Welcome to my dreams

CHIBAI

Thanks for visiting my page. Most of the writings are in Mizo (Lusei/Lushai/Duhlian) [a native language of Mizoram], but there are also some english postings written by me and my good friends. I do hope that they are of some value to you in your daily journey of life. You can check out all the writings from this link:

Contents (Thuziak awmte)

The postings are categorized into five labels, which can be seen at the end of each posting. If you want to get a view of all the postings labelled under that category, you can do so by clicking it at the particular label name. The labels are:

# English Articles
# Mizo thuziak (Lusei Articles)
#Other Language Articles ((Hindi/ Bengali/ Mizo: Hmar/Paite/ Kuki/ Lai/ Mara)
#Informative (Hriat Zauna)
#Mind Bogglers (Ngaihtuah peih te tan)
#Songs (Hla)/ Poems (Chang)/ Quotations (Thusawi)/ Skit

Ka page-a i rawn len luh ve avangin ka lâwm e; sâp awng leh mizo awnga kei leh ka thiante thuziak bakah thil tangkai tur nia ka hriat te ka târ chhuak ve nual a, midangte tâna thil hlâwkthlak tak a nih hi ka thil duh leh thlahlel ber a ni. Thuziakte chu he link aang hian i en thei ang:

Contents (Thuziak awmte)


Kan ram leh hnam tluchhe mêk hi ka vei ber mai a ni a. Politician tha leh fel te chu an awm nual ang, mahse kan political system hi a corrrupt tawh a, mi pahnih khat thatin awmzia a awm lo, a system tawp hi thlak a ngai a ni. halai, ram leh hnam hmangaih tak tak te hi infawmkhawma bloodless revolution siam a hun ta. Kawng lehlamah kan politician te hi dem ngawt theih pawh an ni lo... Ram leh hnam hi hmangaih hi a ul a, i lo hmangaih ve a nih chuan an dinhmuna ding thei turin i inpeih em ka unau?? I ramin a ko che... Ram hruaitute puih theihnaah puih an ngai, puih theihloh chinah tih tur neia kan inhriat chuan ti ang u...

Pu Keivom pawhin tihian a sawi hial a: Ram le hnam ta dinga tu am a na martar chang: lu latu am a lu lak? Pawlitiks khawvela chu, voisuna chawimawia um kha a zingah khaihlumin a um thei a, voisuna tuolthattu Barabbas kha suolna nei lo Isu aiin insuo a ni daih thei bok. Voisuna “hossana’ tia lawm luttu rawl kha a tukah ‘Kraws-ah hemde rawh’ tiin a’n thlak thut thei. Voisuna martar chang kha a tukah tuolthattua puong a ni thei. Voisuna hel hmang le tuolthattua ngai kha a zingah zalenna suolsuoktu, hnampa a hung ni thei bok. Chu ngirhmun tar langna, Robert Browning hla phuok, College kan kai laia kan inchuk ‘The Patriot’ châng tawpna tlar hmasa tak “Thus I entered and thus I go!” ti lai tak khah kha ka zuk hriet suok vang vang chu tie! Ngaituo a suksei ngei.

Ram leh hnam tân enge tih theih i neih ??
[Zoram/Zogam ( not only Mizoram, but a 'Greater Mizoram', the land of the Zos, Zofate chenna ram zawng zawng) thar i siam ang aw...

Zofa - Doesn't matter if you are a resident of Mizoram or if you are a half-blood, as long as a drop of Zo blood flows through your veins... you are my brothers and sisters...

"Lung lungrual zain aw,
Ram kanhnam duhdaw in maw?
Tlangkhatin tlangdang thliar dan lo;
Hnamkhat le hnamkhat cawimawi in,
Zo nunmawi lungrual tein,
Sumtual run rem tlang uh si.
"


Mizoram mi ni loin thlahpawlh pawh ni la... Zothisenin a bual chhung che chuan thlahtu thuhmun kan ni e ka unau..

Zofate hi kan inzarpharh zau ve tawh a, Khawthlang ram changkang deuh zawka awm te phei hi chuan min rawn la hre ve thin angem aw ka ti fo thin. Mahse khawiah pawh awmin enganga mi hlawhtling niin kan ram leh hnam hi ngai loin inhre mah ila kan thisen zunzamah Zothisen a luang tlat si avangin tunge kan nih hi i theihnghilh lo ang u.

"Aw i pianna zolei gam, Etlawm sa'ng e,

Aw a etlawmsa zuun lai leng;

Paakbang in hong lun diing a, Tul lou diing hi,

Aw a etlawmsate giabang zuun lai ni."

Ram tana martyr te hming a dai tawh dawn si lo a, hangtharte chakna petu an ni zawk ang.


"Ram le hnam ta dinga mi tlawmngai hai le
Hringna chen lo inhlantuhai leiin,
Ei hnamin par ang vul ni la nei ngei a ta,
An sakhming thangthar lai mawi zuol a tih.
"

A tawp ber atan, kan rinna tifamkimtu, chung Pathian nung pakhat dik tak kan neih hi hre rengin kan nitin (minute tin) hun i hmang hin ang u. Sualna kan nei theuh e; mahse hat tum mi chuan hma a sawn a ni tih hre thar leh bawk ila.

"Engtiknge Sappui nun ngai lo rengin,
ka nghakhlel, kan lenna hun tur chu...."

Samuel Lalrozama Hmar (Sammy)

s/o Dr.Thangchungnunga

sammywalker@rediffmail.com

sammylrza@gmail.com

ace_of_samz@yahoo.co.in

Mob: +91-9886447684

+91-9612732554


Sunday, June 27, 2010

Mizo: Saruakna

BISHOP PAINTS NUDE FIGURES - Rinu Varghese Saturday, 1 August 2009.

A Reverend in the northeast state of Mizoram has a very eccentric and unique hobby of painting: draw nude pictures of men and women. One of the first Mizo to be ordained a Bishop, Rev Stephen Rotluanga says his art of drawing nude pictures is nothing but plainly revealing human figures created by God, revealing God's glorious creation and further proves that God is the "greatest artist" of all time. For him, drawing human figures is his favourite subject like other great artists - Michael Angelo and Leonardo da Vinci. His exhibitions are held both in India and abroad. None of his works are available for sale.

SARUOKNA (Nakedness) - L.Keivom
(Tin, Adama leh a nupui chu an pahnihin saruakin an awm a, an zak lêm loa. - Gen. 2:25)


Saruakna tih hi secular term chuan nudity tih tur ni mahse rilru leh thlarau lam huap zâwnga religious term-a hman dâwnin, ‘Nakedness,’ tih hi dik zâwka ka ngaih vângin ka hmang a ni. Kan thu \obul chu Mizo Puithiam pakhat, Aizawla Bishop hmasa ber (2002), Stephen Rotluanga lemziak (painting) a ni. Amah hi Roman Catholic puithiam a nih mai bâkah lemziak lama tui leh thiam tak, Toronto-a Ontario College of art and design a\anga hming chher khawpa zir chhuak ngat a ni. A hming rawn lâr zualna chhan ber pawh saruak lem ziak a nih vâng a ni. Chu chu Pathian thil siam mawizia leh ropuizia târlannaah a ngai. A thlîrna mit a\anga thlîr phâk lo te chuan mak leh rapthlâk an ti, Puithiam tih chi loh hulhualah an ngai. Tu nge mitdel zâwk tih erawh chu, engkim saruaka siamtu, Pathianin a hriat chian ber a rinawm.


He thua HYG-a titiah chuan saruakna thu ai mahin kan mizia tlangpui pahnih chiang êm êm mai a lang a. Pakhatna chu kan kawrawngzia a ni. Hre âwm taka thil kan sawi te hi, eng thu pawh ni rawh se, kan han inzâwt chiang a, mi sawi kan lo hriat chhâwn, a dik leh dik loh mahnia chhui fiah tum loa mahni duh zâwng zâwnga kan tihpunlun a lo ni deuh vek a ni. Kan kawrawn dân thûkzia pawh kan hre phak loa, hriat kan duh bawk lo. Kan kawrawnzia min hrilhtu chu lâwmthu hrilha nêkin, tlâwma lain, huat kan chîng. Pahnihna chu, kan kawrawnzia chu thup mawina turin bumna leh lemchan nun kan zir a, zêldinna bawihah kan tâng a, kan nihna anga saruaka lang ngam kan awm tak lohna hi a ni. Chû zia pahnih kawl hnem ber chu tu dang ni loin kan puithiam te leh kohhran hruaitu te an ni mai thei. ‘Thlaraua a\angin ka hmu’ tia khawtlâng hrilh fo te hi kawrawng zual an ni duh. Thlaraua hmu tak tak te chu thli ang an ni a, an awmna hmun hmunah, tu sawi tam ngai loin, an nungchang leh thu hrilah hriat mai theih a ni. An kalna na a nghîng a, an thu leh hla fîmin mi a kaitho a, a thawi dam bawk. Engpawhchu ni se, a mimirin mahni theuhah kan dinhmun kan inen chian a tha.


He a chunga thu kan rawn tar lan pawh khi a tira sâp tawnga report tu thu ziak atang chuan lemziaktuin saruak zawk a ziah duhna chhanah buaina tur a awm der lo. A rûka a tih thin a ni lo a, saruak lem a ziah te chu a zahpui lo a, India ram leh khawvel hmun hrang hrang art exhibition-ah te pawh a lemziah te entir tawh thin bawk a ni tih kan hmu. Amah chu a thil tihah a chiang a, a buailo. A buai te chu bumna leh lemchanna tukverh atanga thlîrtu leh thîktu te niin a lang. Mahse an buaina thu sawi si loin mi dang lehkhabu ziak leh lem ziah, chîk takin an chhiar tawh leh en tawh pawh ni lo, a lehkhabu hmêlhmang pawh an la hmuh ngai loah min luhpui an tum ta; a taka hmu ngei tawh leh chûng lehkhabu te chu ngun taka lo chhiar tawh  te kha min ti luhai letling hlauh a ni.

He titi tlânna atanga zir tur pawimawh chu mî thawnthu phuah emaw belhchian dâwl lo thu sawi emaw rin a, a dik leh dik lo thlu loa thutak anga pawma khûkpui vak hlauhawm zia leh chung thil laka in vên fimkhur leh inthiar fihlim tulzia hriat a ni. Chu chu hruaitu leh hotu nihna dinhmun chelhtu te tân a pawimawh lehzual. A chhan chu kan dâwt thu khûkpui kha kan hruaite pawhin thudika ringin an lo khukpui ve zel thin avang a ni. Kan lo inawk palh a nih pawhin, kan tang a ni tih miin min hrilh hriat vêleh inlamlêt vat a pawimawh. Kan hriat hnu pawha luhlul chhuaha kan inlamlêt duh loh chuan dâwt bawiha tân reng kan thlang zawk tihna a ni. 

[He article sap tawnga mi hi discussion board (HYG-Hmar Yahoo Group)-ah khel a ni a; chutah chuan a kal thui zeal , DaVinci Code tih te a  srawn sawi chhuak a, mi tam tak , kohhran hruaitu te pawhin chung lehkhabu te chu an buaipui hle a ni awm a lan danin, tin, chhiar ve lem si lo hria niawm taka sawi, work of fiction tih inziaksa kuau lehkhabu te pawh, thudik ang maia rawn sawi pawl te an awm. Chung vel leh kan ngaihdan tak rawn tarlana duh vangin a rawn ziak a ni. He article original hi http:// inpui.blogspot.com/2009/08/ saruokna-nakedness.html  ah dah a ni a.

A ziaktu hi retired foreign diplomat (IFS) niin, mizo (hmar) litterateur zahawm leh zah kai tak a ni. Tunah Delhi ah a awm. Enge Bangalore mipui te ngaihdan phawrhlanve hrim hrimna’n Hmar atangin Lusei tawngah ka let a (12th sept 2009)  ka han dah ve mai mai a ni – Samuel Lalrozama Hmar.]

Mizo: Mitin mamawh - Dan hriat


Kum 1984 a zosap missionary ten kan rama chanchintha an rawn chhit luh atang khan a kum telin hmasawnna nasa takin kan ramah a rawn luanglut a. A bik takin kum sangbi hnihna hnu lamah phei chuan thangtharte zingah thiamna leh finna a lo pungin, tunhmaa mahni dikna leh chanv o pawh ngaihtuah ngai lova, kan dikna ngei ngeiah rahbeta kan awm chang pawh a sepui ruah tuar ngawt ngawt thin khan mahni dikna haichhuah a kan mawhphurhna hlen zel duhna thinlung kan lo pu tan ta a, hei hi hmasawnna lawmawm tak chu a ni.

Dan (Law) hi khawi atang pawha zir theih a ni a, eng subject mai pawh hian law nihna zeril hi a phawkchhuak vek a ni. Entirnan: Mizoten zirna peng hlawm lian deuh deuh pali- Arts, Science, Commerce, Vocational Subjects zinga kan hriat chian deuh deuh pahnih- Arts leh Science te hi law nena a inkaihhnawihzia tihchiannan han hrilhfiah ve ve phawt ila:

A hmasain Arts awmzia hi hrilhfiah han tum hmasa phawt ila. ‘Arts chu mihring siamchhuah thil mawi tihna a ni a.Chu chuan a huam zau hle a. Chutiang thil chu rilrua ngaihtuah chhuah, midang ten a mawi leh mawi loh leh, a that leh that loh an lo hriat leh hmuh ve tura engti zawng emaw tala lantir a ni tur a ni. Tichuan, lemziak mawi tak tak te, milim mawi tak tak te, thil ri mawi tak tak te leh thil reng reng hlutna nei, mihring siamchhuah thil mawi tinreng hi Arts chu a ni a. Mahse, tuikhawhthla te, pangpar mawi tak tak te leh ni tla tur eng mawi takte chu mihring siam chhuah a nih ve loh avangin Arts chuan a huam lo thung a ni. Mihringin a ngaihtuahna mawi taka a rawn tarchhuahna hi ‘Arts’ chu a ni.

Tin, ‘Science chu thil ni chiah chiah, danglam leh chuang thei lo, chatuan thu dik hi a ni a.’ Entirnan : Pahnih leh pahnih belh chu pali a ni; dut no hi dulah dawm beh a, a chhunga lapaw hal veleh a ben bei chuan a bei hlen nghal (a chhunga boruak kha halral a ni a, no mawng lam atanga boruak nemna avangin) tih te; tui khat pam a rialno a dahin lehkhakhawngin chhin ila, han letling ila, chutah lehkhakhawng vawnna thlah mah ila chhung lam boruak nemna avangin lehkhakhawng kha a tla chuang lo tihte hi khawvel awm chhunga thu dik tur a ni a, Science an ni. Chumi awmzia chu ngun taka thil enfiah a, chuta thil awmdan a zira a hnua thil awm leh chumi chhuina chu Science a ni a. Chutiang chuan Science chu thil ni chiah chiah, danglam lo a ni ta a ni.
Ngun taka a hrilhfihna pahnih kan en chuan an nihphung hrim hrim a ni tih chu hairual a ni lova. Mahse, rualrem taka a infinkhawm chiah hian a ni law nihna zeril chu tihfamkima a awm ni. Mahse, law nihna zeril hrilhfiah tur chuan an mahni mai chuan an tling zo lovin an famkim tawk lova, an hrilhfiah dan phung pawh a danglam hle a ni. Science te anga theory awmsa leh leilunga thil awmsa hmang a thil nihna dik tak haichhuah a tum ve lova. Thil ni thei awm leh sunagtuahna ril tak (Art) hmanga chhui chhuah a, a chhehvel thil awm chi tinreng leh a hualtute, thil engkim inhnamhnawihna neive awma a hriat thil chi tinreng, zeldin thubawl hmang pawha chhui chhuah a, thil nihna dik tak zuk haichhuah hi law nihna zeril tak chu a ni.
Law tih thumal hi Teutonic (German hnam peng tawng pakhat) tawng ‘Lag’ tih atanga lakchhuah a ni a. A awmzia chu (A saptawng hian ahan dah mai ila) ‘to fix, to place, to set, fix or even’ a ni. Mi chi hrang hrangten hetiang hian an hrilhfiah hlawm bawk a:

T.E. Holland : “ Law is a general rule ofexternal human action enforced by a sovereign political authority”.
The Oxford English Dictionary : “ Law is a rule of conduct imposed by authority
Willhouby : “ As distinguish from all others rule of conducts that obtain more or less general recognition in acommunity of men, they are such, as have for their ultimate enforcement, the entire power of the state”
Woodrow Wilson : “ Law is the portion of the established thought and habit which has gain distinct and formal recognition in the shape of uniform rules backed by the authority and power of the governmnt”.
Garfield. Gettel : “ Law is the command of an authorized public organ acting within the sphere of legal competence”
R.G. Soltau : “ A law is a rule of behaviour for the menbers of the state, the disregard of which meets with a penalty, which will be enforced by the state`s machinery of power”.

A khaikhawm nan a awmzia chu - Mihringin kan chanvo diktak emaw, thil a nihna dik tak emaw, Siamtuin ni tura thil a tih ang taka awm tura thil nihna dik tak zuk haichhuah hi a ni ti ila kan sawi sual lutuk awm love.
Mi thenkahtin ‘Moden world is the age of Science of technology an tih thin kha dik famkim ta hleah kan ngai emaw ni? Tlema zirlai bengvar deuhte chuan Science laka Engineer leh Doctor nih kan tum ta fur mai a. Democracy innghahna lungphum dan (law) lampang zir kan hlamchhiah ta tial tialin a hriat theih. Hei hian zirna lampanga kan khawhawi la zau tawk lohzia a tarlang chiang hle awm e. Kan hriat theuh angin kan ram, India ram hi khawvela democracy sawrkar lian ber a ni a. Democracy hnuaia ram rorelna reng rengah chuan mimalin emaw, pawlin emaw ama thu thuin lal a hrawt ve thei tawh lova, mi hnuaihnung ber atanga mi chungnungber thlenga phuar khawmtu chu dan (law) hi a ni. Tumah reng hi dan chunga leng kan awm lova, dan hnuaia kun vek kan ni.

Mi tam tak chunan Ukil hna hi hna tawp leh tenawm tak, Ar dum pawh Ar var tia sawi phet tum, mi sualte thiam chantir tuma dawt leh thu puarpawleng pawh pawisa lova dawt sawi ching niah kan ngai thin a. Hei hian politics kan ngaihdan hleng pawhin nghawng thalo tak a thlen a. Mi tam tak chuan politics tih hian a thu leh hla zir chiang hmasa lovin, political workers te chet vel dan hi politics awmze ber emaw tiin, thil bawlhhlawh tak, sakhaw rawngbawltu tan phei chuan inhnamhnawihna chi reng reng ni lovah kan ngai thin a. Hei hian dan hriatna lampanga kan la pachhiatzia leh thim chhah nasa tak hnuaia leng kan nih a, kan tana khau a la var mawlh lohzia a tarlang chiang hle awm e.

Politics tih tawngkam hi Greek thumal ‘Polis’ tih atanga lakchhuah a ni a. Chu chu khawpui thianghlim’ tihna a ni. Hmanlaia polis a cheng kan tihte chu mi zahawm leh hawihhawm tak, tlawmngaihna dik taka vawng, rorelna fel leh mumal tak hnuaia chengte an ni a. Chuvangin, politics tih hi a lo chhuahnaah chuan mihringte chenna atana tha theihpatawp a ni ringawt mai. Tin, Ukil te hi a hrethiam lote ngaihdan letling thawkin thil nihna dik tak haichhuah a, mipuite hnena thudik puanzar tumtute an ni a. Hna thianghlim tak, kan Bible nen pawha inrem thlap a ni. `Hriatlohna hian min lo timawl thei viau asin!`.

America President pathumna Thomas Jefferson chuan, “ Law and institution must go hand in hand with the progress of the human mind. We must as well require a men to wear the coat that fitted him as a boy, as civilised society to remain ever under to regime of their ancestors” tiin dan (law) pawimawhzia a sawi a. A ni lah taka, rorelna dik leh felfai a awm loh chuan ram rorelna tha a awm thei lova, ram hmasawnlohna a thlen thin a ni. Chuvangin, kan Lalpa Isua Krista paw`n ‘Dan tiboral tura lo kal ka ni lova, tifamkim tura lo kal ka nih zawk’ a tih ni.

Thu leh hla khawvela mi hmingthang tak John Selden (1584 - 1654) chuan ‘Ignorance of law excuses no man, not that all men know the law, but because `tis an excuse every men will plead, and no man can tell how to confute him” tiin dan hriatloh hi chhuanlam a tlinlohzia Table talk show’ an neih tumin a sawi a. Chuvangin mitin mai hi dan hre tura ngaih vek kan ni. Kan chanvo leh dikna (Fundamental Rights) kan hriat tawk loh avanga kan chan nasatzia leh khua leh tui kan nihna avanga kan mawhphurhna lampang (Fundamental Duties) kan hriat tawk loh avanga kan kova mawhphurhna innghat kan hlen tawklohzia leh kan ramin hma asawn tur anga pawha a sawn theihloh phah zia hi chhut tham a tling.

Tin, dan hriat hi mahni inhumhim nan leh khau leh tui tha nihnan a tul ve hranpa hrim hrim a. Tunlai khawvel hmasawnna thang chho zelah hian a pawimawhna hi a la zual zel dawn a ni. Chuvangin, ‘Ignorance is crime’ an tih thin kha kan rilruah vawng reng ila, mitin mai hian dan (law) hriat pawimawhzia hi i hre thar theuh ang u.

( He article hi ka thianpa K.Remruatfela, Bangalore-a llb zirlai ziah a ni a; B.M.A Silver Jubilee Annual Magazine 2009 ah tihchhuah a ni. Ngun takin bih theuh ila hlawkpuina tha tak kan nei theuh ka ring.- Samuel Lalrozama Hmar)

Mizo: Koh leh Serhhrante

Wesley Church (Bangalore)


Tunlai chu ka rilruah hian Pathian tâna an hun pumpui pe a, an thatlai hun zawng zawng Lalpa tâna hmangte hian nasa takin min hneh em em a, ka awt a, ka thîk bawk! Ka thatlai hun te ka’n ngaihtuah lêt ve khanglâng a, (kantleirawl lâi te tak kha!!) Pathian tâna ka pêk tlêm zia leh, Thalai Pâwl anga rawngbawlna kawnga ka pên ve lai pawh khân sual ka paipâwn tun a, ka rawngbawlpui te hmuh lohah chuan engkim hi ka ti thei a, ka chawhchawrawi thin a nih kha!! A châng chuan Pathian thu hre ber ni awm hian ka han sawi ve hluai a, mahse ka thusawi khân keimah min kal tlang loh avang khân midang tan chuan nuihzatthlâk mai kha a ni \hin ta awm e. Ka hun leh tha Lalpa tâna hmanga ka inhriat lâi khân keima tân a lo ni vek tih tunah Lalpa Thlarauin min hmuh thiam tîr hnu hian, Lalpa tân, a duh apiang kal ngawt theih a ni loa, a phur phur inpêkna hi Lalpa’n a pawmin a lawm ngawt hek lo. Chuvang chu a ni Lalpa koh leh serhhran te hi KA THÎK ka tihna chhan chu. Lalpa tâna inpêk ka châk vâng ngawt khân koh ka ni si lo. Ka hun pum Lalpa tâna hlan ka duh lâi hian Amah Lalpa hian min serh hrang ngawt hek lo. Chuvang chiah chuan a ni, Lalpa kohna dawnga chhanga, an hun pum Lalpa tâna hlântute ka AWT ka tihna chhan chu.


Nangni Lalpa kohna chhânga a serh hran te u, a ko tu che u Lalpa avang chuan in lâwm hlâ rem rawh u khai!! Vânah in lâwmman pêk in nih huna Vân mipui chhiarsenloh te’n in hminga lâwm hlâ an rem hun tur ka ngaihtuah hian a ni kei, misual vâkvai hian lawmpuina hlado mittui nên ka lo rem ve a nih hi! Koha i awm avang hian lâwmthu i sawi thin nge i inchhîr \hin? Lalpa’n a serhhran che vang hian Lalpa i fak thin nge vui hmui pu chungin hnawk i ti thin? Kan khawvêl hi a la awm rei hrih deuh a ni thei e, nangma khawvel a tâwp hunah erawh chuan a kotu che hnenah haw hlen tawhin chatuanin chawimawi i ni tawh dâwn tih i ngaihtuah nî hian i lâwm tawk lo ang tih ka va hlau êm!!


Chutiang ngaihtuah chung chuan, kan khawvel changkânna rahbi rapa kal muah mauh mai, a chhûnga chêng chhiarsên loh te zînga kei ngial pawhin hmuh phâk ve Internet pawtin zân lamah website hrang hrangah lûtin \hian hlui te nên zankhaw tai rêk thleng thlenga ka râk kual vel lai chuan, THILTHA TAK hi Lalpa hnên ata min pawt hlatu \ha tak A ni tih ka hriatchhuah tak ni!!(Lalpa thlarau min hriattir ka tilo phallo) Hun rei tak, ka hmuh ngai tawh loh leh ka biak ngai tawh lo te ka han bia a, chanchin kilkhawr ber thlenga kan han inhrilh tawn chu a hlu a, a nuam a, a hlimawm tak zet tih chu in hriat hlawm kha!! Mahse kei ka tân chuan sualin remchangah a lo hmang dêr tawh tih ka hriat meuh chuan “THLAMUANNA KA PE A CHE U, KHAWVELIN A PÊK ANGIN KA PÊK LO CHE U HI” min titu Pathian thlarau thianghlim thlamuanna ka chhûnga awm, engmahin a tih dal theih loh hi tlêm chu min lo lâksak tan reng tawh tih min hriattirtu Pathian hming fakin awm rawh se. Tv.Vanlalsailoa’n “Nun khawlohna ûm ka hringnun hian, Ka tisa duhthlan ka zui leh thin; Lungngaih leh tahna ka tawn chânging Malin aww min kalsan leh si a,Ka thla rum manganga au ri chuan ka Lalpa zah dawn loin a au.” A lo tih chu ka tisa hian a rap dik chat chat mai a nih hi. Thil\ha hian min rûn a, thil dik hian Pathian hnên ata min pawh hlat dâwn ai chuan, kei zawng hmânlai mi niin, changkânna rahbi hi ka rap ve lo mai dâwn em ni ka tih lai chuan, hei ngei hi Lalpa min kohna chu a lo ni tih ka hrethiam ta!!


Lalpa’n khawvelah hian min la dah ve reng hrih dâwn a nih chuan, khawvel hi a changkâng zêl anga, keimahni \heuh khawvel pawh hi chu mi rual chuan a pên ve a ni thei e. Thil\ha te, thildik te, thil changkâng te’n min rawn thlenchilh ni hian ka rin Pathian hming ngeia ka kalsan a, min hmangaihna dai ngailotu Lalpa hminga \hiantha te, ka mi ngaihsân ber ber te pawh, ka tisa duhzâwng leh ît zâwng ngei mai te ka lo kal san hunah chiah zel hian Lalpa chu a lo mawi thin. keimahah lâwmna reng hmuh tawhlotu Pathian ngei chuan lâwmna a hmuh lohna hmun ngei, keimahah vêk chuan Krista avangin lâwmna a lo hmu ve ta hlauh a!!


Ka Bible chhiar hunah chiah thiante an rawn lang a, ka tawngtai hunah chiah titi a tuia, sawi tur ka la ngah lai tak chu Lalpa’n ama tân a lo duh ve tlat a. Chu hunah chiah chuan, ka tisa vaivuta chang mai tur duhdân hnâwla, CHATUAN NUNNA MIN PE A, KA AIA INPETU KRISTA tân zawka ka pek chiah hi Lalpa min kohna a lo ni reng a!

Thiltha hmanga Lalpa hnen ata min pawh hlat tumtu Setana thu awih duhlohna chiah hi Ka Lalpa min SERHHRANNA chu a lo ni zâwk a ni tih thlarau thianghlimin min han hmuh tîr leh chiah mai chu!! Hun puma Lalpa tâna inpe te aia ka vanneih lohna ka hre lo. Chu ngei chu a ni, “Nitin a Kross pûin mi zui rawh se” a tih chu. Thil hrehawm leh harsa chauh hi Kross a lo ni lo a, thil\ha, thildik, tûnlaina hi kan Kross put turah hian a lo tam hle a ni tih i hre nawn leh ang u aw!! Bible chhiar leh tawngtai thulha, thil\ha leh dik pawh nise, ka tih chuan ka chhungrila thlarau thianghlim awm chu a lo rûm nawn thin si a!!


Tichuan kan zavâi hian, ringtu tawh phawt chu, Lalpa koh leh a serhhran te kan lo ni vek a, Lalpa hminga Amah Lalpa hmêl hliahtu - hmuh theih sual leh hmuh theih ve loh sual ka kalsan chiah hian, an hun pum Lalpa tâna pe, Pathian kohna chhânga, an thlang lo chung chung pawha a kotu Pathian kalsan thei tawh lo Lalpa serhhran leh a kohte nên chuan Lalpa pakhat, rinna hmun khatin Thlarau thianghlim chuan min hring tlâng vek a lo ni!!! Aww..Pathian hi a va \ha tak êm t’ruu


“Khawvel nî hi a ral hunin, ringtu zawng zawngte chuan,

Tlantu hmêl kan hmu ang a, a va hlimawm dâwn êm!

Tlansa te tâna zalenna ropui chhandam fâte zalenna

A lo thleng dâwn e, rei a rial tawh lo’ng.


Aw ka nghâkhlel ka Chhandamtu, chumi hun tlansa te nî chu,

An lungngaih manganna zawng Lalpa hnên an thlen tawh ang

Ani’n an mit ata mittui zawng a hrukfai sak ang

Hmangaihna kutin a lo kuangkuah ang, A ni Lalpa’n.”



[A ziaktu hi Nl.Azaii a ni a, Bangalo Mizo Official newspaper (Vol.XV Issue no.24 dated Sept 13th 2009)-a editor ka nih laia ka chhuah a ni. Amah Bangalore-a rei tak lo awm ve tawh, khawtlâng tana mi tangkai em em mai a ni. Thuziak tha tak mai, mi tam takin kan hriatchian loh leh han ngaihruatthiam phak loh thil, a thil tawn ngei atangin, min rawn sawi zâu saka a lâwmawm hle. - Samuel Lalrozama Hmar]

Saturday, June 26, 2010

Mizo: Creativity

Zofate history a dai tawh ngailo turin kum 1902 ah chanchinbu hmasa ber ‘Mizo leh Vai chanchin’ tih chu kan lo nei tan a. Chumi hnu lawkah Kristian Tlangau Chanchinbu a lo chhuak lehin ‘Mizo Zirlai Pawl’ chanchinbuin a rawn zui leh nghal a. Chutiang chuan chanchinbu lamah hmasawn zelin kum sangbi hnihna hnu lamah phei chuan chhiar fe tham chanchinbu chhuak kan lo nei lo nei ta reng mai a, hmasawnna lawmawm tak a ni. Amaherawhchu, zirlaite hmasawnna lam hawi, zirlaite puala chanchinbu hi sawi tur mang kan lo la neih hauh lo mai a. Chumi keini zirlaite mamawh phuhruk hri thla tura zirlaite puala chanchinbu ‘Student Outlook’ a lo chhuak thar hi zirlaite tan mai bakah nu leh pa te tan pawn thu lawmawm tak a ni a. He chanchinbu hi zirlaite tana siam a nih ang ngeiin neitu rilru pu tak chungin ka zirlaipuite fuihna thu kan chhakchhuak ve ang e.


British novelist ropui, Virginia Wolf chuan, thil dang zawng aia ngaihtuahna thuk leh ril (critical thinking) in ram hmel a sawi danglam theih zawkzia chu Odd how the creative power at once brings the whole universe to order” tiin a lo sawi a. A ni lah taka suangtuahna ril nei mi tluka kan zoramin a mamawh tumah an awm lova. He ngaihtuahna ril zempui, a thupuiah pawh ka vuah ‘Creativity’ tih hi Latin tawng ‘Creatio’ tih atanga lakchhawn a ni a, a awmzia tak chu ‘thil satliah emaw, suangtuahna satliah mai mai hmanga thil tih nilova, suangtuahna tha leh dangdai, ril leh thuk, thinlung chhungril ber ngaihtuahna atanga chhuak ngeia thil duanchhuah ti ila’ a sual lutuk ka ring lo e. Ram changkang leh fing zawk apiangten he suangtuahna ril ‘creativity’ pawimawhzia hi hriain an ngai pawimawh a. Zirlaibuahte pawh zirlaite ‘Creativity’ ti chak tur zawngin zawhna an siam hram hram thin a ni. Tuna kan education kalphung hi chuan kan Indian puite el tur leh competition sang han hmachhawn tak tak tur chuan min tanpui zo tawh lo chu a ni deuh ber a. Hemi kawng thuah chuan kan sawrkar hruaitute ni lovin, min awptu hmasa British sawrkar hi ka dem deuh ber thin. A chhan chu anni anga hmasawn tak tak tura min duh loh avangin tun hma pawha an lo kal pui tawt thin, a thatlohzia an hriat hnua an lo bansan daih tawh ‘Learning by rote’ system in hmathar min lakpui a. Chungchu tun thlengin thlak danglam lovin kan la hmang chhunzawm zel chu a ni a, ngaihtuah chian a ngai tawh hle mai.


Kan ram siamthatnana kan ngaih pawimawh hmasak ber tur nia ka hriat chu kan Education system hi a ni a. A chhan chu education hi mihringte mipuitlinga mi siamtu ber leh ram leh hnam hmasawnna kipui ber a ni a. Education kalphung a that chuan ram pawhin hma a sawn a, a that loh erawh chuan ram tihchhiatna hmaraw hlauhawm ber a ni thei tho bawk a ni. Tun hnaiah, kan sawrkar pawhin he Education pawimawhzia hi hriaiin siamtha turin Education Reform bul tumin hma a la mek niin a hriat a. Hei hian rah duhawm tak a chhuah ngei i beisei phawt teh ang u. Keini zirlaite pawh hian kan lehkhazir dan kalphung hrim hrim pawh hi kan thlak danglam a tul tawh hle. Tunlai khawvel competition sang tawh takah hian thil chhinchhiah theih ringawt emaw, by-heart chak ringawt emaw hriatna (knowledge) nei that ringawt emaw hi hlawhtlin nan leh he khawvel ‘Survival of the fittest’ dinhmunah hian damkhawchhuahnan a tawk tawh lova. Thu leh hla thiam hmingthang Longfellow-a`n ‘He khawvelah hian pa dar ben mai nih tum lovin pa biakrawn nih tum zawk ang che’ a lo tih angin midangte khum tur chuan suangtuahna ril leh thuk (Creative idea or Rational thinking) hi kan neih a tul tak meuh meuh a ni.

Zofate zingah mi zirsang tak tak result tha tak tak nena degree course sual chhuak pawh sawisenloh kan lo nei ta. Amaherawhchu ram pum huapa inelna, Civil services exam emaw rampum huap inelna hrim hrima hlawhtling kan tlem em em chhan hi eng nge kan tih chuan he suangtuahna ril (Creative idea) kan neih thin loh vang hi a ni niin a lang. Chutiang bawk chuan kan rama kan buaipui luih luih unemployment problem pawh hi a bul ber chu kan education kalphung dik loh vang leh, suangtuahna ril leh thuk (Rational thinking or Critical thinking) nei lova By-heart system a kan lo kal thin vang hi a nih ngei a rinawm. High School leh College vela kan zirlai hrethiam chiang mang hlei lova mark tha tak tak hmua kan lo pawngpaw by-heart vak vak thin khan competitive exam naah leh hna zawng naah min pui dawn lo reng reng a. Mahni thiam ang tawka lehkhabu dang rawn chunga kan lo tih ve tawk tawkna kha kan la chhawr tur ber zawk chu a ni. American Chemist ropui Louis Pauling chuan “The best way to have a good idea is to have a lots of idea (Ngaihtuahna tha neihna tha ber chu ngaihtuahna neih tam a ni)” a lo ti a. Hei hi zirlaiten kan vawn reng a tha. A chhan chu keimahnia awm ( kan chhungril finna inphum ru) haichhuak lovin kan zirtirtute chungah ringawt rinna kan nghat lian lutuk ang tih a hlauhawm. Zirlaiten kan tlakchham ber chu mahni inrintawkna (Self Confidence) hi a niin ka hria a. Zirlai tam tak chuan mahnia thudik haichhuah hranpa pawh tum lem lovin kan text book a awm ang ang leh kan zirtirtute zirtir dan ang ang hi thudik pumhlumah kan ngai mai thin a. Keimahniina a dik nia kan hriatchian ngei thil pawh kan din tlangpui ngam lo fo thin. Hei hi a pawi hle mai.


Kan thil hriatchianah pawh kan din ngheh ngam thin loh lai hian state danga kan zirlaipuite chu an thil hriatchian lohah pawh huai takin an dingheh ngam pui a, kan tluk lo hle a ni. Chumai bakah an thiam loh an zahpui lovin an thil hriatchianloh hriat ngei tumin zirtirtute zawhna zawh an ching a, an thil hriat zawng an zawt fuh a nih phei chuan chhan an inchuh luai luai thin. Hetah tak hian kan danglam ta hle mai. Keini ve kan hriat loh thil a awm pawn zirtirtute zawhna chang kan hre lova. Kan hriatchian ve zawng thilah pawh ‘a dik lo mai ang a’ tih emaw ‘mite`n min nuihzat mai ang a’ tiin hlauhthawnain kan khat a. Hei vang hian zofate hian creative idea hi kan neih loh phah niin a lang. Tun hnaiah civil services a Mizo inziaktling kan tlem tawh tih thawm a ri ngun mawlh mawlh ta hle a. Hei pawh hi a chhan pui ber chu zirlaiten lehkhazir dan kan thiam tawk loh avang leh exam naa mark sang hmuh ringawt tum a, kan zirlaia ngaihtuahna tak tak seng lova, a bu chhunga awm ang ang leh zirtirtuteina min zirtir dan ang anga kan pawngpaw by-heart vak vak thin vang hi niin a lang.


Khawvel pum anga thlirin Asia mite hi he thil thar ngaihtuah chhuah theihna thuk leh ril (creative idea) nei loa sawi an ni thin a. Chung zingah chuan keini zofate hi kan bang bik lo mai nilovin a nei lo ber hlei hleite kan ni hial awm e. A chhan leh vang tam tak a awm thei ang a, mahse chung zinga buk rit ber chu kan culture vang hi a nih a rin theih awm e. A chhan chu pi leh pute atanga kan inzirtir danah ‘Aia upate thu chu eng thu pawh nise, a kip a kawia zawm tur’ tih leh ‘Mahnia upa zawkte thu thua awm tur a ni’ tih zawnga inzirtir thin kan ni a. Hei hian aia upate zah nachang min hriattirin mizo khawtlang nunah rah duhawm tak a chhuah lain kawng lehlama ngaihtuah chuan hei hian naupangte leh thangthar zel teah mahni tawka ngaihdan bik an neih lohtir phahin, chu chuan anmahnia finna leh thiamna inphumru a hupbeh saka, mahni inrintawkna an tlakchhamtir phahin an zirtirtute`n an zirtir ang ang kha a zawng a zain dik famkim vekah an ngaihtirin an zirnaah pawh ngaihtuahna an hman tlem phah a. Hei hian a rahchhuah chu inhrilhhriat leh hranpa kher ngai tawh lovin a chhunga chengte hi a hretu vekte kan ni e.


Tun hnaiah ziaktu hrang hrang ten kan zoramina a mamawh nia an hriatte chanchinbu kaltlangin an rawn tlangzarh thin a. Heng thil zawng zawng hi kan mamawh lo e ka tihna phei zawng chu a ni hauh lo. Nimahsela, chung zawng aia kan ramin mamawh zawk kan nei a. Chu chu – mi zir sang, degree nei sang satliah ringawt nilovin; mifing, mi ril leh mi thuk, sap hovin ‘Philosopher’ an tih ang tak tak mi hi an ni. Keini zofa hnam tlemtete tumah dip daltu nei hauh lova, zalen taka kan ram ngeiah kan awm theih chhan chu eng nge kan tih chuan British hunlai ata tawha min hung bikna ‘Inner Line Regulation’ vang hi a ni a. Hei hi India independent atang ata tawh ngaimawhtu an tamin, tunhnai maiah pawh thiah thuak a ni hman tawhin, ram hruaitute hmalakna avangin an sut leh chauh ni tein ka lo hria a. Engpawhnise, thil chiang tak chu engtikah emaw chuan he inhungbikna dan hi hlih hun chu a la awm tho tho dawn niin a hriat a. Chutiang hunah tak chuan zofate hian mi fing, mi ril leh mi thuk, sap hovin Philosopher an tih ang hi kan mamawh zual dawn hle niin a lang.


Thu leh hla khawvela a hming dai tawh lo tur American Lawyer ropui Norm Sherman chuan ‘Good law schools teach you to think like lawyer. But the top law schools teach young people to think; just to think. And that makes a potentially great lawyer’ ti meuhin suangtuahna hlutzia a lo auchhuahpui chiam tawh a. A ni lah taka a, khawvel history kan thlir pawhin Jean Jacques Rousseau-a ngaihtuahna puakchhuah (Social Contract theory) avanga French lal thuneihna paihthlaa democracy rorelna a lo parchhuah dan kan hmu a. Chutiang bawk chuan England rama Glorious revolution an tih mai, Stuart lalho an paihthlak pawh khan an ngaihdan zamna hnar ber chu English pachal John Locke-a theory avang tho hi a ni tih pawh kan hre thei a ni. Chuvang chuan, Greek mifing Aristotle-a thu leh hlate leh English pachal John Locke-a te thu leh hla (Idea or theory) kan zir thin ang hian zirlaibua zir tlak theory vawrhchhuah thei leh kan ram retheihna khawvel ata chhanchhuak thei tura a ngaihtuah ril pai mi zofate zingah hian awm thei se zawng kan ram hian khawvel denchhuah hun hi a la nei mawlh ngei ang le. Khawvel hriata kan ram leh hnam pho lang tur hian mi ril leh thuk (Philosopher) te chuah hi kan ram nghahfak an ni a, chung ang mite kan ramin kan hmu zo lo a nih zawngin boral mai lo chu kan ram hian hmabak a neih loh hmel e.


America Poet ropui Walt Whitman thusawi hmang hian han titawp teh ang. Ani chuan, “Ngaihtuah la, ngaihtuahtha leh la, la ngaihtuah zel rawh. i ngaihtuahna avang khan khawvel hi a danglam thei a sin” tiin suangtuahna (Creativity) neih tulzia chu a Poem chuam “Song of myself” tihah a lo sawi chhuak tawh a. He thu hi keini zirlaite hian hre reng ila, kan zoram khawvel chhanchhuak tur hian keini zirlaite lo hi midang an awm chuang lova. He kan ram neih chhun hi ramdangte hriata pholang turin ngaihtuah ril, thuk leh tha (Creative idea) nei tur hian rilru i siamthar theuh teh ang u.


( He article lo ziaktu Tv. K. Remruatfela hi nikumah Synod Higher Secondary School ah a lut thin a. Tunah hian Bangalore ah 5th. yrs course LL.B 1st. Sem a zir mek a ni. - Samuel Lalrozama Hmar)

Mizo: Bangalore a lehkha zir tum te tan

Zirna avang leh eizawnna avangtein zofate hmun hrang hrangah kan darh ve ta nuk mai a. India ram khawpui ber Delhi tih loah phei chuan Bangalore hi Zohnahthlak awm tamna ber niin, a kum telin Mizo pawh an pung deuh deuh zel a. Kuminah pawh engemaw zat chu lo awmbelh leh ngei pawh beisei a ni a. Chung ka zirlaipui he khawpuia lo zir ve tumte tana malsawmna kawngkhat tal thlentu ka nih ve theih mial taka tiin ka theih ang angin Bangalore zirna lampang han luhchilh kan tum ang e.

I. Bangalore leh a chhehvel:

India rama khawpui thangchak ber (Fastest growing city) leh Technology khawpui (Silicon valley of India) an lo tih hial ‘BANGALORE’ hi khawpui naupang tak kum 1537 vela hmuhchhuah chauh a ni a. Nimahsela, heng a naupanna te hian a ropuina a tihdal phah chuang reng reng lova. A khawthleng a mawiin a ram sik leh sa boruak thuah pawh duhthusam a ni ringawt mai. Ami chengte lah an hawihhawmin, engtik lai pawh hian an hlimsar reng thei a, biak vel pawh an nuam em em a ni. Tihian ka ngaihtuah thin a, keimahni duhthu ngei hian khawpui hi han duang chhin dawn ta ila, Bangalore khawpui ang tho hian kansiam leh mai lo maw? tiin. Chu chu, he khawpui mawina lo tem tawhtute ngaihdan pawh a nih ve tho ka ring thin.

Nikum atang khan khawvel khawpui ropui ber berte ina an neih thin, khawpui ropui nazawngin an neih phak loh Metropolitan city ni turin, lei hnuai rel kan tih mai thin ‘Metro’ chu leichungah zawk an buatsaih chho mup mupin kum 2012 a zawhfel hman tura ruahmanna siam a ni a. Chumi an sak zawh hnuah phei chuan engtiang taka ropui nge a nih ang tih hi ka mitthla lawk thiam hrih lo. Tin, kumin kumtir mai atang khan India rama (Asia ram pawh a ni hial zawk lo maw?) shopping mall lian ber ‘Mantri Mall’ pawh mipui dawr theih tura peihfel a ni a. Hei pawh hi Bangalore nawmna leh ropuina belhchhahtu a ni. Nimahsela, khawpui naupang tak a nih avang hian Historical Monuments hmingthang hmuh tur chu a awmlo ve angreng hle a, hemi kawng thuah chuan chhuan tur a awm meuh lo.

Information Technology khawpui a ni kan tih angin hmun changkang leh nuam tak tak tlawh tur a tam hle mai a. Chung zinga mi ten an tlawh zin ber chu intihhlimna hmunpui an tih mai ‘Wonderla’ an tih hi a ni a. TV a kan hmuh thin intihhlimna zawng zawng ang hi a kim vek ti ila ka sawi sual lutuk ka ring lem lo. Chubakah khualzinten an tlawh hmaih ngai hauh loh chu Glass veka an hung pangpar huan mawi tak ‘Lalbagh Botanical Gardens’ an tih hi a ni a. Hei hi khualzinte hiptu ber pakhat a ni. Chulo pawh hmun hmingthang leh nuam tak tak India rama inchhawng sang ber tih te khawpui chhung atanga hla vaklo tlang mawi leh nuam dangdai tak ‘Nandi Hills’ an tih te a la awm teuh a, ka sawi seng rih lo a ni ber e. Heti khawpa nawmna chitinrengin a bawh a nih avang hian foreign atanga tlawhtu pawh a nei awl lova. Weekends leh holiday nikhua vela sap, khawchhak leh negro thalai te nena boruak thiang nuam taka kara he khawpui nawmna chen tura tlaini han len vel chu a hrehawm hran lo hle. Amaherawhchu, vanduaithlak takin Mizoram House a la awm rih lova, tunah a ruhrel a awm tan mek chauh a ni.

Bangalore-ah hian Zohnahthlak tak hi sanghnih chuang vel kan awm tawh niin an sawi thin a. Chung Zo hnahthlak rual thuikhawm tur chuan pawl chak tak pathum B.M.A (Mizo welfare kengkawhtu ber), BMCF (Mizo kohhran enkawltu) leh MSA, Bangalore (Zirlai pawl) a awm a. Chawlhni tlai dar 3:00 apiangin hmun laili takah Mizo zawng zawng huapa inkhawmna a awm ziah a. (Nipui nikhuaah chuan inkhawm hun hi tih danglam zeuh zeuh a ni.) Chumi hma dar 1:30 ah mi thahnemngaiten BMCF Prayer Cell bultumin tawngtaina hun an hmang ziah bawk a. Chumi zawhah inkhawm tan hun hma thleng Pathian faka zaihona hun leh sharing huna hman thin a ni bawk a, a hlawkthlak thin hle.

II. Zirna sikul tha zual te:

Bangalore mite reng reng hi zirna ngaisang hnam an ni a. ‘Bangalore city is the city of education’ tih pawhin an lo sawi hial thin a ni. Kan article ziah hunin a zir tawh loh avangin Mizo Quata hmanga Engineer zir tumte tan leh Asia rama Law school tha ber NLSIU a luh tumte tan chuan kawng a tlai tawh a. Nimahsela, hengte tello pawh hian zirna sikul tha tak tak tam tak a la awm teuh tho a. Chung zinga a langsar zualte leh Mizo hovin an bawh tam deuh admission tih nana la tlailo nia ka hriatte chu ka theih ang angin tarlan kan tum ang a. Nimahsela, Chanchinbu pangngaia tihchhuah tur a nih avangin a sei lutuk loh nan a pawimawh zual chauh ka`n tarlang zuai zuai mai ang e:-

1. St. Joseph College : Roman Catholic institution a ni a. Mizo Bangalore-a lehkhazirten an bawh tam deuh ber pawh a ni. He College ah hian line hrang hrang – Arts, Science, Commerce, BCA, BBM, BBA, Journalism, Bio-Technology leh a dang tam tak a zir theih a. A lut duh tan hun a la tlai lovin, June thla vel atangin Admission an hawng tan thin a, a tlangpuiin degree course zir tur tan chuan a chhe berah pawl 12 Second a pass chin tal an duh thin a ni. No 1 atanga No 5 thleng hi an course offer leh admission tih hun a inang tlan deuh put avangin ka rawn tarlang nawn tawh lo mai ang. A chanchin kimchang hre duh tan :

Office : 080 22211429

Principal : 080 22272299

Website : www.sjc.ac.in

2. Mount carmel:

Telephone Number : +91-80-22261759

Tele Fax Number : +91-80-22286386 (Googles a college hming chhut tawpin an website a hawn vek theih a, ka rawn tarlang lo mai.)

3. Jyoti Nivas:

Phone Nos:
Degree Block :25530137
Post-Graduation Block :25502143

4. KhrishtuJayantiCollege:

Tel: 080 - 28465611 / 28465353 / 28465770

e-mail: kristujayanticollege@vsnl.com

www.kristujayanti.com

5. BISHOP COTTON WOMEN'S CHRISTIANCOLLEGE:

Tel:+91(80) 22212933; +91(80) 22129880; +91(80) 56955377

Fax:+91(80) 22100512

E-mail:bcwcc@blr.vsnl.net.in

Website :www.bcwcc.org

6. GardenCityCollege : GardenCityCollege hi College lian leh rintlak tak a ni a. A hmaa mite ang bawkin admission tih hun hi a la tlai lova. A college mala Course offer nei tam ber a niin, zirtur thlantur pawh a tam hle a. A course offer te a hranpain ka rawn tarlang lo mai ang a, hrechiang duh chuan an website ah kan en mai dawn nia:

Phone : +91 80 25288831

Website : www.gardencitycollege.edu

7.K.L.E. Society: K.L.E. College ah hian B.M.A. hmalaknain nikum atangin Mizo an awm tan a. Bangalore-a College tha leh changtlung ber pawla ngaih niin Institution that zawng tehtu sang ber NAAC pawhin Grade sang tak ‘A Grade’ a pek hial a ni a. Chuvangin seat chan a har deuh hlek a. Mahse, division pangngai deuh tan chuan seat chan loh a hlauhawm chuang lo e. A course pek theihte- Law, Pharmacy, Bio-Technology, B.D.S., Journalism, B.A., Hotel Manganent, B.C.A., BBM etc te a ni. Admission hi a tlangpuiin June thla atangin an hawng tan a ni.

Contact Details:

K L E Society, Bangalore

Bangalore. Pin Code, 560 010. State, Karnataka. Phone, 23325020. Fax, Data Not Available. E-mail, Data Not Available. Website, www.klesociety.org ...

8. C.M.R Management Studies: CMR Institution hi institution lian leh changtlung tak a ni a. A campus a nuamin, a zirna pawh a pangngai hle a. KLE leh Garden city College-a course an pek theih ang chu an pe ve thei deuh vek a ni. Hrechiang duh tan:

CMR Institute of Management Studies; No.2, 3rd 'C ’ Cross;

6th 'A’ Main, 2nd Block

HRBR Layout,

Bangalore- 560 043,

Karnataka - India

By Telephone : 25426177, 56971348, 55353899

By E-mail : info@cmredu.com

9. Bangalore management academy: BangaloreManagementAcademy hi India rampuma management zirna tha ber pawla sawi a ni a, heta lut thei ngatte phei hi chu mahni tawkah an induh ve hle thin a ni.

Bangalore ManagementAcademy (BMA)

#17, AshirwadTowers, Doddanekkundi Cross,

Marathahalli, Mahadevapura Ring Road,

Marathahalli Post,

Bangalore - 560 037

Tel: +91-80-2853 3132 / +91-80-42116524

Fax: +91-80-2853 2099

10. Ramaiah College: RamaiahCollege hi Bangalore-a private college changtlung ber pawl a nin line hrang hrang zirtur a tam hle a. Hrechiang duhtan:

www.msrit.edu - 080 2360 6934 - More

www.msrcasc.org - 080 3600966 - 1 review

www.msrmc.ac.in - 080 23602079 - More

www.msrit.edu - 080 23600822 - 1 review

Ph: 080- 23602926 / 65708015

E-mail: info@msrcl.org

11. Presidency NursingCollege: Bangalore-a nursing zirna lar ber leh Mizoten an bawh tam ber a ni a. Hrechiang duh tan:

Contact For Admission

Presidency NursingCollege

K.J Joseph, Manager

9847262161(Kerala) 09845277557(Bangalore).

12. Christ University: Bangalore zirna chungchang sawi nikhuaa an sawihmaih theih hauh loh chu ChristUniversityCollege chanchin hi a ni a. College tha leh changtlung tak niin, luh pawh a harsa em em a. He College-a Law/BBM/BBA zir tur hi chuan Entrance Test paltlang a ngai a. April ni 25 atang khan Application form an pe chhuak tanin May ni 20 thleng thleng submit theih a ni a. Kan lut duh a nih chuan bawhzui vat a ngai a nih chu. Hrechiang duh tan:

Address: ChristUniversity, Hosur Road, Bangalore - 560029, Karnataka, India

Phone Numbers: +91 80.4012.9100, +91.80.4012.9012 (IVRS)

Fax:+91.80.40129000

Email: mail@christuniversity.in

Website: www.christuniversity.in

Heng kan tarlante hi a lar zual chauh a ni a. Heta kan tarsan si loh Engineer, Medical, Law, Fashion, Computer, Arts, Science, Commerce etc tam tak zirna tha tak tak a la awm teuh a. A thui lutuk loh nan a tha zualte leh Mizoin kan bawhzual deuhte chauh ka rawn tarlang ta mai a ni e.

III. Zirlaite hriattur:

Mi thiamte leh mi thil chik mitten an chhut dan chuan Zoram economy eichhetu lian ber chu state pawna lehkhazirte hi an ni a. An sum deuh ral nasat ang hu hian Zoram tan an pulut tawk lo a ni an ti a. Heihi a dikna chen thui tak a awm ka ring a, phaia lehkha zir mekte leh la zir zel tur ten kan ngaihtuah chian viau a pawimawh. Mi tam tak chu nunphung leh lifestyle a inthlak nasat em avangin in adjust thiam lovin an tlukbo phah nual a, a pawi hle mai. A pawimawh berah chuan Mizo welfare a theih anga tam inhman a tha a, hei hi thu tha leh fuihna kan dawnna hnar ber a ni. Tin, zirna lamah pawh zirlaite engtiklaia min tanpui inhuam reng zirlai pawl MSA, Bangalore an awm reng a, tha taka an hmalakna tawiawm hi zirlaiten kan bat liau liau a ni. Anni hian zirlai harsatna neite an tanpui thinin lo kal thar turte an theih ang tawkin kawng an lo kawhhmuh bawk thin a ni.

A pahnihnaa ka chah duh chu Mizo zirlaiten harsatna kan tawh lian ber chu English/Talking ah leh thla hmasa chhuaka ka rawn tarlan ngaihtuahna ril leh thuk neih (Creativity) ah hian a ni a. Hnamdang zirlaipuiten an ngaihtuahna mawi tak saptawng nalh taka an chham zuah zuah theih lain keini Mizote ve chu tim teuh chungin ka phun ri ve sar sar ngam chauh thin a. Chumi a nih avang chuan phaia lehkha lo zir thar tur te chu chawlh chhung reilote ah hian a theih anga nasaa English lo practice lawk turin ka chah duh che u a ni. A chhan chu tun thla khat chhungte hun in neih laia Spoken English Class te kala in lo inbuatsaih uluk phawt chuan in first day atangin tawngah confidence a pe che u ang a. Chu chuan in hmalam hun thui tak a hril ka ring tlat a ni. Sap thufingah pawh ‘A good beginning is a half ending’ tih a nih kha maw!

A tawpna berah chuan a tam thei ang ber Mizo Lehkhabu leh Chanchinbu lo keng thla thei ula ka duh. A theih phei chuan Student Outlook hi subscribe ve ngei ngei rawh u. Khulamah Mizo tawng lehkha chhiar tur avang dawn teh a nia. Saptawng lehkhabu hlir i chhiar chuan i knowledge a zim tial tial palh ang e, chu chu keima experience atang ngeia ka sawi a ni e. Lalpa tih hi finna bul a ni tih hre reng la.

Phillipi bung 4, chang 13-a kan hmuh ‘Mi tuchak tuah chuan engkim ka ti thei a ni’ tia Tirhkoh Paula`n a lo sawi ang hian rilru paukhauh tak chungin i hmalam hun nangmah ngeiin huaisen takin sial tum la, a tawpah hlawhtlinna ropui tak i lo chan ngei theih nan ka duhsakna sang ber pawh ka hlan nghal bawk a che.


[He article lo ziaktu Tv. K. Remruatfela hi 2008-2009 session-a Synod Higher Secondary School atanga Pawl 12 pass chhuak niin tunah Bangalore ah 5 yrs course LL.B 2nd Sem a zir mek a ni. 'lore khawpuia zirna run sang bel duh te'n in tangkaipui ve ngei ka beisei - Samuel LalrozamaHmar ]

Friday, June 18, 2010

Mizo: Tlangval VANDUAI-Vanneia

“Keichu!! Chhas nei thei dinhmunah pawh ka la ding lo, neih pawh duh viâu mah ila, kan dinhmunin a la phâk ve lo. Thawhchhuah pawh ka la nei si loa, ka chhungte thawhchhuah hian ka pocket-money tûr pawh a daih meuh lo a niâ, pawisa dîl hlek chuan inhauh tan a ni zêl a, chuta kâra chhass lo neih ve khanglân chuan inhauhna tûr a tam lutuk dawn asin.

"Tûnah hi chuân ka chhiatloh ang ang hian ka awm mâwl tawp mai (haha), star neih teuh hi ka chan tâwk a ni hrih a. Star te han phone a, chhuâk tûra sâwm te pawh a châkawm ve thei khawp mai. Han phone ve thin mah ila sawi tûr a vâng thin khawp mai; sum chu han awm se chuan ‘naktûkah i hman chuan chhuak dûn ila,’ ti mai tûr kha ka nia, hmêl leh pian a en chuân zei nih te pawh kan hlawh ve mahna! J Mahse sum a awm si loâ, engmah sawi tur hre lem loa in mangtha leh tawp hi ngai thin a, a zia lo thei khawp mai” a ti a.

Mahse chu tlangvâl vek chuan “Kan zirlai leh kan thiltih apiangah rinawm leh rim taka Pathian bêl chunga kan thawh chuan, tuna kan star te hi changin chang lo mah ila, an aia hmeltha leh no tak tak lo chawr chhuak mêk te zinga mi pakhat hi chu kan tâ tur a ni si a” a ti leh a.


[He tlangval hi ka hmelhriat tha tak a ni a, a hming chu tarlang kher lo ila, in lo hre ve nuâl maithei si a (a bîk takin nula hoin); a thusawi ho tê hi in lo hriat ve atân ka han târ lang duh ani. Hlimna hi za-a-sâwm chu kan chunga thil thleng vâng ani a, za-a-sawmkua erawh, chû thilthleng chu kan dawnsawn dân azir a ni.


Kan nun hi duhthlannain a khat a, thlahtu bul Evi leh Adama atang tawh khân duhthlanna hian he khawvel hi a ti danglamin a her kawi ani. Rilru hah laia thil ho tê tê, mahni inngaihsânna ang chi te, ngaihtuah te hi hlimna ho tê min pe theitu a ­­­ni fo thin, mahse chu chuan kan ngaihtuahna awh khat reng lo se.


Suângtuahna khawvêla chên châng nî te awm ve zeuh zeuh a tha e, suangtuahna tel lo chuan ram ropui pawh a thlen theih loh ani, te pawh an ti hial thin; mahse chû khawvêlah chuan mi tam tak an boral thin si a...


Chuvângchuan he tlangvâl vânduai (emaw in ti) - (inla) vânneia ang hian nang pawh, i dinhmun in en chiang la, hring channa khawvêla hniak-hnung tha tak neia Pialrâl thleng ngei thei turin insiam la, duhthlanna tha chu han siam ve vat teh le ka unau. - Samuel Lalrozama Hmar (Editor BMA AW, the Bangalore Mizo Official newspaper, Vol.XV Issue no.19, Dated Aug 9th 2009]