Mizo: KAN ZORAM HI BIAK IN LEH CAMPING ‘GOSPEL’ CHAUH HIAN A SIAM ṬHA THEI TAWH LO

Revival leh camping tih hi chu kan hre nasa tawh viau a ni. Thuhriltu ṭha tak tak pawh  kan nei a, Pathian mi hman lah kan tam. Heti ang renga harhna thlen hnemna hmun hi awm ve tak ang maw ti te hian ka ngaihtuah ṭhin. Piantharna hian kan nun pawh hi a chiahpiah hle bawk a ni. Camping kan han lut a, piangthar te pawh kan da leh kan ti a, insiamtharleh a lo ngai ṭhin a ni. Tin, ruihtheih thil  ti lo, pawn lama langa sualna nei anga lang lo te pawh kan chhungrilah kan ro hliah hliah ṭhin a, intihhlimna leh hlimhlawpna kan um a ni ber mai. Ṭhalaite lah kan nun hlui-ah kan let leh mai ṭhin, chutah kan nun kan ning a, camp kan lut a, Pathianthu-ah harh tharna te kan han chang leh a, ‘Kristian ram ni ve si, nun pawnlang nei, tlu leh hma ti-in kan lo indem ta mai ṭhin a nih hi . Àwm pawh a awm reng bawk a, tluk leh mai bak kan tihtur a awm lo… Kum za kan hman ral hnu pawhin he thil hi chu cycle ang deuhin a kual a kual zel mai dawn a nih hmel hi a!

Eng lai tak chu nge kan hlamchhiahna nit a le? Zofate hi nunze nghet nei lo, tlu awlsam hnam kan ni kan lo tit a mai a, a khaikhawmna’n chuan. Kristian lem awmkhawm te kan inti a, Chhiatna nasa tak bak lo chuan min siam ṭha thei tawh lo te kan tit a a nih hi. Mahse, thil pakhat hmuh hmaih kan nei a ni mi tam tak hian. Kan evangelist leh rawngbawltu ropui tak tak, kan kohhran lian tak inchherchhuan bur mai te hi an fail ta e tihna a ni hauh lo mai. An hlawhtling chiang khawp mai, camp chhuak tinah mita hmuh tur a awm awm e. Kan hnungtawlhna chu hei zawk hi a ni- Roreltu ṭha kan neih lohna zawk hi! Khawvel history kan thlir chuan ram hruaitu ropui tak tak te chauhin mi ram ropui an siam a, mihring taima leh hmathlir nei an chher chhuak a ni. Kan Pathianthu lehkhabu thianghlim ngei mai hi han thlir tai la, Pathian ngaihsak lo roreltute chu an tluchhia a, Pathian hremi te chuan an ramah rorelna dik an luan tir a, mihring puitling an chherchhuak ṭhin a ni. Roreltu te hi an pawimawhzia hi kan la hrehchhuak phak lo a ni mai thei. Isua Krista pawhin Zirtirtu ni turin thlan bik a nei a, a kohhran din turin mi tlemte a siam a nih kha, chuti ang zelin lalram chhung khatah chuan Pathian ruat lal an awm a, Pathian an ṭih chuan an ram a ropui zawk a ni ṭhin.

Kan ramah hian Pathian rawngbawltute’n theihtawk chhuahin  kan ram hi chhan an tum a, kawngkhar phena mi tam tak ṭawngṭaina zarah hian kan ram hian hremna leh chhiatna tam tak kan pumpelh a ni, an tih te pawh hi dik na chen a awm ṭeuh ang. Chutih lai-in kan ram aiawha ding, kan rorel khawl hian Pathian duh zawngin ro a rel tlat si loh avangin, hnuai lam amite siam ṭhat tuma chung lam amite an ṭhat si loh chuan thing zunglei hnuai-a ṭha taka rawn chawr chho chu a rawn chawr ruala a ram chunga roreltu huan neitupa chuan awmze nei lo-a a lo chil zel chuan a ṭo thei tak tak dawn lo a, rah a chhuah thei dawn lo ang hian kan lo tlu leh ta ṭhin a nih hi! Mimal ṭheuh indem tur kan nih lai-in kan roreltute hi kan dem tela roreltu ṭha kan neih theihna’na kan ṭanrual a ngai tih hi kan hla thar lo ni thei se a duhawm hle ang.

Hetah hian ka sawi tum ber chu kan political party awm te hi an tling zo lo tihna emaw kan mla leh kan minister te hi mi ṭawmkailo vek an ni e tihna lam pawh a ni lo. A mimal leh pawl anga dem tur kana wm hauh lo. Kan politics tuinu kan tih fo mai, he kan political system zawk hi her danglam a ngai a ni. Tun ang zela kan kal dawn a nih chuan a system hi thlak hlawk a ngai. Mi thar, ṭhalai ṭhe ṭhaw, ram leh hnam hmangaih tak tak, Pathian ṭih mi hian kan ram hi an hruai a ngai. Chuti ang hunah chuan biak in leh camping hmuna gospel kan thehdarh te hian rah a nei thei tak tak anga, Mizoram leilung luahtu tam tak te chu kan tlu leh tawh lo ang. Chuvang chuan change siam thei hmanraw chak ber ṭhalaite hian ram leh hnam dinchuhahna bulpui ber chu Krista a ni tih kan hriat rual hian, biak in leh camping gospel chauh ni lo-in Socio-political gospel hi kan hriatthiam aṭul a ni.

He khawvelah hi chuan mitin mai hian hlimna kan zawng a ni ber mai a, nun khawhar leh chau, hlimna zawn vanga eng eng emaw sual bawiha lo tlu ta, tal chhuak thei tawh lo te hi chhanchhuak tur chuan roreltu ṭha kan neih a ngai. Ṭhalai tam tak te chuan ruihhlo bawiha tan aṭangte leh mipat hmeichhiatna bawih aṭangin tlan chhuah kan chak, officer lian leh te te pawhin kan hnathawhna-a corrupt lo te kan chak ve tawh. Mahni mai chuan beih a har e kan ti a, camping kan han lut a, Pathian thu te kan zir a, fellowship te kan kal ve a. Chutah Pathian mi hman kan rawngbawltute kal tlangin harh tharna kan lo chang a, kan nun hlui chu tlanbosan chakin nun thar neih kan tum ve ta a, kar hnih khat emaw, thla khat emaw kum te pawh a ni ang, nun thar nei-in kan han awm leh a, MAHSE… ṭhalai nun ning tawh sual tlansan duh khan hnathawh tur mai a hmu lo a, lehkha lama thiamna sang lo nei ve pawh khan political fitness neih loh vangin hna a hmuh awm ngwaih ngawiha a ngaih a hmu lo a, hna hmu pawh khan ai kal a la a, aikala kal lah chuan ama hmuh tur ni awma a ngaih si ah hlawh tlemte nei-in a lo thawk ve a. Office ah pawh bul amite an corrupt vek a, sum sem a lo ngai a, mahni chauha duh loh chi a lo ni lo a, tui mal far pakhat mai a nih vangin a farluhna luipui-ah chuan a chen ve theihna turin midang ruala luan a lo ngai si ṭhin a ni.

Development khairual lo tak mai chu khairual tir ta mai ila, kan eiruk theih zawng zawng kan eiruk hnu pawh hian eng emaw chen ṭha taka hna thawh theihna  a la awm tho, chu pawh chu kan ti peih lo a, term leha tlin dan ngawt kan zawng a, hotute mit tlung ngawt kan beisei ta zawk a lo nih hi. Kan vai chuan kan ni e ka ti hauh lo, kan politician te pawh a mimalin ka sawisel hauh lo, an theihtawkin kan ram tan chuan an lo thawk ve ngei e, mahse ngaihna hre tawh lo, a chanve chauh ti duh, leh ti duh lo hrim hrimna boruak chuan a phuar tawh vangin tuna kan system chènna aṭang hian talchhuah a hart a a ni.

Engtin nge kan tih tak ang le! Theih tawka kan ṭawngṭai hi a pawimawh tak zet, ram hruaitute tan pawh hian kan ṭawngṭai ve ṭhin em? Mahni invei hmasak hi kan tih tur mak mawh chu a ni ngei mai, mahse Pathianin min pek rama nunphung pangngai taka kan nun zel theihna’n chuan min enkawltu kan  roreltute hi kan vei tel ve a ngai  tlat. Kan enthla a, kan enchin a, an theih loh leh tihhmaih leh hmuh hmaih tam tak pawh ṭhalai te chuan kan hmu ta ngei a nih hi, chuvang chuan kan thin a rim a, kan insang mar a, ṭhianho titian-ah te pawh politics hian hmun a lo chang lian tawh hle a, internet social networking site facebook lamah te pawh kan thinrimna te kan auchhuahpui nasa a ni. nimahsela hmanlai pasalṭha te kha chuan tlawmngai-a an puan chuan tlawmngai nih ngei an tum a, dawta an hek chuan a nih loh zia lanchhuahtir ngei an tum a, mi huaisen an intih pawhin atthlak takin an huaisenzia tilang turin an nunna thapin an fehchhuak ṭhin a nih kha. Chuvang chuan Mizote hi kan nun a nghet lo a ni mai thei a, mahse keichuan kan dawih lo a, nun  nghet kan nei thei ka ti vet lat a ni. Chuti ang zelin keini pawhin kan aw leh khawl hmanraw hmanga sawisel mai lo hian a taka kan chet chhuah a hun ve ta lo maw? Kan tu leh fate hi  kan rohlu neih hlu ber a nih si chuan keini hunlai mai baka an huna boruak ṭha kan siam sak hi kan tih tur pawimawh tak a ni dawn lo’m ni? Political party-ah hian ṭhalai pawl a awm ṭheuh a, chu’ng te chu ka ngen duh a ni, kan hotute mitt lung duh mai bakah kan ngaihdan leh duhdan te huai taka hochhauka, chechhuak ngam ve turin. Thil dik taka a kal chuan tu emaw chuan a tuar dawn ngei tih chu a chiang, keini ngei pawh kan post aṭangin kan bàn a ṭul mai thei a ni, amaherawhchu thilṭha tih reng reng thupin a awm ngai  lo, malsawmna kan dawng tho tho ang. Chuti anga kan chetna kawng chu kan party hlawhtlinna leh sorkarna siam theihna kawng pawh a ni zawk asin! Chuti anga kan ti thei lo a nih loh pawhin mithaim leh mi hmangchang hre zawk te hi rawn che chhuak se, vawikhat chiah chu ram leh hnam hmangaih tak tak leh Pathian ṭih mite hian kan ram hi han hruai ve chhin ta se a va duhawm em! Ṭhalaite hian kan thiltihtheihna hi kan hre chiang lo a ni, kan inpumkhat a ngai, chumi kawngah chuan kan mi thiam media lam enkawltute leh upa remhre tak tak te hi rawn che chhuak se rorelna dik, roreltu ṭha kan neih theihna’n hian kan beih tlan a va hunt a em?

Kan ram hi kum engzat nge kan sawisak leh dawn le?

-       Samuel Lalrozâma Hmar, Dawrpui

Mizo: CHENGRÂNG CHAWIIN

 * "Nang anga mi rinawm leh huaisen hi ka la hmu ngai lo. Nang aiin misualte chuan silai leh ralthuam an nei tha zawk tih i hre reng a, an tam bawk si a, engati nge i tlan chhiat mai loh?'

# "Ka pu, Mizo ka ni a, Mizote hian râl hma-a tlanchhiat ai chuan kan mawhphurhna, kan duty rinawm taka thawk chunga thih hi kan thlang zawk a ni."

* "Tun hnu-ah chuan Bank guard atan Mizo tlangval hlir dah theih ka tum ang."

Hei hi SBI, North east, hotupa ber leh Lalsanga Pautu inbiakna a ni (June 2000, Mawkyrwat branch, Meghalaya).

Assam regiment sipai bang Lalsanga, Republic field veng, Aizawl chu Bank security hna thawka a awm laiin misual rualin Jeep pahnih leh ambassador pakhat kengin June 6, 2000, chhun dar 11:30-ah an bei a; ulhbun pakhat leh a mu 5 chauh neiin a lo bei let a, a hliam nual a, pakhat a that bawk. police pahnih dang (Khasi leh nepali) a chung lama lo duty ve te chu an biru char char a ni. Boruak a zawh hnu minute 30 vel chuan station lam atangin police pawh an va thleng ve a. Police SP chuan police hnathawh anga lantirin chanchinbu-ah a chhuahtir a; mahse, SBI NE CGM leh AGM leh hotulian te'n thudik an zawngchhuak a, Sanga chu an chawimawi ta a ni.

Heti ang tawngkam hi Mizo nihna tichiangtu a ni khawp mai. Vawiinah hian silai kengin kan duty ve vek kher lo a, kan nunna thapin kan awm vek chuang  lo. Mahse, kan thiltih kawng apiangah hian midangte khùmtu ni thei in, kan duty na atang hian kan tlanchhe ngai lo, kan ti ve ngam dawn lo'm ni Zofate hian? A bikin thalaite hi incho thar leh ang u...  He kan ram leh hnam hi a tha zawnga a lo ropui lehzual theihna’n kan zirlai/hnathawh leh a dangah te ‘ber’ ni tur zelin thawk ang aw…

Mizo: SUAL RAWNG BAWLA KHAWVEL CHÈNA HAUSA/THILTIHTHEIHNA NEI TUR PAWHIN TAIMAK, TUMRUH, RINAWM LEH TEIREI PEIH A ṬUL

Mexican Mafia (La eMe) hi kum 1957-a Los Angeles khaw hmun hrang hranga Hispanic (America khawmuala cheng, Latin ṭawng bulṭhuta hmang Spanish, Portuguese ldt. hmangho thlah) street gang member 13 te’n Deuel Vocational Institution (California-a Youth Authority facility ni ṭhin, tunah chuan Tracy, California-a puitling tana state jail ni ta)-a an tàn lai-a an din a ni. A tirah chuan jail tâng gang dangte laka invenhimna’na din a ni. Din tura rawttu ber chu Luis "Huero Buff" Flores a ni. Ani chu Hawaiian Gardens, California-a awm Hawaiian Gardens gang member active tak a ni. Kum 1950 leh 60 inkar vel kha chuan America chhunga Hispanic khawtlangah kha chuan gang leh gang inbeihna a hluar ṭhin hle.

South America leh Mexico hmun hrang hrang aṭanga pem khawmte kha dinhmun harsa ve tak tak an ni a, ṭhalaite chuan nun nuam zawk beisei-in gang te chu an zawm ta ṭhin a ni. Te reuh té te-in an awm darh a, an inngeih lo a, mahni ramluah chin an neih chu an nunna thàpin an humhalh ṭhin. Chuti ang karah chuan mi fing tak pakhat a rawn ding chhuak ta a. America ram: mi ngo, mi hàng, mi eng leh mi uk (Hispanic)-ho awmkhawmna-ah chuan damkhawchhuahna’n ‘hnam khat/thlah khat/vun rawng inang tlâng’ chu ṭanho a ṭulzia a vawrh lar ta a, Latino gang member hrang hrang, ṭangho thei reng reng lo chu huikhawm thei tur khawpin hma a la ta a ni. Chu gang an din tak chu a hunlai-a America rama gang ṭihbaiawm ber- Italian Mafia hming ṭawmin Mexican Mafia ti-in an phuah ve ta a, vawiin thlengin chak takin an la awm a ni. Latin ṭawnga ‘M’ sawina ‘La eMe’ pawh chu a hnu-ah an pawl hming atan hman tel a ni bawk. An hotute chu tualthah vanga damchhung lung in tang tura tih an ni vek a, jail chhung aṭangin kawtthlera gang member singchuang chungah ro an rel ṭhin. Jail chhunga gang hlauhawm ber zing ami an ni chho hial.

An dan siam dan chu a ṭha hle a, fing deuhin a dintupa pawhin lal ber nih a chuh lo a, rorel khawl: council an tihah chuan member eng emaw zat an awm a, chumi te chuan vote inang ṭheuh an nei a, lal ber pawh an awm lo a, thutlukna siam dawn reng rengin council member pakhatin a pawm loh chuan hnawl a ni mai ṭhin. An motto pawimawh tak pakhat chu ‘blood in blood out’ (sangre por sangre) tih a ni a; chumi awmzia chu member nih dawn chuan gang hmelma emaw gang hamṭhatna tur emawa tualthah phawt a ngai a, gang bansan duh chuan kawng khat chauh a awm, thih a ngai, tih a ni.

Dàn pawimawh tak tak zawm ngei ngei tura tih an nei a, chu’ng zawm lo chu thah tura an chungthu rel nghal a ni mai ṭhin, chu’ng zinga pawimawh zual ṭhenkhat te chu:
1. Gang member tumah mawngkawhur an awm tur a ni lo.
2. Gang member tumah thuhrerutu leh mahni hamṭhatna duh vanga midang hnena inhek ching an awm tur a ni lo.
3. Gang member tumah an dawihzep tur a ni lo a, dawihzepna hian ‘La eMe’-ah hmun a luah tur a ni lo hrim hrim.
4. Gang member leh member chu tharum thawha insual tur a ni lo. Insual a ṭul a nih chuan Hruaitute hriatpuina-in a ni tur a ni.
5. Mimal nun inzahsak tur a ni a, gang member chu amah mai ni lo-in a chhung
6. te pawh zah tur a ni. Tumahin gang member-pui te nupui emaw bialnu emaw mipat-hmeichhiatna an hmanpui tur a ni lo.
7. Gang member dang thil ruk thiang a ni lo.
8. Member dangte sumdawnna leh hnathawhah hotute hriatpuina lo chuan inrawlh thian a ni lo.

Hun kal zelah chuan thutiam te neih a ni ṭhin a, thuzawm tur tam tak an duan zingah chuan he’ngte hi a tel a:
1. Member thar tur chu member ni tawh sa-in a sawipui tur a ni, sawipui tu awm lo chu member a ni thei lo ang.
2. Mahni ṭhian leh chhungte ai pawhin pawl chu ngaihpawimawh zawk tur.
3. Member ni lo leh dan lekkawhtute bulah chuan gang a awm a ni tih phat tlat tur.
4. Member nih hma-a tutu emaw te nena inhmelmakna leh intihbuaina awm te chu theihnghilh vek tur.
5. Member zingah dan zawm loh vanga thah ngai an awm chuan amah lawmluttu kha a thattu a ni tur a ni.

Mi thatchhe tan hmun a awm lo a, engtik lai pawhin mahni vela mite chezia thlithlai reng a ṭul a; tin, sipai tih dan deuhin an mi leh sate chu an zawm ngei ngei tur exercise darkar khat tal nitin an tih tur an duansak ṭhin. Kawng tinrengah discipline chu khawng taka kenkawh a ni. Chhungkua-ah chuan inpumkhatna a pawimawh angin rinawmna chu an vawnnun ber a ni a; jail chhung aṭang pawhin USA kawtthlerah ro an rel thei a, state hran daiha awm jail tangte nen an inbe pawp thei bawk. Sumdawnna lian tham – drugs leh thildang an khawih a, kumtinUS dollar maktaduai chuang pawisa an lalut.

Heti ang hi a nih takah chuan, misual leh tualthah hmangte nun hlawhtling tak pawh hi an sual vang leh pawisak an neih loh vang a lo ni vek lo tawp mai tih a lang chiang hle awm e. A tirah chuan tualthatin mi rawk pawisa lo mah se, a teirei peih loh chuan mihring chu a tlachhe mai ṭhin. Amaherawhchu, kum 30 chuang hlawhtling taka lo ding tawh ‘La eMe’ hian eng kawng pawh zawh ila taihmakna, rinawmna, tumruhna leh teirei peihna te hi he khawvela hlawhtlinna thuruk awm chu a lo ni tih a lantir. ‘Mizote nation’ pawh hi ‘chhungkua’ kan ni a, Mizo chhungkua hian khawvel kan hneh ve theihna’n he’ng mizia te hi chawinung thar zel ang u hmiang.

"La onda a toda madre,O un desmadre."
"Unity and loyalty is the main thing... Its your destiny, like a wave nothing can stop… everything is perfect like your mother’s love. But if u break the honor its Like u have no mother, absolute hatred. You win it all or you loose everything

"It's a Commmitment for life, we are bound by honor... Blood in blood out."