ÂW ZÛ!

Aw zu, aw zu!
Hlimna ruama min kai luttu zu duhawm,
Làwmna famkim min siamtu zu ngaihawm,
Ka in ning thei lo'ng che kumtluanin.
Sâp zu leh peh ṭeh angte'n i rawn inlar ṭhin,
Kei mi ṭawmkailo leh pachhe ber tàwnah hian.
Nang ka kiangah i awm phawt chuan, 
Ngaih dang rêng ka nei lo'ng khuâvel a'n.

Aw zu, aw zu;
Khaw vawh laia min awi lumtu,
Bahsam sei hniangi laka min chetsualtirtu.
Lanu leng rualte'n an hralh phal e
An thianghlimna leh zahawmnate, i tàwnah.
Lirthei khalh laia lu tihai zual ṭhin ka ṭhian duhawm,
Accident vangin min hruai thleng damdawi in nuam;
Natna khuma mut lai paw'n, phatsan zâi ka rêl lo'ng che.

Aw zu, aw zu;
Congress sorkarin siam ṭhat an tum maw MLTP!
A hma ang ngawtin kan hlau tawh lo'ng VDP.
A lo èng e hlimna kâwl,
Kei leh Zo ṭhalai zawngte tan.
Kan vote leh ngei ang INC,
Ṭhalaite mamawh ber zu min pek chuan.
Hei ngei hi a ni ram leh hnam din chhuahna.

Aw zu, Aw zu;
I tel lo chuan zàn tlai ka lêng thei lo,
Mutmu tuah zâi ka rêl thei lo,
Ka thlang ber che thil dang zawng hnawlin,
I tan chuan ka chhungkhat lainate pawh
Phatsan mai zel ta'ng e.
I vang lua te kan Zoramah hian,
Mahse, ka lungngai lo, ka tum a ruh, ka zawng zel ang che.

Aw zu, Aw zu;
Ka neih rosum zawng chàn huamin
Zankhaw tairek thlenga zawn che huamin
Ka rawn pan ang che, mihringte ṭhian ṭha ber.
Jail rûn thim min kai luttu mah ni la,
Lawm takin sawi zel nàng e,
"Hmangaih berte nen chuan
Khawi hmun pawh a nuam vek e."

_______________________________
Ṭha i tih chuan i bân phar rawh...