fo. Sakhaw inanglo bia chu, hnam khat pawh nise, khaw thlîr dân a inan miau loh vangin an hlim thei tak tak lo a ni. Zohnahthlâk te hi Pathian nung be hnam kan ni a, hnam dang, sakhaw hran nei nupui/pasala neih mai hi thil rem lo teh meuh a ni. Thlahte thlenga nung lo Pathian lam hawina kawng kan hawn palh hlauh mai chuan nunna lehkhabu atangin vân Seraf thianghlim te’n kan hming an thaichhiat mai a hlauhawm a ni. A bîk takin hmeichhe tân a derthawng bik hle, an dinhmun emaw an nihna emaw mipa aiin a hniam zâwk tihna ni hauh loin, rilru nêm leh kaihhruai awl zâwk an ni a, pasal te hnung zuia fel tak maia, mipa te tih phâk rual loa insiam rem thei an ni si a, chuvang chuan mahni pasal, sakhaw dang bia te tihdana kûn ve mai a awlsam bik dâwn a ni. Non- practicing muslims tih te hi an tam a, a hlauhawm dan a dang chuang lo. Sawi tawh anga hmangaihnaa inneih tluk chu a awm loh rualin hmangaihna vânga kan thlarau kan hralh mai zawngin chatuan nunna chang tlâk lo leh mi khawngaihthlâk ber kan ni kumkhua mai dâwn a ni. Amaherawhchu, hetah pawh hian a hnam vâng ni loin, a sakhuana vang zâwk a ni. Hnam dang, sakhuana dik, Pathian mi tak, hmangaihnaa kan tawng fuh a nih chuan a tluk a awm chuang lo. Chuvang chuan Kristian chhungkaw din tur chuan hmangaihna a ngai a, tin, chhungkuaa hmangaihna luan zawm tir zêl tur chuan Kristian chhungkaw tha tak nih a ngai ve bawk a ni.

Mi tam takin hnam dang nupui/pasala neih (interracial marriage) hi kan rinna bu, Bible-in a duhlo ni te’n an sawi fo thin a (Deut 07:03), amaherawhchu chutiangchu a ni hauh lo. Pathian hian Israel fate leh hnam dang inneih pawlh hi a haw loa, ringtu leh ringlo inneih pawlh hi a haw zâwk a ni. Lal Solomona kha a chungthu rel a nih nachhan kha hnam dang nupuia a neih teuh vang ni loin, hnam dang, Pathian nung lo bia a neih vang zâwk a nih kha. Rinna a chak tak Jentail hmeichhia, Rahabi leh Ruthi te pawh kha ringtu te chênna khawtlangah khan pawm thlap niin Isua Krista thlahtute zinga mi pawimawh tak an ni zui leh nghal a nih kha (Matt 01:05). Tirhkoh Paula’n mihring te, thim leh eng anga a sawi hran pawh khan vun rawng lam kâwk loin rinna lam zâwk a tinzâwn a ni (II Kor 06:14). Pathian hian a duh ang taka a siam theuh kan ni a, chuvangchuan hnam hian kawng a dal loa, rinna hi a ni zâwk. Tin, hnam dang, ringlo mi leh a chhungte, kutsuihpui hnua rinna kawng dika kan hruai thei a nih ngat phei chuan, chu inneihna chu malsâwmnain a khatliam ngei ang le.

Chuvangchuan a thain a tha lo e tia sawi theih a awm lo. Siamtuin a siam dânin thil thalo chu nise a inthlahpawlh theih miah loh ang le. Mahse duthusam chuan mahni hnam mi ngei neih a, hnam dangte zia, tha kan tih te chu fak liam mai loa kan fâte hnena rochun ve tum hi chu a va tha the lul êm! Amaherawhchu, hnam dang kan lo hmangaihin kutsuihpui hial pawh rem kan lo ti ta a nih pawhin kan fâte chu hnam zia leh tawng te kan nghilh tîr tur a ni loa, kan rohlu neih that ber- ‘kan hnamzia leh tawng’ te hi kan thlah chhawng zêl tur a ni, thawnthu kan neih chhun chhun te hi chhawm chhâwn zêl nachang hria ila, hnam hran leh sakhua dân hrang si, inlungrual takin a awm theih dâwn a ni, fâte khaw thlîr dân (outlook) pawh a zâu anga, dânhmang hre hnem an lo ni chho dâwn a ni. Chu chuan kan zahawmna a keng tel a ni tih hi theihnghilh loh a tha. ‘Children in interracial homes, marriage across the colour line (1965)’ ziaktu Allan C.Brownfield-a chuan inthlahpawlh hnam chhungkaw khawsakna in chu naupang tân a pawi a ni tih finfiahna engmah a awm lo, a ti a. Naupang te hian pianhpung inanlohna (physical diversity) hi mihring nihphung pangngai ve mai a ni tih hi an thanchhopui a tul, a ti bawk a; chû inzirtirna chu felfiah takin, an thinlungah vun rawng danglamna leh tawng danglamna chhan zawhna te an rawn in mûn tan atangin, tlem tê te a an rilrua tuh tur a ni, a ti bawk.

Chuvang chuan mahni theuh hi kan pawimawh a, Pathianin duhthlanna tha tak min pêk theuh hi a tha thei ang berin hman tum ila. Nupui/pasal inneih hi thil pawimawh tak, kan nunkawng chhuk-chhoa tâwpna chikhat leh intan tharna hun pawimawh tak pakhat a ni si a. Hnam dang tânga pawm tur hi chuan in chhût nawn mai niloa, a chawh a chawhchhuah fê hnuah chauh bawhzui a tha. Ringtute chuan kawng tha tak kan nei a, chu chu kan thil ruahmanna te min tihngheh saktu, chung Pathian, englaipawha râwn tur kan neih rengna hi a ni ( Thuf 16:03).

[He article/essay hi Bangalore Mizo Association buatsaih, essay inziahsiak (2007-2008)tuma lâwmman pakhatna ka lo lakpui a ni a, Bangalore Mizo Zirlai Pâwl (M.S.A. Banglalore) –ah President ka nih lai a ni nghe nghe. CHHINLUNG MAGAZINE vol XIX-ah chhuah a ni bawk. Enge i ngaih ve dan le ka unau - Samuel Lalrozâma Hmar]