Mizo: YMA DAY PUALIN CHIBAI

Zonunmawi leh tlawmngaihna hi eng nge maw a nih chiah hriatthiam a har khawp mai. Tunlai phei chuan hnam ang bika mize ṭha chungchuang chhuan tur kan neih han sawi tur a vang ta khawp mai. Nungchang mawi kan tih te hi chu, khawvel ram zawng zawngah inang vek lo mah se, hnam tinte hian an lo nei ve thluah mai; tlawmngaihna te pawh hi ram ṭhenkhatah chuan hming hran phuahin an lo nei ve an tih kha mawle.

Engpawh ni se a hnam anga nun mawi kan inzirtir chhoh leh kan nunpui chhoh zel hi Zonunmawi kan ti thei zel mai ang chu. Tam tak chuan YMA hi an sawisel a, kan tlawmngaihna te pawh hi kan dah ṭha ta a “Tlawmngai takin” tih aiah “YMA takin” tih te kan hmang ta, te kan ti ṭhin. Dikna chen pawh a awm. Amaherawhchu thil reng reng hi kawng hniha ngaihtuah a ṭul awm e. Hmanlai nun kha chu society inkungkaih ṭha tak a ni a, mi zawng zawng eizawnna an inhriatpui-a, loneimi a tam zawk an  ni a, an inhrechiang bawk a, chu vang chuan an duhzawng leh thiltih te chuan a phuarkhawm a ni ber mai. Tunlaiah chuan mahni hna thawhna leh zirna mual mualah kan ṭuan a, thiamthil a inanglo ta bawk si, chutah chuan kan khawtlang nun hi morally-a phuarkhawmtu a awm ve a ngai a ni. Mimal chauh chuan engmah a tihhlawhtlinin a phur zui zel theih si loh. Chutah chuan YMA hi min phuarkhawmtu pakhat a lo ni a, active member pawh ni lo mah ila, Young Mizo a nih vangin ṭhalai kan nih phawt chuan tel ve-ah kan inngai nghal lo thei lo;  midang pawhin an tih chu tih ve chakawm a ni ṭhin a, kan chunga an tih leh mi chunga ṭhat an chhuah kan hmuh te chu kan hmuhin bat neia inhriat vena te a awm ṭhin. Chu vang chuan YMA hi kan a hnam hlawm anga nunmawi lanchhuahtirtu pakhat a ni ve a, Zo nun chawikangtu leh ṭhalaite tihtur àwm min kawhhmuha thil ṭha ni-a langte min khaikhawmsaktu-ah ngai ta mai ila a hahdamthlak awm e. Ṭanrualna chu inpumkhatna-a a awm angin kan hnam min ti pumkhattu a ni ve a tih loh theih loh tlat.

Nungchangmawi hi kan awmna apiangah a lanchhuahtir theih a ni. Nungchang mawi hi a hun leh hmun azira inthlak thei leh keini pawh min thlak theitu a ni, Entirna’n vawiinah chuan puipun ni leh tu emaw, hmelhriat ngai loh awmkhawmna-a hruai leh chhungte bula hruai change-in thlamuang taka siam thiamna te; thil zahthlak deuh an lo sawi palh pawha chhan thiam te hi tunlai khawvel changkanna-a nunmawi lantirna a ni ve awm e. Thil ṭha tih hi a inkaichhawn theih a ni, mi chunga ṭhat kan chhuah chuan ani pawhin kan chunga ṭhat let ve a duh ṭhin, ti chuan mi pahnih aṭanga inṭanin chu thil ṭha chu midangah a darh zel thei ṭhin, ngilngeihna leh ṭhatna chhuah tur hian kan buai lutuk tur a ni lo. ‘Ka lawm e/ka tihpalh a ni’ tih ringawt te hian thu tam tak a sawi thei. Lawmthu te hi ui lo ang u, Computer age pawh ni se, tlawmngaihna hian kan nunah hmun lian tak a la chang thei a ni. Zoram pawna awm te pawhin hnam dang zinga tlawmngaihna kan lantir chuan kan Mizo hnam  chindan a ni a, han ti zauh ṭhin ila kan ram leh hnam hming hi a ṭha zawngin kan puangdarh zel a ni mai….

Eng pawh ni se YMA day chibai vek ule…

Mizo: CORRUPTION VEN DAN TUR

Aizawl 8^th Oct., 2011: October 7-a Prism Discussion Forum thukhawm chuan Mizorama corruption veng tura mawhphurtu hrang hrang kan siam fel ta.

June 10-a Prism Discussion Forum thukhawm chuan corruption chi hrang hrang list siamchhuah kan rel a. July 8 khan corruption chi hrang 166 list kan siam a. August 12 khan ‘Corruption ven dan tur’ sawihovin kan list siam tawh chu a inang dahkhawmin chi hrang 38-ah kan siam a, a ven dan tur ruahmanna thui tak kan siam nghal a. September 9, 2011 khan ‘Mizorama corruption ven nana tih tur 35’ kan siamchhuak leh a. October 7 khan Corruption ven nana tih tur kan siam tawh te a hlawhtlin theih nana hmalak dan tur kan sawiho leh a. Hemi siamchhuah nan hian mi 5,000 aia tamin ngaihdan kan thawhkhawm a ni.

Mizorama corruption a lo tlem theihnan hetiang hian hma lak a ngai kan ti:

SORKARIN-

1  RTI Section 4 a tihpuitlin a ngai a;

2 Information and Public Relations Department kalphung hi sorkar hnathawh tur puangzar zawnga a siamthat a ngai a;

3  Central Civil Services Conduct Rules te, Central Civil Services Pension Rules te

leh Medical Attendance Rules te a kenkawh a ngai a; 4 Minister leh MLA te kum tin an thilneih zat a puanzar tir a ngai a; 

5 Department zawng zawng inhman tawm tur Data bank a siam a ngai a;

6 Financial management kalphung leh system a siamthat a; sorkar hnathawk hlawh leh sorkar atanga pawisa pekchhuah zawng zawng a dawngtu tur bank account-a a transfer a, chutiang remchang lo chin pawh cheque hmanga a pek vek a ngai a;

7 Performance budget a hman a, Annual Action Plan-ah detail implementation plan a siam tel a, Quarterly Report atanga sum hmang zo lo leh hmang tha lo te Dan hmanga a hrem a ngai a;

8 Project reng reng plan anih lai atanga mipui inrawlh theiha a siam a, implementation plan a siam thlap a, hnathawh hun chhung tura ruahmana thawk zo lo te hrem theih dan tur a siamchhuah a; project lian tham deuh chu hlamchhiah mai theih loh tura khuahkhirhna a siam a; project thawhna khaw mipui remtihna tel chauha completion certificate siam theih dan tur a siamchhuah a, project monitoring leh evaluation a uar a ngai a;

9 Material Supply-ah sample nena enmil a, a zat tur dik tak chauh a dawn a ngai a, material sem chi supply-ah supplier te beneficiary kuta material a pek tir a ngai a;

10 Dan leh scheme, project etc. guidelines awareness uar zawka a kalpui a ngai a; 

11 Rules of Procedures and Conduct of Business Rules a siamthat a, Minister leh Assembly Committee ten Assembly House-a recommendation leh report an pharh te sawiho thinna tur provision a siam a ngai a. Assembly Committee te recommendation / report te mila action a lak thin a ngai a;

12 Sorkar hnathawk zawng zawng birth certificate leh dependant list a thehluh that tir vek a ngai a;

13 Hnalakah MPSC khawih tur chin siam fel a, a kenkawh a; hna lak leh entrance test zawng zawng open competition veka a kalpui a; physical test, written test leh interview mark te rang taka a tihchhuah a ngai a;

14 Aikal lak a tihtawp a, muster roll lak chungchanga Manual nei lo Department te Manual a siam sak thuai a, Manual thar siam hma chu Department zawng zawng CPWD Manual anga a kal tir a ngai a;

15 Administration kalphung leh kalhmang siamthat leh thuneihna semzai anih theih nana 2008 inthlana an election manifesto-a an tiam sa Administrative Reforms Commission a din thuai a ngai a; 

16 Sorkar hnathawk post ngaia awm rei tawh te a dah sawn a, ruihtheih thil timi sorkar hnathawk te post pawimawha a dah loh a ngai a; service zawng zawng huapa Transfer and Posting Rules a siam a, a kenkawh a ngai a;

17 Discipline a vawn a, office tinah attendance record nana punch machine a hman a, inspection leh surprise check a neih thin a; khaw inawpnaa thuneituten an khaw chhunga sorkar hnathawk te attendance an check theih dan tur a duanchhuah a, thildang ti tura office chhuahsan tur te leave la zel tura a tih a; sorkar hnathawkte hnathawh dan leh sorkar hmalakna te inspection a neih thin a ngai a;

18 Sorkar hnathawk hna thawk tha lo te manchhuah theih nana complaint mechanism tha a duanchhuah a, action a lak thin a ngai a;

19 ACR-a thudik ziah anih theih nana hma a lak a ngai a; Property Return an thehluh leh thehluh loh ACR-a ziahlan a ngai a;

20 Office/sorkar building leh store enkawl dan tur tha zawk a siamchhuah a, record fel tak a neih a, inspection a neih thin a ngai a;

21 Accomodation leh Facility entitlement a siamthat thuai a ngai a;

22 Land pass pek chungchangah Dan a ngaih pawimawh a, The Lushai Hills

District (House Sites) Act, 1953 a siamthat a, kan ram pumpui survey tura Survey of India emaw, private firm ruaia hmanhmawh taka hna a thawh a, land record fel tak a siamchhuah a, invalid leh back dated pass te a cancel a, land reform a kalpui thuai a, land record hmun khat aia tama a vawn a ngai a;

23 Bank leh financial institution te a enfiah zauh zauh a, bank account hawn chungchanga a inrawlh a ngai a; 

24 Ration card hi residential prove atana a hman loh a, a kalphung a siamthat a ngai a. Village Register a siam thuai a ngai a;

25 Dan leh kaihhruaina bawhchhiat awlsam ho leh tax lak leh pek chungchangah complaint mechanism tha a duanchhuah a, a tul anga action a lak ngam a ngai a;

26 Sorkar inrawlhna leh public money nghawng chi loan la tur selection kalhmang a siamthat a ngai a;

27 Khauh taka Mizoram Societies Registration Act leh Co-operative Societies Act leh Rules te a kenkawh a, self style NGO te a khuahkhirh a, sorkar department in anmahni hnathawktu hlang awmna, anmahni hmalakna hrula hma la tur pawl an siam thin a tihtawp a ngai a;

28 Kohhran leh NGO khawmpui lian dawna ruahman lawk loh hnathawh tur siamsak thin hi a tih tawp emaw, hetiang atan hian budget provision a siam zawk mai a ngai a;

29 Sorkar hnathawk te NGO hruaitua an tan a khap a ngai a; 30 Permit/license te a check a, diklo taka nei te leh hmang diklo te chunga action a

lak a ngai a; 31 Mi corrupt te dan hmanga hrem an nih theihnan Directorate of Prosecution a din a, kum 2008 MLA inthlan laia election manifesto-a a lo tiam tawh Vigilance Commission ang chi a siam a, Fast Track Court a din bawk a ngai a ni. 

Kohhran hrang hrang ten-

1  Dan, scheme leh project guidelines etc. te an mite an zirtir uar a, an development chanvo hauh ngam tura an mite an tihuaisen a, material sem chi an dawna a sample ang anih leh nih loh enfiah ngam tura an mite an tihhuaisen a ngai a;

2 Coruption thatloh zia leh sum thianghlim lo lakluhin mihring a tichhiat theih zia inzirtirna an uar a ngai a;

3 Khawmpui lian chi hrang hrang an neih dawn leh hunpui an hman dawna sorkar an pur loh ngam a ngai a;

4 Mi corrupt te dinhmun pawimawh an chan tir loh a, chutiang dinhmun pawimawh chang sa zinga corruption-a inhnamhnawih an lo awm aniha rawngbawlna atanga an chawlh tir ngam a, an thunun ngam a;

5. Sum thianghlim lo an hnawl ngam a ngai a ni.

POLITICAL PARTY TEN-

1 Party kalphung an siamthat a, Shadow Cabinet an neih a ngai a; 2 Dan in a phut anga an sum hmuh leh hman dan an audit tir a ngai a; 

3 MLA inthlan dawnah election manifesto rintlak leh tihhlawhtlin theih ngei an neih a ngai a;

4 Inthlanah candidate tha leh hnathawk thiam tur an neih a ngai a;

5 A hautak lo thei ang bera inthlan laia hma an lak a ngai a;

6 Sorkarna an chanin sorkar tih tur leh party tih tur chin an thliar thiam a ngai a; 7 Directorate of Prosecution te, Vigilance Commission ang chi te leh Fast Track

Court te din tura sorkar an nawr a ngai a ni.

MPF in-

1 Minister leh MLA te an thilneih zat puantir tura sorkar an nawr a ngai a;

2 Sorkar hnathawk te property return file tir tur leh property return thehlut lo te

an ACR-a ziaklang tura an nawr ngai a;

3 Chak zawka electoral reform chungchanga hma an lak a ngai a;

4 Administrative Reforms Commission te, Directorate of Prosecution te, Vigilance

Commission ang chi te leh Fast Track Court te din tura sorkar an nawr a ngai a;

5 Social Audit neih kawnga hma an lak a ngai a ni. 

NGO HRANG HRANG TEN- 

1 State level leh District level hruaitu-ah sorkar hnathawk nilo an neih a ngai a;

2 Corruption that loh zia inzirtirna an uar a, mipui sum tichingpentu leh hmasawnna hnathawh tithuanawptu an member te an thunun a ngai a;

3 Minister leh MLA te an thilneih puang tura an nawr a ngai a;

4 Sorkar hnathawk te property return file tir tur leh property return thehlut lo te

an ACR-a ziaklang tura an nawr ngai a;

5 MP leh MLA inthlanah candidate scrutiny-a an inrawlh a, election expenditures  enfiah nachang an hriat a, sorkarin an party election manifesto an bawhzui dan an thlirpui a ngai a;

6 Dan, scheme leh project guidelines etc. te an mite an zirtir uar a, an development chanvo hauh ngam tura an mite an tihuaisen a, material sem chi an dawna a sample ang anih leh nih loh enfiah ngam tura an mite an tihhuaisen a ngai a;

7 An khawmpui dawna mipui sum tihek zawng leh mipui sum leh hmasawnna hnathawh pawhpenna tura hma an lak loh a, sorkar motor leh material an hman loh ngam a ngai a;

8 Sorkar din committee hrang hranga an tel tlem ngam a ngai a;

9 Sorkar atanga contract ilo leh therhlo an dil tam loh a, an hruaitu zinga pawl

hminga chutiang ti an awm pawha action an lak a ngai a;

10 Sorkar hmalakna an enfiah a, thildiklo awm an dodal ngam a ngai a; 

11 Social Audit an uar a ngai a;

12 Administrative Reforms Commission te, Directorate of Prosecution te, Vigilance

Commission ang chi te leh Fast Track Court te din tura sorkar an nawr a ngai a ni.

MIPUI NAWLPUIIN-

1 Sorkar kalphung leh hmalakna tur kan ngaihven a ngai a,

2 Administrative Reforms Commission te, Directorate of Prosecution te, Vigilance

Commission ang chi te leh Fast Track Court te din tura sorkar kan nawr a ngai a;

3 Kan khua/venga sorkar hmalakna awm te a hmuna tlawh a, hna an thawh dik leh dik loh enfiah fo leh, sorkar atanga thil kan dawn te quality leh quantity enfiah te hi kan bat a nih avanga kan tih thin a ngai a,

4 Hmasawnna hna thawhnaa thil diklo a awma thuneitu hrilh hriat hi kan bat a nih avangin kan tih a ngai a,

5 Sorkar hnathawk zinga hna thawk tha duh lo an awmin thuneitu hnena hrilh hriat hi kan bat a nih avangin kan tih a ngai a,

6 Sorkar leh a hnathawk ten thil diklo an tih palh a kan bengchhen thiam a ngai a,

7 Kan dikna chanvo humhalh tura mahni pawha hma kan lak ngam a, tangruala

hma kan lak thiam a ngai a ni. Heng thil te bawhzui nan hian Prism chuan heng mawhphur tura ruahman hrang

hrang te hi an mawhphurhna an hlen theihnan kan dawr zui dawn a. Priority List siam chhuakin tihhlawhtlin anih theih nana bawhzui turin thawhpui tur kan zawng chho dawn a. A tuipui apiang pawl leh mimal pawh hmalak pui atan Prism chuan kan sawm a.

October 27, 2011 khian 3^rd Anti Corruption Convention buatsaih a ni ang a. Convention-ah hian hmalak dan tur rel ho leh tur a ni dawn a ni.

(Source: MyPrism fb group documents)

https://www.facebook.com/groups/myprism/