Lungaihna nge malsawmna?- Puipuia

 I piantirh ata, khawvelah hian hlimna i zawnga, i tawpna chu thlàn khur chhûng mai a ni. I puitling hnuin mahnia tla fâl ve thei khawpa lian niin i inhmu a, i tawpna chu tlakchhiatna mai a ni. Hlimna hi nawmchenna emaw i tih a, hausakna hi sum emaw i tih chhûng chuan mihring i nih chhan hi i hrechhuak zo ngai lo ang.

Hlimna chu nun a ni a, hausakna pawh nun tho a ni. Hlimna hun aiin hlimna i chen  dan a pawimawh zawk a, sum aiin a kawltu a pawimawh zawk bawk. Chu’ng zawng zawng hrethiam tur chuan i lungngaih a tul thin.

Mihring hi amah maia hlim thei ni se la, kan piang ve ang em? Mihring hi hlim chatuan tura duan  ni sela, natna leh thihna hi tiau vut zat angin leiah hian a inzârpharh thei ang em? Amah maia mihring awm hi A phal lo angin a hlim chhuahtu turin Adama tan Evi a pe a, Adma kha amaha hlim tawk thei em em tur ni se Evi leh midang te hi kan piang ve kher ang em? Eden huan hlimna kha hlimna tawp thei lo nen inzawm tlat mah se, nupa hmasa ber te kha thlèm thlûk theih leh khawih thlûk  theih an nihzia a lan a tang chiah khan mihring tana duan, lungngaihna leh beidawnna chuan Eden huan atang khan a zui chhuak ve nghal  a ni. A châng chuan hlimna hi nangma ta bil, tuma tel lo pawha i neih theih leh i chhar chhuah theihah i ngai thin te pawh a ni thei e, mahse i va rethei tak em!

Lungngaihna hi hringnun thawnthu holam berah ngaiin thlarau sual hnathawh ang lekah i ngai pawh a ni thei e. Mahse, mahni chauha hlim theia ingngai mihring chu mi khawngaihthlak tak a ni. Kan ngaihhlut ber tangka hian hmai hnih a neih chhûng chuan mihring nun hian nun hnih a nei ve zel tawh ang. A châng chuan hlimna hi i kiangah a infiam ve leh záwk emaw tih turin i nuam pawh a ni thei e. Mahse mihring i ni a, mihring dang nena cheng ho tura Pathianin leia a dah miau che avangin, i lungngaih a tul thin a, hlimna siamsak thintu che khan a tih lungngaih hun che a thleng thin. Hlimna hre fiah turin khawharna leh lungngaihna hi kan tawrh a tul thin tih i chhut ngai em?

Khawvela hla hralh tla ber chu lungngaihna kaihhnawih a ni a, chuti ang hla chuan kan lung  a tileng tlat thin. Lehkhabu-ah hian hlimna a kal tluang pur pur ngai lo a, hrehawmna leh lungngaihna bilh telna lehkhabu bawk hi ngaihnawm kan ti leh thin chu a ni. Hlimna min tawmpuitu kan mamawh ang bawkin, kan lungngaihna min tuarpuitu tur midang kan mamawh a, min tukzaltu leh min tichaktu tur kan mamawh bawk. Nun hi a kim loh nasat poh leh mihring kan nihzia hi a famkim thin! Chu kan famkim lohna tak chu kan famkimna tilangtu a nih miau avangin, lungphu tin hi harsatna hnuaiah a thum dut dut a, kan lungphu a reh rualin mihringin a zawn chawlhna chu chang dawn mah ila, vanduaina leh lungngaihna hre turin kan lungphu hi tawp lo se kan ti si. 

I duhzawng apiang neiin i lawm zawng apiang ko chhuak thei dinhmunah pawh ding la, harsatna leh hrehawmna hian hlate khuaah tlanbosan vek che sela pawh ti mah la, mihring i nihzia hre turin i lungngaih a tul. I nunah khan midang an tel ve a, midang tel ve lohna nun kawl tlat anga inhria te vanduaina tem tur hian tuma’n an phal lo ang che. Lungngaihna chuan a hmer thin ang chea, i vanneihzia i la hre chhuak zawk dawn a sin.

[He thuziak hi ka unaupa (cousin) ziah a ni a, Zirlaite Khawnvar (Bangalore Zirlaipawl chanchibu) 2007 ka enkawl laia ka chhuah a ni. - Samuel Lalrozama Hmar]