.jpg)
Ram buai vang khan tawrhna hrang hrang thlengin thihna a thleng nasa a, fahrah leh hmeithai an pung a; Asia khawmualpuia la awm ngai lo khawkhawm a nih bakah economy, kohhran leh zirna zawng zawng chhe vek khawpa siam a nih kha. Chutih lai-in mi tam takin “Pathian leh kan ram tan” ti-in Mizo hnam tan hian mi 2470 zetin nunna an hlan a, mi 907 la sengkhawmloh an la awm bakah he movement avang hian mi 447 zetin ram tui lei lo-in an awm phah a ni. Vawiin chu 'Martar-te ni' a ni bawk a, Mizo nationalism kan lo tih ve fo hi keima mimal ngaihdana kalpui dan tur ka han sawi ve mai mai ang e:
Mizo nationalism hian hnam dang huat leh hmuhsit leh enhniam a keng tel lo a, hmangaihna vanga hnam dang nupui/pasal neite endawng a keng tel hek lo. Pi leh pute aṭanga kan rochun Zonunmawi, tlawmngaihna leh thil dang dang tunlaia kan hman theihte kan awmna apianga vawn nun leh Mizo hnam kan nihna intheihnghilh loh lam a ni zawk.
Hna kan thawk emaw lehkha kan zir emaw pawh ni se, a tiṭha ber nih kan tum tur a ni a, kan ni lo a nih pawhin kan taihmakna chuan mite mit a tlung tur a ni. Keimahni vanga Mizo hming a lo ṭhat chuan Nationalist takin hnehna aw kan puang thei chiah ang. Inkiltawih taka awma midang tihdan pawm duh hauh loh aia hnam dangte mithmuha ṭha taka nun leh kawm thiam, an thiltih leh chindan te zah der saka ṭhiana siam a, Mizote chu an lo fak zawk theih hi a ni Nationalism chu.
Pathian nung ringtu kan nihna tilang chunga khawtlanga theihtawk chhuahtute, hmelhriat ngai pawh ni lo sum leh tha hmanga ṭanpuia hun khawhral te ngei hi an ni Nationalist chu. Hnam dang kawppui neih loh chu duhthusam, nei an lo awm a nih chuan tih tlangnela Mizo socciety-a khung luh ve a, an kalzelna pawha kan hnam channchin a ṭha zawnga an sawitheihna hi a ni nationalism chu.
Chhungkua a hmingṭhat chuan thlahte pawh rin an kai a, a hmingchhiat chuan thlahte thlengin an hmingchhia. Chuti ang bawkin hnam dangte hmusita endawng mai lo-in Mizo hnam chawisan hi a ni. Hei bak hnam kan nei lo, keimahni vangin kan hnunga lo kal zelte’n Mizo nih nuam an rawn tih ve chuan kan hlawhtling a tih theih ang….
Pathianin min siam danah hian lawm nachang hria ila, talent min oekte hi tipung ang u, chu chu a ni mai lo maw Nationalism chu?
ENGANGIN CHANGKANGIN HAUSA MAH LA, MIZO I NI THO THO, I HNAM HI THEIHNGHILH LUL SUH
No comments:
Post a Comment