.jpg)
“Chutichuan, Krista hnenah kaihthawhin in awm ve tawh chuan chung lam, Pathian ding lama thu Krista awmnaa thil awmte chu zawng rawh u. Chung lama thil awmahte chuan in rilru nghat tlat rawh u, leia thil awmahte chuan nghat lovin.” - Kolossa 3:1-2
“Vanlam Ngaihna” han tih chuan kan rilru ah lusunna emaw thihna lampang emaw a lo lang nghal deuh zat in ka ring. Ni e, kan hmangaih em em leh kan la thlakhlelh ngawih ngawih laia kan duhtak mai ten chatuan ram min han pan san mai hi chuan rilru hian vanlam a ngaiin kan hmangaih kalta te lenna hmun tur lam, rilru ah a cham reng thin a ni. A nih loh vek leh rilru hi a beidawng a, mahni intih hlum mai duhna te rilru ah a lo lang chuai chuai thei bawk.
Mahse, tuna ka thupui atana “Vanlam Ngaihna” ka han tih chhan chu lusun vang lam emaw, chhiatna leh lungngaihna tawh vang lam emaw a ni lova, a chunga ka Bible chang thlana kan hmuh ang khian, piangthar tawh, Lal Isua nun tawmpui ve tawh tute kan nih chuan kan rilru hian englai pawhin vanlam hi a ngai tur a ni tih lam hawi zawnga han sawi ka duh a ni.
A tlangpuiin mihringte hian (Kristian intite zingah bik hian), kan nawmlai leh kan hausakna in min tih nawm lai te hi chuan Pathian hi kan rilru ah hian a lang ngai meuh lova, a chhan chu min awitlei thei tur thildang kan nunah kan lakluh thin vang a ni a, mahse kan nawmna leh kan hlimna te chu a lo chuai a, chung hunah erawh chuan kan rilru in Pathian a au a, lungngaihna kan han tawh chiah phei hi chuan kan chhungril hi a rumin a rum tlawk tlawk thin a ni. Tawngtai tamah te, Inkhawm taihmak ah te, Camping-a luh duhna te kan put phah hial thin a ni. A engapawh chu lo nise, Pathian hnaih duhna keimahnia siamtu an nih chuan engpawh mai hi a tha vek a ni. Khawvela awm kan nih miau avang hian ringtute hian kan nunah harsatna tamtak kan tawkin, a chang chuan tluk changte pawh kan nei thin, kan nawm deuh leh kan hlimna in a vawrtawp a thlenlai ngat phei hi chuan vanlam hi kan hre chang tawh lo reng reng a ni, a chhan chu kan nunah hian thildang Lal Isua aia langsar zawk hi a lo tam em em mai thin a, chu chuan hmuh theih loh leh nghal kan Pathian leh min chhandamtu kan Lal Isua hmel hi a lo hliah leh mai thin a ni.
Mahse, Bible chang kan hmuh ang khian, misualte kan nih lai leh bawlhhlawh hlawm khawm kan nih lai, kan thlarau thleng maia Pathian laka thi kan nih lai meuh pawha hmangaihna avanga thisen far zawih zazwih khawpa tuartu, min chhandamtu Isua Krista rualin Pathian chuan min kaitho ve a, chatuana boral tur kan thlarau nunna leh kan sual ngaihdamna te nen Lal Isua chu Pa dinglamah a han thu ta a, kan aiawhin Pathian hmaah a han ding a, thiamloh channa reng awm tawh lovin, Lal Isua thisen hlu ah chuan a lungawi em em a ni.
Chutak chu a ni, Paula’n chunglam Krista awmnaa thilawmte chu zawng tura min lo hrilh, chutah chuan thihna in kan taksa a fan chhuah huna kan thlarau a kal huna he khawvela kan awmdan ang zela kan lawmman tur chu buatsaihin a awm a ni. Chu lawmman chhe theilo chu englai pawhin kan rilru ah suangtuahna nena mitthla chung zelin he khawvelah hian nung turin min ti a, he khawvel thil reilote atan chauh leh reilote hnua chhe leh mai thei chungah hian kan rilru te nghat lo turin min hrilh a ni.
Chuvangin, Lal Isua ruala kaihthawh tawhte chuan vanlama kan chanvote a lo len deuh deuh theihna tur leh kan thlarauin chatuan meidil a luh loh na turin vanlam a roreltu kan Pathian ropui ber hi tih ila, he khawvelah hi chuan ringtute tan chuan hrehawmna a tam em em a, mahse mikhual mai kan ni tih in hre rengin, min chhandamtu Lal Isua hi tawlhbo san lo turin kan ke chheh te ti nghet ila, Amah ah chauh innghatin, midangte en tawh lovin, vanlam atanga min lo thlir rengtu kan Pathian hian min en liam mai mai lo a ni tih hi i hre reng ang u.
Ringtu hawikirte zinga chhiar tel kan nih lohna tur leh kan rilru in vanlam a ngaih em em theihna tura chakna min pe theitu Thlarau Thianghlim kaihhruaina chu chang thei theuh turin tawngtai ila, Pathian remruatna fing tak leh Lal Isua, kan aia Lal hmaa han ding chuan englai pawhin a hre reng che a, i tan a dilpui reng che a ni tih hre reng ang che. Vanlama thil awmah te i rilru i nghah tlat theihna turin Lalpa’n malsawm che rawh se.
[He thuziak tha tak mai hi ka thian tha em em mai, LALHRUAITLUANGA HMAR (Vala) ziah a ni. Bangaloire Mizo Christian fellowship official newspaper: Koinonia [vol.VI, Issue No.1 (April 1, 2011)]-ah editor ka nih laia ka chhuah a ni. He thuziak i chhiar zawh hian inngaihtuah la, Van lama thil awmah te i rilru i nghah tlat theihna turin inbuatsaih rawh le ka unau - Samuel Lalrozama Hmar. ]
No comments:
Post a Comment