.jpg)
Tunlai chu YMA leh =KP-in Zonunmawi an buaipuia, pâwl leh Kohhran hrang hrang lenna Mizo Moral Reformation Network International, zonunmawi tun din tumin Kumin March ni 2 khan Rev. K. Lungmuana hovin an din bawka. Heng hma pawh hian thu leh hla lamah “Zonunmawi” tih hian hmun a chang tam hle bawk a ni. He’ng zawng zawng hian Zoram Khawtlâng nun siam \hat mite thinlunga a len zia a tilang a ni. Zofâte kan insingsa mêka, hnuhmâ leh tawnhriat kan la nei tlem bawk si, kan mithiam ngaihtuahna nei pha chinte chuan kan dai pelh anga, tunlai “tunlaina” hi kan kulchopui ang tih hi an hlau hle a ni. Ni e, kawng dang dangah hmâ sâwn mah ila, kan nun (moral) ber a chhiat chuan hnam boralna a hla hauh loang.
Zonunmawi chu engemaw ni le? : Zonunmawi tih hian tlawmngaihna hi a langsâr ber mai awm e. Amaherawhchu tlawmngaihna ai mahin a huap zaua, hmân lai pî leh pûte nun dân ze mawi zawng zawng leh tun lai thlenga mite’n an la chhawm, ze mawi leh \hate hi zonunmawi kan tih chu a ni ber maiin a lang. Mizo hnam ziaah chuan rinawmna, aia upate zahna, mite tanpui, mi dangte’n malsawmna an dawn theihna tura mahni inphat, thil phal leh inngaihtlâwmnate ngaihsânna a lian êm êm \hin a ni.
Zonunmawi lo ve thung hi: “Zonunmawi” tih hian a châng chuan ka îp deuh hlek \hin. Zo nun hrim hrim hi mâwi tak vek niawm taka “Zonunmawi” han tih hi chu hnam dang tân phei chuan, “Vei taka” tih mai a awl awm e. Kan hnam hi hmangaih ila, Mizo nih hi lungawipui ila, mahse kan hmasâwn zêlna atân kan chak lohna lâite hi chu hmuh hmaih chuang lo ila a va \ha dâwn em. Corruption leh hlemhlêtna dangte, sualna chi hrang - hrang ruk ruk, pawngsual, ruih hlo ngaih leh zawrhte, intihbingnate, sawrkar leh Khawtlang thil neih kan suasam thin dante han en hi chuan kan Zonunmawi hi chu hmânlai thil emaw ngaihruatna emaw a ang rum rum mai. Chuvangin zonunmawi tih hian Mizo nun hi a mawi bîk em em tihna ai mahin zo nuna a mawi lai chauh kha “zonunmawi” chu a ni mai.
Pipute leh Zonunmawi: Hnam tin hian past glory neiin kan inhre \heuha, chu chu kan idealized a tundin leh kan duh \hin. Hindu-hoin Vedic Age an ti châmchî ang hian keini pawhin pîpûte nun kha zonunmawi hian tuam fel ât main kan ngai \hin. Mahse tunlai nun nge \ha zawk hmânlai nun ti ta ila tawp thei lo khawpa \an fung vawn tur a khawi lam lam tân pawh a awm ang. Taitesenate, Vanapate kha an langsar em maia an zârah pîpûte nun kha mawi takin a thang ni ve bawkin a lang. Anni ang kha sawi tur an tam loa, mi zawng zawng lah an tlawmngai hek lo. Serhmun Lalin a khuate tlawmngaihna fiah a tum lai khan zan laia ruah sur hnuaia zualko tur an Upa a zawntira; Zawlbuka riak tlangvâlte zingah Taitesena chiah a inpêk thu kan hria.
Zonunmawi Tun lai atan: Pipute zemawi leh \ha tam tak chhawm nun zêl tlâk a awm. Mahse chhawm zel theih loh chin a la awm dawn thoa engtin nge ni zel ang. Hnam zemawi tam tak hi chu culture a nih avangin a danglam theia, hmâna mawi kha a mawi reng kher lovang. Mahse chhûngril mawina hi chu culture a ni loa mimal nunah zung a kaiha hnamtinin an neih theih a ni. Chungte chu rinawmna, dikna, thil phalna, taimakna angte hi an ni. Hman lai angin a upa apiang thu ngaihchan ringawt a theih tawh loa, hruaitu (leader) thuneihna a lal zawk a ngai. Mahse eng ang khawvelah pawh upate zah thiam leh duat thiam a la pawimawh reng. Hnatlâng – e.g. hmeithai in sak, kâng \helh, lei min thenfai, etc. pawh hi Zonunmawi chi khat a ni. Ram changkângte anga, system fel leh \ha kan neih ve hunah chuan a ngai tawh loang. Kan la tilui zel a nih phei chuan inkhap a \ul zâwk ang.
Rawtnate:
- Zonunmawi hi a lunglên thlâk zâwnga thlûka hnung lam hawi kîrna tur chi a ni loang. Vuak vul leh hi hmanlainaa let leh thilah ngai lo ila, kan Pîpûte nun kha mawi famkim bik em ema ngaih tur pawh a ni loang.
- Zonunmawi hi hnam zia anga kalpui tum hian a hlawhtling ber loang tih hria ila, chhungril nun dik leh mawina hi hnam dinchhuahna atân a pawimawh a ni tih hriata inzirtir hi a tawk.
- Zonunmawi hi Mizote tan chauha nun mawi ni mai loin khawvel mi zawng zawngte tan pawha mawi a ni tur a ni.
Ka duhthusam zonunmawi chu Mizo Pîpûte tihdân mawi piah lama chhungril mawina, Zo lo tân pawha mawi tho hi a ni. Mizo tihdan mawi hrim hrimte erawh chuan ka lung an tilênga, a rem apiang chhawm a \ha ka ti. Mahse hei erawh hria ila Zonunmawi famkimna tur chu pîpû nunah niloin Krista nun mawinaah a ni e.
(A ni the tak e, ‘Zonunmawi’ tih hian ‘hmânlai nun’ emaw kan ti \hin, a bîk takin naupang lehzual keini ang te’n. Min rawn sawifiah sak hi a ziaktu (Rev. Lalthlamuana) chungah kan lâwm hle a ni. A ni hi DTh zirlai a ni a, UTC, Bangalore-ah tunah an chhungin Bangalore-ah an awm a ni. Bangalore Mizo Weekly Newspaper: BMA AW-a editor ka nih lai (Vol. XV Issue No. 25; Sept 20, 2009)-a ka chhuah a ni.Chutih hunlai chuan Guest Lecturer a ni amah hi.
He thuziaka kan hmuh ang hian Zonunmawi dik tak leh chû nunmawi dik tak tihlanna kawng chu Krista neih hi a ni tih hi keini phaia awmte hian hre thar leh ila a va \ha em vawiinah hian; kan \hiante, he thuziak chhiar ve lo te pawh hrilh darh ila; an \henawm hnam dang te nen kan in kawmnaah leh midang mithmuhah Zonunmawi hi pâr ang vul zel rawh se.-Samuel Lalrozama Hmar)
