.jpg)
"Aw Lalpa vawiinah he hmun tlawmte aṭang hian i malsawmna vangin internet khawvelah cheng vein facebook te ka lo bih ve theih avangin ka lawm e. Heti ang thil te hi ka chan ve tur reng leh ka neih ve tur rèng emaw ka lo ti ṭhin a, amaherawhchu kei anga vannei ve lo, ni khata chaw vawi khat ei pawh nei ṭha mumal lo an awm tih ka hriat te hian 'i malsawmna ka tan a va hlu em!' ka ti ta.
"Sap ṭawng thiama technology changkang tak hrethiam ve sawih sawih theia ka awmte hi ka thiamna leh sum neih vang emaw te ka ti ṭhin a, mahse a lo ni hauh lo mai, lehkha zir tura mel tam tak kea kala electric pawh nei lo inchhung khura khawsa, sikul ban veleha hna thawk tura feh chhuak ṭhin an awm a ni tih ka hriat te hian bianga mittui luanga lawmthu sawi tur ka nih zawk zia ka inhrechhuak.
"Ka nitin nun hman dan hi ka ning fo ṭhin, ka chaw ei dawhkana eitur tuihnai te hi ka hne ṭhin; ka khum mutna te ka sawisel fo; zing ni eng hmua hna/zirlai zawm tura ka feh chhuak te hi peih lo takin ka kal hne hne a, chhuanlam siamin kal loh fo ka ching bawk. Mahse mutmu tuahna tur 'in' nei lo leh silhfen pakhat bak nei lo a khawsa leh ramtuileilo/piangsual (kea kal thei lo leh mitdel ldt.) ka hmuh tak chinah hi chuan insawisel loa lawm zawk tur ka lo nih zia ka inhre chhuak a, taksa peng ka nei kim hrim hrim pawh hi malsawmna a lo ni si a i hnenah lawmthu ka hrilh a che.
"Mi dinhmun awh tam tak ka lo nei ve ṭhin a, vanduai ka in ti fo bawk. Amaherawhchu ka thiamna ho té leh ka nun mawi tak leh mi puihna thinlung ka neih te hi mi ṭhenkhatin an lo awt ve ṭhin a ni tih ka hriat hian kan phak tawk ṭheuhah fakawm/chhuanawm kan ni thei a, i zarah hei aia sang hi kan thleng ṭheuh thei bawk a ni tih ka inhrechhuak a, vanduai reng awm loin duh taka i mi siam vek kan nihzia ka hre chhuak.
"Äw Lalpa ka ram leh hnam tan ka ṭawngṭai a, kan hruaitute hi finna pe thar fo turin ka dilsak e. I tan hian tih theih ka nei tlem hle, amaherawhchu he ram leh hnam (MIZO society) tana ka theih tawk ka chhuah hian i rawng ka bawl a ni tih a tharin min zirtir ang che. Ka unaute rèl ching loa ka hamangaih thar theihna'n leh ka nu leh pate ka chawimawia hnam dang zinga i hming ka tihṭhat theihna'n min pui ang che.
"A tawp berah chuan he Facebook, ka nun lairil luahtu pawihmawh tak pakhat, hi a ṭangkai thei ang bera ka hman zel theihna'n finna thar min pe leh ang che. Amen."
No comments:
Post a Comment