Welcome to my dreams

CHIBAI

Thanks for visiting my page. Most of the writings are in Mizo (Lusei/Lushai/Duhlian) [a native language of Mizoram], but there are also some english postings written by me and my good friends. I do hope that they are of some value to you in your daily journey of life. You can check out all the writings from this link:

Contents (Thuziak awmte)

The postings are categorized into five labels, which can be seen at the end of each posting. If you want to get a view of all the postings labelled under that category, you can do so by clicking it at the particular label name. The labels are:

# English Articles
# Mizo thuziak (Lusei Articles)
#Other Language Articles ((Hindi/ Bengali/ Mizo: Hmar/Paite/ Kuki/ Lai/ Mara)
#Informative (Hriat Zauna)
#Mind Bogglers (Ngaihtuah peih te tan)
#Songs (Hla)/ Poems (Chang)/ Quotations (Thusawi)/ Skit

Ka page-a i rawn len luh ve avangin ka lâwm e; sâp awng leh mizo awnga kei leh ka thiante thuziak bakah thil tangkai tur nia ka hriat te ka târ chhuak ve nual a, midangte tâna thil hlâwkthlak tak a nih hi ka thil duh leh thlahlel ber a ni. Thuziakte chu he link aang hian i en thei ang:

Contents (Thuziak awmte)


Kan ram leh hnam tluchhe mêk hi ka vei ber mai a ni a. Politician tha leh fel te chu an awm nual ang, mahse kan political system hi a corrrupt tawh a, mi pahnih khat thatin awmzia a awm lo, a system tawp hi thlak a ngai a ni. halai, ram leh hnam hmangaih tak tak te hi infawmkhawma bloodless revolution siam a hun ta. Kawng lehlamah kan politician te hi dem ngawt theih pawh an ni lo... Ram leh hnam hi hmangaih hi a ul a, i lo hmangaih ve a nih chuan an dinhmuna ding thei turin i inpeih em ka unau?? I ramin a ko che... Ram hruaitute puih theihnaah puih an ngai, puih theihloh chinah tih tur neia kan inhriat chuan ti ang u...

Pu Keivom pawhin tihian a sawi hial a: Ram le hnam ta dinga tu am a na martar chang: lu latu am a lu lak? Pawlitiks khawvela chu, voisuna chawimawia um kha a zingah khaihlumin a um thei a, voisuna tuolthattu Barabbas kha suolna nei lo Isu aiin insuo a ni daih thei bok. Voisuna “hossana’ tia lawm luttu rawl kha a tukah ‘Kraws-ah hemde rawh’ tiin a’n thlak thut thei. Voisuna martar chang kha a tukah tuolthattua puong a ni thei. Voisuna hel hmang le tuolthattua ngai kha a zingah zalenna suolsuoktu, hnampa a hung ni thei bok. Chu ngirhmun tar langna, Robert Browning hla phuok, College kan kai laia kan inchuk ‘The Patriot’ châng tawpna tlar hmasa tak “Thus I entered and thus I go!” ti lai tak khah kha ka zuk hriet suok vang vang chu tie! Ngaituo a suksei ngei.

Ram leh hnam tân enge tih theih i neih ??
[Zoram/Zogam ( not only Mizoram, but a 'Greater Mizoram', the land of the Zos, Zofate chenna ram zawng zawng) thar i siam ang aw...

Zofa - Doesn't matter if you are a resident of Mizoram or if you are a half-blood, as long as a drop of Zo blood flows through your veins... you are my brothers and sisters...

"Lung lungrual zain aw,
Ram kanhnam duhdaw in maw?
Tlangkhatin tlangdang thliar dan lo;
Hnamkhat le hnamkhat cawimawi in,
Zo nunmawi lungrual tein,
Sumtual run rem tlang uh si.
"


Mizoram mi ni loin thlahpawlh pawh ni la... Zothisenin a bual chhung che chuan thlahtu thuhmun kan ni e ka unau..

Zofate hi kan inzarpharh zau ve tawh a, Khawthlang ram changkang deuh zawka awm te phei hi chuan min rawn la hre ve thin angem aw ka ti fo thin. Mahse khawiah pawh awmin enganga mi hlawhtling niin kan ram leh hnam hi ngai loin inhre mah ila kan thisen zunzamah Zothisen a luang tlat si avangin tunge kan nih hi i theihnghilh lo ang u.

"Aw i pianna zolei gam, Etlawm sa'ng e,

Aw a etlawmsa zuun lai leng;

Paakbang in hong lun diing a, Tul lou diing hi,

Aw a etlawmsate giabang zuun lai ni."

Ram tana martyr te hming a dai tawh dawn si lo a, hangtharte chakna petu an ni zawk ang.


"Ram le hnam ta dinga mi tlawmngai hai le
Hringna chen lo inhlantuhai leiin,
Ei hnamin par ang vul ni la nei ngei a ta,
An sakhming thangthar lai mawi zuol a tih.
"

A tawp ber atan, kan rinna tifamkimtu, chung Pathian nung pakhat dik tak kan neih hi hre rengin kan nitin (minute tin) hun i hmang hin ang u. Sualna kan nei theuh e; mahse hat tum mi chuan hma a sawn a ni tih hre thar leh bawk ila.

"Engtiknge Sappui nun ngai lo rengin,
ka nghakhlel, kan lenna hun tur chu...."

Samuel Lalrozama Hmar (Sammy)

s/o Dr.Thangchungnunga

sammywalker@rediffmail.com

sammylrza@gmail.com

ace_of_samz@yahoo.co.in

Mob: +91-9886447684

+91-9612732554


Sunday, May 23, 2010

Mizo: INTIHSIAKNA THA chu bei rawh


He khawvelah hian a tlêm berah mihring zâtve vel hi chu sikul la kal ngai miahlo hi kan awm awm love. Zirlai kan niha sikul kan kal chuan kan intihsiakna larber leh pawimawh ber chu Exam hi a ni awm e. Chu Exam chu zirlaite nunah thil pawimawh ber, kan zirlaite mutmawh hnar mawha min neih tir tu a ni a, a tello chuan sikul hian awmzia a nei tlem thin khawp mai.

Heti khawpa intihsiakna pawimawh bei tur hian huaisenna a pawimawh hle a, mi thenkhat chuan hlawhtlin loh hlauin ‘Fair lo’ tak takin thil an ti vel thin a. Tin, chu mai pawh a la ni lo cheu, zirtirtu thenkhat zingah pawh mahni naupangte/zirlaite, an tih thatloh hlauh luat vanga Exam Question lo rawlruk duh mai pawh an awm nual mai. He thil hi School Level atanga khi tah College/University thleng pawhin sawi tur a awm nual mai. Hetiang anga thil diklo, zirlaite hmakhua leh rilru tichhe vek thei khawpa thil pawi hi mi ram mai ni lo, kan ram, Mizoram-ah ngei pawh sawi tur a tam ta mai. Kei ngei pawh hian hetiang ang thil diklo hi ka hmu/tawng ve nual tawh a, diklo taka miin dinhmun tha an changlai mahni mit ngeia han hmuh chuan rilru a na duh khawp mai. He Article chhiartu zinga mi tamtak pawhin hetiang mi hi in hriat ve nual chu ka ring, mahse han inchhut neuh neuh ula, in rilru ah hetiang mi ngaihsanna leh zahna hi in nei em?

Mahse, tuna zirlai ni mekte leh zirlai la ni leh zêl turte tân pawha hriatreng tura ka duh chu, hetiang ang thil diklo titu te hi kan chhui chian chuan mi awhawm takah hian an chhuak ngai meuh lova, tin, diklo taka Pass chhuak an nih ang ngeiin an hnathawhnaah pawh mi chhuanawm tak leh hna thiam tak an ni ngai meuh lo. Chuvangin, mahni zirlaite kan phak ang tawka thiam tura inzir tur leh diktak leh huaisen taka thil ti thin turin tuna zirlaite leh zir leh zel turte pawh ka chah nghal a ni. Kan Pathian thu pawhin chutiang ang taka awm tur chuan min ti a, kan phak ang tawka kan tih chuan min tanpui hi a hnial lo tih hi i hre reng bawk ang u. Sâp ho pawhin, “God helps those who help themselves” an lo tih thin kha.

Kan zavaia kan tan tlana kan hmaa tih tur awm ang angah te pawh Mizoram a ni emaw, ram pâwn lam a ni emaw, dik lo taka thil tih ai chuan kan hma a thil awmte i tawn ngam zawk ang u, chu chu mi huaisen diktak te tihtur awm reng pawh a ni e. Kan Pathian thu chuan, “Mi thenkhat sual chu a langsar a, an tuar nghal bawk thin, thenkhat erawh chu a lang lawk lêm lo a. Chutiang bawkin thil tha tih lang nghal a awm a, lang nghal rihlo mah se thup hlen theih a ni lo” (I Tim. 5:24-25) tiin min lo hrilh a, thil diklo kan tih ngam chuan a let leh lam pawh kan tuar ngam tur a ni.

A tawp berah chuan he thu hi i hrereng ang u, “Nimahsela nang, Pathian mi, chung thilte chu tlansan la,…………..Rinna intihsiakna tha chu bei la, chatuan nunna chu vuan rawh;” (I Tim. 6:11-12). Tuna zirlai duhtakte leh zir leh zel turte, rinawm tak leh taima taka ‘INTIHSIAKNA THA’ bei turin duhsakna sang ber ka hlân e.


[He thuziak tha tak mai ka thian tha tak LALHRUAITLUANGA HMAR (Vala) ziah a ni a, Bangalore mizo Zirlai pawl a President ka nih laia kan website a ziak tura kan ngenna anga a rawn tihhlawhtlin a ni. Hetih lai (27th April 2007) hian amah hi Teacher, St. Paul’s Higher Secondary School, Aizawl, Mizoram-a a nih lai a ni. Intihsiakna tha chu bei turin tun darkar atang hian inpuahchah rawh le ka unau - Samuel Lalrozâma Hmar]

Mizo: INFORMATION TECHNOLOGY Kailawn


Fig.IT hnathawkte kailawn.

Thuhmahruai:
Tunlai khawvel a hmasawnna thlentu pawimawh ber chu Information Technology (IT) hi a ni a. IT a hmasawnna avangin in khawvel lehlam daih ami nen pawh hmun khat a khawsa ho ang maiin hna kan thawk ho thei tawh a. Hei avang hian mitin mai hian a tangkaina hriain inbiakpawhnan, intihhlimnan leh hlawk zawka sumdawnna’n te kan lo hmang duh ta vek mai. Hei hian IT thiamte duhthawhna a ti sang hle a. Tunlai khawvel in sumdawn tawnna ah globalization thli in min nuai mek a. Khawvel a IT company lian deuh deuh te chuan sum tam thei ber lakluh leh senso tlem thei ang ber an tum theuh avangin senso tlem theihna hmun ram rethei deuh zawk ah awmhmun an khuar nghet sauh sauh bawk a. Tunhma deuh chuan India IT company lian TCS, Infosys, Wipro leh HCL company-te hian khawthlang lama sumdawng lian te nen IT service contract siamin khawthlang IT company-te rate aia tlawm zawkin hna an thawh sak thin. Tunah chuan khawthlang IT company-te (IBM, Accenture, HP, EDS, CSC, Cap Gemini, etc) chuan India ramah ngei awmhmun rawn khuarin India tualchher IT company-te nen India rama IT thiamte an inchuh ta a nih chu.

Tuna NASSCOM (National Association of Software & Services Companies) chhut danin, kum 2010 ah chuan India hian IT Engineer nuai nga velin a indaih loving a ti. He thu hi tuna IT zir tum leh IT zir mek tan thu lawmawm tak, beiseina sang tak min petu a ni ngei mai. Amaherawhchu, heng IT company te hi hnathawka chhawr tur an lak danah an fimkhur hle a. World standard a hnathawk tlaka an ngaih loh chu an la duh chuang miah lo. Vanduaithlak takin, world standard a hnathawk nghal theih tur khawpa thiamna nei tha tawk hi India rama kan education system leh curriculum te hian an thar chhuak tlem hle a. NASSCOM in a experience atanga a hmuhchhuah chu India rama Engineer zir chhuak 25% chauh hi world standard a hnathawk a chhawr tlak, zirna peng dang chu 10-15% chauh hi world standard a hnathawk a chhawr tlak an ni. September 2007 khan CSC campus recruitment chu Bangalore a Engineering zirna tha pawl ni a sawi BIT ah kan va nei a. Mi 120 in written test an exam a, mi 10 chauh interview a koh theih turin an tling a. Interview kan zawh fel meuh chuan mi 2 chauh hna pek theih tur an awm a ni. Chutih lain CSC chuan engineer hnaruak za chuang fe a nei bawk si, kan target kan hmu zo dawn lo tih a chiang hle.

IT hnathawh chi hrang hrang-te:

IT service hna hi a tlangpuiin customer-te sumdawnna a zirin division leh service line hrang hrangah then a ni a. Entirna: banking & financial services, telecom, airlines, manufacturing, oil & energy, transport, logistics, public sector, health care, defense, media, animation, education, etc. Heng sumdawnna peng hrang hranga thawk-te hian tih tur leh tih theih chin (roles and responsibilities) neiin hna an insem a. IT services a hna chelh tlangpuite chu:

Software Engineer: Software Engineer hi computer code ziaktu a ni. Company thenkhatah chuan “Developer” emaw “Project Associate” tih te pawhin an ko bawk. He hna hi IT a hnathawk tam ber ten bul an tanna a ni a. An hnathawh a zirin “Programmer” tih te pawhin an ko bawk.
Thiamna: Industry / service line azirin software engineer thiamna mamawh hi inang vek lem lova. Banking leh financial services lama thawk chuan Java leh .Net technology hi an hmang deuh ber a, animation leh entertainment service lama thawk erawh chuan Flash leh Maya technology an hmang tam hle thung. College zawh velah emaw final year zir laia hna hmuh nghal duh chuan achunga computer language leh hmanrua thiam bik neih mai bakah formal education a BE, MCA, MSc (computer) result tha tak neih a ngai thin.

System Analyst / Architect: System Analyst hian computer coding a khawih tawh meuh lova. Computer system ruhrel chhui chiangin, chak zawk leh rem hre zawk a thawhtir dan tur a ngaihtuah a thin.
Thiamna: System Analyst hna thawk tur hian programming kum 5 vel tal hlawhtling taka lo thawk tawh leh project hrang hrang a experience lo nei tawh nih a ngai.

Business Analyst: BA hian customer-te kawm kualin, an hnathawh dan te enthlithlai in, customer-te mamawh zawn chhuah sak a, programmer ten an hriatthiam theih tura software specification siam hi a hna a ni.
Thiamna: Business Analyst hna thawk tur hian modeling language UML leh hmanrua MS Visio hman thiam hi a tangkai a. Formal education lamah chuan MBA leh CA atang hian luh a awl bik a. Tunhma a project experience avanga sumdawnna hnathawh dan hriatna neitha tan pawh thawh theih bawk a ni

Tester: Software testing hi quality control hna pawimawh tak a ni. Programmer in a ziah tawh sa software chu a thawh tur ang a thawh theih dawn leh dawn loh Tester hian test cases hrang hrang hmangin a lo enchhin thin a ni.
Thiamna: Professional tester ni tur hian programming language hriat a ngai ve lova. Software testing thiamna bik erawh neih a tul thung. Formal education chu programmer ang thovin a tul a. Software in a tihtur diktak a tih leh tih loh enchhin bakah, thil kal sual theih dan tur thlir lawk thiam a tul bawk.

Project Lead: PL hian project team enkawlin, duanlawk anga, a hun taka project zawh hman a nih theih nan leh software product quality tha tak project team in a siam chhuah theih nan project mamawh hrang hrang a vil reng thin.
Thiamna: Project Lead hi programmer senior project management lama experience nei tawh emaw management graduate hetiang lama specialized te an thawh tir thin.

Project Manager:
PM hian PL hna a enpui bakah project pakhat ai tam a enkawl thin. Project mamawh a sum sen ngai a awmin phalna pek chungchangah thuneihna sang tak a nei a. IT project tan dawnin ruahmanna fel tak lo siam hmasa tu a ni.
Thiamna: Project Manager hna thawk tur hian kum 10 vel tal project lo enkawl tawh thin leh PMP certification nei an hmang thin.

Database Administrator:
Database Administrator chuan computer database hman danah remhre zawk leh chak zawka hnathawh tir dan zawngin, khawlthluak hman tur zat leh table len zawng tur te a duang chhuak in a enkawl thin bawk.
Thiamna: Database Administrator atan hian database professional certification (Microsoft CDBA, Oracle DBA) nei leh formal education lama bachelors degree result tha tak nei an en thin.

Network Administrator: Network Administrator chuan computer tamtak inthlunzawma an thawhtur theuh fel tak leh him taka an thawh theih nan an vil thin. Computer hardware nal taka hriat mai bakah network security tibuai thei chi laka invendan an hriat a tul a ni.
Thiamna: Network Administrator atan hian network professional certification (Microsoft CNP emaw Cisco CNP) nei leh formal education lama bachelors degree result tha tak nei an en thin.

IT eizawnna a zuan luh tan dan:

College zawh huna IT eizawnna a zuang lut nghal duh tana thurawn thenkhat:
1. Bachelor degree course a Engineering zir tan a awlsam bik. Engineering i zir loh chuan Mathematics emaw Computer subject lak tel a tha.
2. Problem solving skill hi written test ah telh ngei ngei a ni thin. Class X leh XII level a Mathemetics kha college i zir lai pawhin theihnghilh loh tur a ni; i hna zawnna kawng engkimah a tanpui ang che.
3. Comprehension skill hi an test thin bawk. English a thil ziak article emaw case study atanga zawhna chhang thiam turin, nitin English thuziak hrethiamna tha tak leh speed chak taka chhiar thin a pawimawh.
4. Inter personal skill hi IT hna petute chuan an ngaipawimawh hle bawk. Candidate chu midang nen an thawkho tha thei dawn em tih an enna ber a ni. Mahni inring tawk taka, mahni hriat ang, alo ngaithltuten fiah taka a hriatthiam theih tura sawi theih hi a pawimawh hle. Hetiang skill test nan hian group discussion leh personal interview an buatsaih tlangpui. College zirlai a extra-curricular activities hmangin hetiang skill hi a inzir theih a. A theih ang anga tel ve thin a tha.
5. Computer skill emaw programming language pakhat tal hnehsawh taka thiam a tangkai bawk. Computer skill hi Computer course zirlai / zirchhuak candidate an test chuan an telh ziah.
6. College ah IT company ten campus placement an rawn neih hunah lo tel ve ngei tur a ni. Circuit stream (Computer, electrical, electronics, Telecom) zir lo tan pawh Non-Circuit stream (Civil, Mechanical, Mathematics, etc) tan a hranpa in test an buatsaih thin.
7. I zirna college ah IT company ten campus placement an rawn neih loh pawhin, i zirlai i zir zawh hunah entry level jobs tam tak a awm a, job site ah te i CV dah chhuak la. Tin, i hna dil tum lama skill tul kha lo thiam lawk bawk la. Hun reilote chhungin interview tura kohna i dawng thuai ang.

A tlangkawmna:
IT company-te target enin India ramah chuan IT hna hi a la tam dawn chauh a. Eizawnnan a hmang duh chuan tih-tak-tak-na nen world standard a thiamna neih tuma a beih phawt chuan IT hna chu hmuh a harsa dawn lova. Amaherawhchu, titha peih lova, tuina tak tak nei lem lova miten a tha an ti avanga thawh ve tum ringawt chi a ni lo. Hna thawh tak tak a lo tul hunah chuan quality sang leh deadline pressure natak hnuaia thawh a tul chang a awm thin a, tuina neilo tan chuan inchhirawm tak a ni thei bawk. IT eizawnnan a hmang tak tak duh tan Mizoram chhung chauh a hnathawh beisei chi a ni lo, India ram leh khawvel zau zawk thleng pawhin IT project a hnathawhna kawng a in hawng a. Mizo thalaite zingah mi taima leh IT a tuimi, a tawp thlenga luh chilh duhmi an awm nual tawh a. IT lama tuimi leh eizawna nana hman tumte chuan theihtawp chhuahin khawvel khawiah pawh hman tlak khawp thiamna nei turin lo bei zel rawh u.

[He thuziak tha tak mai hi pu JOSHUA LALREMPUIA'n (Senior Consultant, CSC)Bangalore Mizo Zirlai Pawl President ka nih laia (2007-2008) kan sawmna anga seminar paper min rawn present sak a ni a, IT lama tui mi te tana hlawkpui tham thil a nih ngei ka beisei - Samuel Lalrozama Hmar.]

Mizo: MIZO KA NI ka intihtheih zia kha chu aw!!!!


Kum nga liamtaah khân ka thawhna, ‘World Vision’ office-in Workshop (“Children in crisis Workshop” Delhi), naupang tanpui ngâi te tanpuitu pâwl hrang hrang te ko khâwmin kan huaihawt a. World Vision India-in naupangte tân enge an tih, tih te an share a; chuan organization hrang hrang hruaitute’n naupangte tâna an thawh chhan leh an thawh mêk dân chanchin te an sawi hlawm a. Tah chuan, Mr. Amod K. Kanth, Delhi Police officer, a lo ding chhuak a, a organization chanchin leh a bul tan dan a rawn sawi ta a, “Mizoram-ah Police officer in kum engngemaw chen ka awm a, ka awm chhûng zawngin Mizote’n an mahni theihnghilh a, midang an tanpui nasatzia ka hmuhin min hneh em em a, tichuan, ka term a tawp hnuah Delhi-ah min rawn transfer leh a, Delhi ka thlen hnu lawkin Jehangirpuri, Delhi ah slum (mirethei awmna) a kang ta chiam mai a (1998), tah chuan Mizote mi an tanpui thin dan hre rengin emergency relief ka bei tan ta a, tichuan organization PRAYAS (A registered National Level Voluntary Organisation) hi ka lo din chhuak ta a ni (officially inaugurated in 2000),” a ti a. He hna hi naupang 25 lek atanga tanin tunah chuan naupang 50,000 chuang an tanpui a, centre 17, Delhi-ah neiin, Gujarat, Assam, Bihar leh Nicobar Island thlengin Prayas hi an thawk tawh a ni.

Sawrkar officer a ni bawk nên, Deptt. of Elementary Education & Literacy, Ministry of HRD, Govt. of India in a sponsor ta nghe nghe a. An centre tam zawk chu ka tlawh ve tawh a, naupang case nei (criminal children) te dahna shelter home te (Prayas institute of Juvenile Justice), vocational courses chi hrang hrang te, neiin tunah chuan changtlung takin, thawktu tam tak neiin, mi dangte tân a thawk a ni.

He PRAYAS lo chhuahna bul hi MIZO kan ni tlat mai!!!!! Khami nia a thusawi zo, Mizo ka ni ka intihtheih zia kha chu, ka han hawi kuâl vel a, mizo dang tumah an awm ve siloa. Rilru chhungril chu a nuam vang vang mai. Kan ramah thu pawh sawi miah loin, kan nunin pa tha êm êm leh mi tangkai kha mi tam tak tana malsawmna ni turin kan lo chher chhuak der mai. Tuna phai rama kan awmna theuhah hian kan awmna hmun a mi te’n hmân a Mr. Amod Kanth a’n a hmuh ang khân min hmu ve em? Kan chheh vela naupang leh tanpui ngai ngawih ngawih te, hnam dang ho ang hian kan en liam ve mai mai em ni? Lal Isua ka neih hi eng hunah nge ka tihlan ve thin?

ISUA KHÂN A KALNA APIANGAH TANPUI NGAI, EITUR NEI LO leh DAMLO a tlânbo san ngai lo. Kan nîtin kal pelh mai mai thin te hmang hian Isua kan hnenah a inpuang duh mai thei asin. Mother Teresa paw’n a kalpêl mai mai lo a, chuvang chuan khawvel pum ngaihsan a thleng phâk asin. Ngaihtuah zui zel ila, a taka mirethei te kan tanpui hi Vânramah Lalpa’n ro a rel huna tehfung tur a ni si a (Matthew 25:31-46).

[Article tawi tha tak min ziahsaktu hi ka nî(Aunty), Pi LALNUNMAWII, World Vision India, Delhi Child Restoration Project, Delhi-a a thawk a ni a,Bangalore mizo Weekly official newspaper BMA AW (Vol. XV Issue No. 20. Dated: Aug 16, 2009)-a Editor ka nih laia ka chhuah a ni. An chhungkuain Delhi-ah an chêng. He Vision target group chu – street children Delhi – naupang kum tlinglo hnathawkte; nawhchizuar fâte; bawlhhlawh chhara hralh leh thinte(rag pickers); naupang kutdawh te; naupang, naupang an nihna ang nilo a awm te chhanchhuah leh tanpui a ni. A tam zawk chuan drugs an ti leh nghal! An hna hi a hautakin a challenging em em a, tawngtaipui an ngai hle a ni.

Tin, kan chênna theuhah, ‘keimahni vângin Mizo hming hi a tha ve angem,’ tih ngaihtuah zui bawk ila. – Samuel Lalrozâma Hmar]

Mizo: ZIRLAITE tâna kalhmang thenkhat :


Ve mai mai:
1. ‘Aih’ tih hi zir rawh: A nazawnga movies, party leh hlimhlawpna thenkhata kal hnial hian mi rualpâwl lo takah a chhuah lo ang che. Hnial hreh suh.

2. Vawikhatah darkar 3 aia tam lehkha chhiar suh: Thluak insawizawina hun pêk a tul. ‘30-3-2 rule’ hi lo hmang ve chhin teh, minute 30 zir la, min 3 chawl la [hemi chhung hian lehkha chhiar lam (comics, novel) tilo hram rawh], chuan minute 2 chhung i lo zir hnu chu ennawnna’n i hmang leh dawn nia.

3.Khaw en laiin lehkha zir ching rawh: Zân lama zir mi kan awm rual rualin ni êng (natural light) hi zirna tâna tha zawk a ni tih mithiamte’n an chhut chhuak tlat mai.

GROUP STUDY tangkaina te (lo try ve teh u):

1.Lehkhazir phûrna leh chakna thar (tanpuitu neia inhriatna te nen) a siam thei.
2.Mal riaua inhriatna a hnâwl.
3.Midang hnena thil sawifiah hian kan thil hriatte a tinghet.
4.Kan thil hriatte kan sawiho hian a ngaithlatu tân leh a sawitu tân hriatthiamna a tizual.
5.Midang hnen atangin lehkha zir dan thar tha zawk kan hmu chhuak thei.
6.Zir peihlo viau e tilo chuan midang nêna han zir ho chiah chuan zir tuina thar a chawk chhuak thei, hnufual bîk nih kan hlau miau a.
7.Class-ah chuan zawhna te huai takin kan zâwt ngam lo a ni maithei e, amaherawhchu chutiang chu a ni lo thiante nêna zir ho chuan.
8.A huhova zir hi kan zir hnu leh thiamsa te ennawnna hun tha tak a ni.

Lehkha chhiar dâwnin hengte hi hriat a tha
:
1.Bengchheng leh buai luai luai awm loh laiin chhiar thin rawh.
2.I dawhkan leh zirna bul vel ti fel fai rawh.
3.Hmun ngai hlîra chhiar zir rawh.
4.Êng tha tak hnuaih chhiar thin rawh.
5.Nuamsa (maintain a correct posture)takin thu rawh.
6.I mamawh tur thil engkim la khawm sa rawh, a hnua vei vei ngai lo turin.
7.A ri a chhiar hian hriatna a ti nghet duh bik, bengin a lo register ve zel bawk a.
8.Assignment thenkhat, entirnan maths emaw, science emaw, accounts emaw lam chi tih dâwnin music ngainat zawng, rilru tihahdam tak (ri bur bur lam nilo) ngaihthlak a tangkai duh fo.

Hostel leh inluaha Room-mate nei te tân:

1.Inbiak pawhna hi thil tih tur mâkmawh a ni, inzirtir tawn tur kan nei theuh.
2.Buaina a lo in mung dâwna hriat chuan inhrilh hriat tawn vat a tha, nausên duhawm lo tak chu a lo pian hma ngeiin.
3.Mitin mizia leh nundan inzahtawn thiam a tul
4.Benchhen loh hun/lehkha zir hun intiam lawk fo a tha

*[research conducted by Center for Academic Support (CAS), Prairie View A&M University & Naval Reserve Officers Training Corps (NROTC), USA]

[He'ng thuziak lâkkhawm hi Bangalore Mizo Zirlai Pawl Newspaper-ZIRLAITE KHAWNVAR (Vol. IV Issue No. 11, July 19, 2009 )-a Editor leh Zirlai pâwl President ka nih laia ka chhuah a ni a, point pakhat tal i hman tangkai ve ngei ka besei - Samuel Lalrozâma Hmar]

Mizo: TUKVERH


Kum zabi tam tak ral taa China lalram ropui tak awptu, Ching Dynasty (1644AD-1911 AD) ho lal tawp dawn lam khan mi pakhat, thinchhe deuh mai, Kao Sze-a, China ram hmar lama khawsa chu an khaw mi pakhat a thah avangin an man a. Chutiang misualte hremna chu dam chhung lungin tân emaw an nunna lak sak emaw a ni a. Chu’ng hremna te pumpelh tur chuan a thiantha leh laina hnai te chuan theih tawp an chhuah a, roreltute chu thamna pein kum 8 chhung lungin tâng turin an tithlu thei ta hrâm a.

Tichuan khaw pâwn ramhnuai bula lungin chhengchhe takah chuan an dah ta a. A hman chang apiangin kung-fu a lo zir tawh chu amah chuan a ennawn ve thin a. A tânin chuan tukverh pakhat chauh hi a nei a, chu tukverh atang chuan a bul thingkung lian tak maia zâwng rual che tla, bengchheng tak mai chu a hmuh theih a, a mut pah te chuan a thlir fo thin a, hlimna petu pakhat a ni ve a ni.

Nîtin mai chuan chîk takin a thlîr vel thin a, mizia inang lo tak tak chu an pu hlawm a ni tih a hmu chhuak ta a, an infiamnaa an insual der vel tuma an chêt dân leh a tak taka an insual tuma an chet dan te chu a inanglo a ni tih te pawh a hmu zui zel a. Tichuan rei fê a enthlak hnuah chuan zâwng chêtzia leh mizia chu chi ngaah a then ta a, Kung fu forms (lam dan) chi nga - Lost monkey, Drunken monkey, Tall monkey, Stone monkey leh Wooden monkey te chu a hmu chhuak zui a; tichuan kung fu style thar chu a hmu chhuak ta der mai chu a lo ni. Chu a style hmuh chhuah thar chu Tai Shing (‘Great sage’ emaw ‘Puithiam ropui’ emaw tihna) monkey kung fu tih a phuah ta a, San Wu Kung, Chinese thawnthu lar, ‘Journey to the West’ - a zâwng lal ropui tak hming chawia a sak a ni.

Jail atanga a chhuah hnu chuan, a style hmuh chhuah chu a theh lâr ta a, kungfu style danga mithiam tam tak te pawh a hneh chho zel bawk a, vawiin ni thlenga zir chhoh zel a ni ta hial. Tai Shing kung fu master lâr tak tak thenkhat te phei chu China atangin America ramah pêmin he style hi an zirtir a, eizawnna’n bera hmanga khawsain an inbengbel hlawm a, sum tak tak pawh an hailut mêk a ni.

Chutiang bawk chuan keini pawh hian nitin hian thil tam tak kan tâwkin kan hmu thin a, a tangkai thei ang bera hman kan tum tur a ni. Tin, kan thil tawn te atang hian enge hlawkpuina kan neih theih, tih hi inzawh fo a tha. Hrehawmna te pawh hian thil tha tak a keng tel theia, lungngaia inkaih kun reng mai zawng a hlâwk lo; engkimtithei Pathian kan kiangah a awm bawk a, kan thatna tur kawng hi min kawhhmuh reng fo a ni.

Kao Sze-a pawhin a lungin tân a hmang tangkai a, a hming chu engtikah mah martial arts khawvelah chuan a dai tawh lo ang, keini hian enge kan tih ve dawn ??? Pathianin ram lian lêm lo tak mai min pêk hi engtin nge kan chawisân ang, kan hnam tân engtinnge ke kan pên ve ang le? Engtinnge kan phai awm leh kan hnathawh leh zirna te hi kan hnam tan kan hman tangkai ve ang aw?? Revolutionaries ropui tak tak lo fam ta te nun atang hian zir tur tam tak a awm a, keini, a bik takin thalai te hian ram leh hnam tana thawk turin inkhuar bing chu a hun ve ta i ti ve lo maw ka unau??


[He Article hi Bangalore Mizo Zirlai Pawl Newspaper-ZIRLAITE KHAWNVAR (Vol. IV Issue No. 11, July 19, 2009 )-a Editor ka nih laia ka ziah a ni a; Delhi Mizo newspaper- DUHAISAM(Phur Châng Châng-ly, Vol. I issue No.7, Tahrik ni 13, Tomir Thla, kum Sanghnih leh sâwm)-a tihchhuahah chhuah nawn leh a ni. Kan ram leh hnam hmasâwnna'n engtinnge tuna i dinhmun kha i hman tangkai ve dawn le ka unau - Samuel Lalrozâma Hmar]