Mizo: I Bo Em?

Pathian Lehkhabu Thianghlim (Holy Bible) ah chuan bo (Lost) chi thum kan hmu a, chungte chu :

    1. Beram Bo (Luka 15:1 - 7)
    2. Duli Bo (Luka 15: 8- 10)
    3. Fapa tlanbo (Luka 15: 11- 32)
 

A chunga bo kan hmuhte zinga a hmasaber ‘Beram bo’ khian a bo a ni tih a inhria a, mahse kal ngaihna hre lo leh hawna tur kawng hre lo in a vak a vak a, amahin a pu (a neitu) hnen lama haw ngaihna a hre lo a ni. He Beram bo in a entir chu Kristian chhungkua atanga lo piangchhuak ve si, mahse la piangthar lo te dinhmun a ni. Kan pianthar hma chuan Sande Sikul kan kaina leh kan inkhawmna atangte n kan bo thu hi chu kan hre tlangpui vek a. Mahse, mahniin kaldan tur leh khawilam kawng nge kan zawh dawn tih erawh chu a tlangpuiin kan hrelo hlawm thin a ni. Tichuan, beram bo chu a pu in a rawn zawng zel a (a bo miau avangin), a be ri atangtein a pu chuan a awmna chin leh a mangang a ni tih te a rawn hmu thuai thei thin a ni. Chutiang bawk chuan keini Kristiannain a chhun ni tawh si, mahse piangthar loa la tal mai mai, chhungril tak taka Pathian chaka rum rum ve tho si thin te hi kan tawngtaina atangte leh kan mangang aurawl atangte hian Pathian hian a hnen lama min hruaikir dan hi a rawn ngaihtuah ta thin a,;A ta, Ama lak atanga bo kan nih miau avangin min rawn zawng thin a nih ber chu. Tichuan, beram bo chu a pu in a hmuh veleh lawm takin a in lamah a hruai haw a, a lawm em avangin a thenawmte hnenah, “Min lawmpui rawh u, ka beram bo kha ka hmu leh ta” tiin a lawmzia thu a auchhuah pui thin a ni. Keini pawh Pathian nena inpawhna kan neih chiah (kan pianthar) hian Pathian chu lawm namen lohin A lawm thin a ni. Chumai a ni lo, Pathianin a beram bo min hmuh leh ni chuan van a Vantirhkoh ho zawng zawngte khian hlim leh lawm takin an lo aurual thin a ni.
 

A pahnihna a kan hmuh ‘Duli Bo’ ve thung erawh khi chu bo zawng zawngah chuan zawn hmuh har ber chi a ni a, a chhan chu bo rau rau ah pawh khirh ber chi, bo tih pawh inhre lo, a bona chin pawh hre lo khawpa bo a ni a. He duli bo in a entir leh chu ringlo mi (Kristian nilo ho), sakhaw dang chhungkua tanga pianga, seilian ho hi a ni. Anni ho hian an bo a ni tih hi an inhre lo reng reng a, an inhriat loh dan chu Kristiante min hmuhsit dan leh kan Lal Isua an ngaihsan lohzia atang hian kan hre thei awm e. He duli bo hi chu a neitu in a zawn hmuhloh chuan a bo hlen a ni mai a, a neitu chuan a chan mai thin a ni. Mahse, hmanlai huna (he tehkhin thu sawi anih lai) duli hlutzia chu kan hrethiam theuhin ka ring. Chuvang chuan a neitu (a tibo tu) chuan nasa takin a zawng a, khawnvar hal meuhin a zawng thin a ni. Hetiang bawk hian heng ringlo mi tamtak, an bo a ni tih pawh inhre lo ho hi hruaikira, chatuan Nunna an neih theihna turin Pathian chuan he khawvelah hian khawnvar (Kohhran) a rawn chhi ta a, chumi eng (Kohhran rawngbawlna) atang chuan heng mite hian Nuntak an nei thei a ni. Anni hruaikir tura Kohhran hrang hrangten Pathian rawng kan bawlna (Kohhran rawngbawl ni lovin) hi a pawimawh zia chu kan hrethiam theuhin ka ring. He duli bo pawh hi a neitu pain a hmuh meuh chuan beram bo neitu ang bawk khan a lawm em avangin, “Min lawmpui rawh u, ka duli bo kha ka hmu leh ta ” tiin a thenawmte chu lawmpui turin a sawm a ni. heng ringlo mi kan tih te hi Pathian in a zawn hmuh ni (an pianthar ni) chuan vana mipuiho khian lawmin kut an lo ben khum dur dur thin hian ka ring thin. Anmahni lawmin lawm hla an lo sa rual ngei ang tih chu kan rinna mitthla pawhin a hmu vuai vuai hlawm thin ang tih ka ring.
 

A tawp bera bo kan hmuh ve thung erawh chu ‘Fapa Tlanbo’ a ni a, hei erawh hi chu ama duhthu ngeia bo a ni a, a bona chin a hria a, haw leh turin haw kawng pawh a hre vek a ni. Mahse, a pa lak ata tlanbo anih miau avangin ‘Bo’ tiha sawi theih zingah a tel ve tho a ni. He fapa tlanbo hi chu a hmaa bo kan sawi takte angin a pa hian a va zawng hranpa lo, a chhan chu amahin a rawn haw leh thei a ni tih a hrechiang a, chuvang chuan a rawn haw leh hun ngaichangin nghakhlel takin a lo thlir thin a ni. Hei hian a entir chu Kristian, paingthar tawh, mahni duhthu ngeia Pathian bosan lehtu te (khawvel lama kirsan lehtute) a ni a. Hei hian kan pianthar hnu hian Pathian hi kan bosan lehin, kan hloh leh thei a ni tih a entir. Mahse, Pathian chuan keimahni duhthu ngeia kan kal bosan chung pawh hian inchhira A hnen lama kan kir leh hun hi nghakhlel takin min lo la thlir thin a ni. Fapa tlanbo khan a sum neih ang ang hmanga nuam a va chen zawh a, a sumte a khawhral hnu khan engmah neiloin a lo awm ta a, a tawpah phei kha tam tlak avangin eitur a nei ta lo a, mi vawkchaw pe turin a inhlawh ta ngawt mai a ni. A lo retheih tak em avangin vawkchaw te kha a hmu tai rum rum mai anih kha. Mahse, a inhriat chhuah a, a pain lama eitur tamzia te leh kir leh se chuan puar taka eitur tamtak a nei leh dawn a ni tih a hriatchhuah leh meuh kha chuan a pa hnen lamah chuan a kir leh ta nge nge a. Mahse, a pa hnen a va thlen chuan a hmaa a dinhmun kha chang leh tlakah a inngai thei tawh lova, a pa hnena chhiahhlawh pakhat anga awm a va dil ta rawih a. Mahse, a pa ngilneihnaa khat leh a fapa a hnen ata tlanbo, a lo haw leh hun tur nghakhlel taka lo thlirtu erawh chuan a hmuh veleh lungchhe takin, lawm avanga bianga mittui luang chungin a fapa chu a rawn kuah a, a tah khum ta tlawk tlawk mai a ni. Chumai chu duhtawk loin a fapa lawmnan Sebawng no thau tak talhin, puan tha ber ber te nen a lo thuam leh ta a ni. A va han fel tak em! Keini pawh, kan pianthar hnu, Pathianah hlim taka kan awm tawh hnu leh Thlarau pawh sang tak kan lo chan ve tawh hnu pawh hian Pathian lak ata hi kan lo la bo leh fo thin a ni. A tlangpuiin mahni duhthu a tluksan leh kan ni tlangpui hlawm thin. Tichuan, khawvel lamah hlimna umin, kan theih lai leh kan chaklai te nawmna lamah va hmang zoin a tawpah beidawnna leh harsatna ten min lo tlakbuak leh nge nge thin a ni. A tlangpuiin khawvel partlana a nawmna te kan um lai hi kan that vanglai leh mahni tawkah pawh thei kan intih ve hunlai tak hi a ni tlangpui thin.

Mahse, he khawvel hlimna leh nawmna te chuan tawp chin an lo nei nge nge si a, tichuan a tawpah chuan beidawnna bawkin kan khat leh a, chumi hunah zet chuan Pathian Thlaraua kan tui lai leh kan hlimlai ni te kan hrechhuak a, inchhirin A hnen lam kan pan leh chawk thin a ni. Han ngaihtuah mai chuan, mahni duhthu ngeia kalbosan leh a, nawmna dang uma tluksan leh thin mihringte hi engtinnge maw min lo la pawm leh duh mai thin le? tih a awl rum rum thin a ni. Mahse, hmangaihna tawp neiloa min hmangaiha, a lainatna kang ngailo te a khawngaihna lantir thintu kan Pathian chuan kan sual ber lai leh kan bawlhhlawh ber lai pawh hian A hnena kan kir leh hun hi nghakhlel tak leh lungngai takin min lo thlir thin a, A hnena kan kir leh ni phei chuan lawm avangin Pathian hi a tah zawih zawih ka ring thin. A hnena kan kir leh hma hian mual kan liamsan ang tih hi a hlau thin ngawtin ka ring. Tichuan keini pawh inchhira A hnen kan pan leh chuan min lo khawngaihin, hlimna leh muanna nasa tak chu min lo pe leh dawn a ni.

Mahse, fapa tlanbo kha a pa hnena a kir leh khan hlim taka ruai theh ho e tilo chuan lungawi ve miahlo mi pakhat kan hmu tel a, chu chu a unaupa a ni. Ani kha a pa hnenah a awm a, thuawih takin hna te a thawkin a pa tihtur te a tih pui thin a nih kha. Mahse, a nau a lo haw a, a lawmnana ruai te hial an lo buatsaih a hmuh khan a rilru a na tlat. Hetiang bawk hian kan unau rinna tluksana, khawvel lama bosan leh tu te, inchhira sim chunga Pathian hnen an hawikir leh hian Kohhran ah hlimna nasa tak a lo thleng thin a ni. Mahse, hetiang hunah hian Kohhrana rawngbawltu tangkai tak, rawngbawlna kawngah pawh thawhhlawk ve thin tak te zingah hian lo lungawi chiah lo thin hi an awm thin a, anni engtiklai pawha Kohhran tana a kul ataia, a sur a sa hnuaia lo thawkchhuak thin, mi chawimawi hlawh em em lo mahse Kohhran a langsar pawl tak si te zingah hian misual sima inchhira Pathian lam lo hawikir leh ta te Kohhran in a a lo buaipui chiam mai han hmuha lungawi ta tlat lo mai hi an awm ve chawk thin a ni.

Tichuan, ‘Bo’ chi thum kan han sawi takte khi ngun takin han en ila, keimahni theuh dinhmun chu kan hrechiang thei vekin ka ring a, tichuan nang a eng bo ber khi nge i nih ve le? Han inngaihtuah vang vang la, i dinhmun tur awm ang  te han chhut han chhut la, tichuan he zawhna hi han inzawt chhin ang che, “I Bo Em?” .  

                                                        Lalpa’n A thu malsawm rawh se, Amen.   

[He thuziak tha tak mai ka thian tha tak LALHRUAITLUANGA HMAR (Vala)'n 21-03-2006 (7:10 p.m)-a BCA student a nih laia a ziah a ni a. Nang chauh ni loin i bul hnaia 'bo' awm te kha zawnga 'hruai kir' leh turin i inpeih em le ka unau? -  Samuel Lalrozâma Hmar]