.jpg)
Beiseina (Hope) hi mihring nun tinungtu pakhat ani ve tlat a ni. Beiseina hi mi tam tak khan lo neilo ta se vawiin nia kan thilhmuh tam tak te hi hmuh tur a awm lo maithei a nia, beiseina nen thlîrin scientist ropui tak takte’n thil theih loha ngaih tam tak chu mi nuihzat luai luaina kârah an siam chhuak ta a nih hi. Mitin mai hian beisina hi kan neih thar fo a pawimawih a ni kan nitin nunah hian. A tha zâwnga thil thlîr mi, mi optimistic an tih ang deuh hi nih i tum vek ang u. Zawlnei kal hmasa te pawh khan beiseinain an thil rin chu an thlîr tlat vangin huai takin an kal thei a nih kha. Beiseina hian mihring nunah hlimna leh tumruhna a thlen thei a; beiseina a awm tawh loh chinah chuan nun hian awmzia a nei tawh miah lo. Beiseina nei tlat mi chu hlawhchham fo mahse a chhungril nun chu hlimnain a tuam tlat thin.
Nitin mai hian thil thar kan tawng theuh a, entirna’n zirlai nun lo la tai la, exam tur te kan nei a, hun a tlemin thiam harsa tih chang te a awm fo thin, mahse lungkham luat a sâwt lo ania, kan in ti hrehawm mai mai, hma kan sâwn phah dâwn chuang lo, chu ai chuan kan zir zawh hman chu beisei tlat ila, kan hman ta lo a nih pawhin kan zir chhun kha a lo chhuak hlauh maithei asin. Engkimah tawngtai leh dilin, beiseina nen han thlir phawt mai ila. Kan lo fail ta a nih pawhin rilru ti hah rêng rêng lo ang u, thinlung zângkhai tak pu ila, exam leh tur atan tha taka inbuatsaih chu tum zawkin, tha taka pass ngei in beiseiin hmalam hun i thlir zawk ang u. Hun hrehawmah kan awm tawh reng a, rilru hah taka kan awm zui phei chuan kan inti hrehawm belhchhah tihna a ni; chu chu kan duhthlanna a ni tawh...
Kum 2003 khan, College kan luh laiin kan Secretarty-te’n spot admission leh counselling, East India-a an neih turah chuan tawng te ka lo thiam ve angin an hnung zui ve turin min ti a, train 1st class ticket, Kolkata thleng kal tur chu min rawn thawn a, ni 28, dâr 00:05-a chhuak tur a ni a, mahse ka lo chîk lo a, ni 28 zân dâr 10:30-ah chuan station ka va thleng a, train chu a lo chhuak daih tawh mai chu a ni si, zan dar 12 (00:00) hnuah ni a inher danglam tih chu ka’n theihnghilh palh a nih kha :-). Station-ah chuan ka thu a, ka inngaihtuah a, next train chu ni thum hnuah a ni bawk sia, ‘min rinna chu ka ti hlawhchhham mai dâwn a va ang ve aw..’ tiin ka dak chhuak a, vâna arsi de chuai leh thla êng no riai chu ka han hmu a, siamtu ropui zia ka hrechhuak thar leh a, ka rilruin ka tawngtaia, beiseina thar ka thihlungah a rawn lût leh a, tichuan ka zuang thova, train chhuak hmasa ber atan chuan General ticket ka zuk la a, Orissa thleng kal tur hi a lo nia, ka chhuak ve ta a, tluang taka ka thlen theih chu ka besei ve tlat a.
Zân pawh mu lo chuan a tuk nilengin ka thu a, hnung a kham duh khawp mai, a tâwt bawk si, khaw lum nen, a hrehawm angreng khawp, mahse ka thinlunga beiseina chuan min chawk phur a, eng hunah pawh seat chang thei dinhmunah awmin ka inngai tlat a, tlaiah cuan seat âwl chu a lo awm ta nge nge a, ka tlu zal ve thei ta a. Bhubaneshwar a ka chhuk hnu chuan ticket ka va en a, a lo full vek tawh si, vanneih thlak takin travel agent pakhat ka tawng fuh hlauh a, min confirm sak thei hram a, tluang takin ka thleng ve thei ta a ni. Beiseina nei tura chakna min petu leh min tih hlawhtlinsaktu Pathian chu ka fak chho mawlh mawlh a...
Natna khirh tak takte’n min tuam fo thin, beiseina hi i nei tlat zel tho u, doctor te, damdawi te hmang hian Pathinin min tidam thei a, rinna a tawngtaina te hian min him tir fo thei a nia. Tin, thenrual tha, kar hla lama mite, accident leh natna vei an awm thuin min thawng fo thin, lungngaia tap mai lo in, beiseina nen tawngtaia dil chungin, him taka kan hmuh leh ngei theih i ring tlat ang u. Beisina nei mi chuan hlimna a tawng nasa a, a dam chhung hun pawh a thlamuang bik a ni. Beiseina nei ngailo chu a dam chhungin a thi tawh reng a ni. He damchhung hun tawite hi thim thama awmin kan leng dawn nge, êngah, hlimin kan zai zawk dâwn?? Kan duhthlanna a va ni êm. Mahni chauh chuan a har teh meuh mai, kan rin Pathian pakhat dik tak hnenah tawngtaiin, beiseina nen a chhânna nghak tlat thin ila a tha ber ani, Amah nghaktu reng reng chu mualphoin an awm dawn si lova (Sam 25:03), Pathian ngaihsak lo mi beseina erawh chu a bo ang (Job 08:13).
College kan kal lai vêkin, 2003 kum tawp lam khan TangSooDo National Tournament chu Delhi-ah a awm dawn a, kan President chuan 2nd Dan Black Belt leh ‘National Judge & Referee Diploma’ chu exam ngei turin min duh si a, leave ka la chawp chuk chuk a. Technique leh Korean tawng thenkhat thiam ngai te chu ka lo theihnghilh nual tawh a, beiseina nen martial arts handbook chu train-ah ka in chhiar chho mawlh mawlh a, lehkhabu atanga zir hnem zawk ni mah ila hllawhtlin chu ka in beisei ve tlats. A hun a lo thlenga, hlawhtling takin ka han ti thei ta hram a. Tichuan ka chhuk thla leh a, a karleh lawkah chuan exam a lo awm thut mai, ka thlaphang angreng hle a, mahse ka rilru ka ti hah duh lova, ka chawlh laia an lo zir te chu ka en ve a, pass chu ka beisei ve tlat a ni. Tichuan. vanneihthlak takin, ka zir fuh nge, ka thiam chhun chhun chu a rawn chhuak a, ka pass ve leh ta hram chu a nih kha a. Lawmna thuah hnih chu ka nei ta a lo ni reng mai, martial arts degree thar leh zirlaia pass-na chu.
Chuvang chuan zirlaite u, huai takin i kal zel ang u.. ‘Beiseina’ hi zirlaite tan khawnvâr a ni a, i tinung reng ang u; a thih vaih zawngin kan zirna khawvel hi kan âr khawthim dai a ngaih mai hmel si. A thi palh a nih pawhin mit hlen tir chu phal lo ila, i tinung thar zel ang u nitinin. Zirlaite mai ni lo in hnathawk leh awm mai mai te pawhin he thuziak hi kan chhiar zawh veleh inngaihtuah ila, Zoram thar engtikah nge kan siam theih ang tih te, beiseina nen han thlir ila, hnam tinreng insuihkhawm hun leh thalai ram hmangaihtu tak tak te’n kan ram chunga ro kan rel theih hun tur hi i thlîr teh ang u.
[He thuziak hi MIZO STUDENTS' ASSOCIATION, Bangalore's website leh newspaper (Zirlaite Khawnvar)-ah 2007-a ka ziah a ni a, Pune Mizo zirlai Pawl (MSUP) newspaper-ZIRLAI AW-ah tihchhuah leh bawk a ni. Beiseina nen Zoram thar i han din teh ang ka unau- Samuel Lalrozâma Hmar]
No comments:
Post a Comment