Mizo: AN APPEAL: TO ALL GLOBAL MIZO CHRISTIANS

In dam ṭhat lai a nih kan beisei. Thil pakhat pawimawh tak mai tlangzarh duh kan nei a, chu chu khawvel pumpui huapa Mizo Kristian zawng zawngte thawhhona pawl pakhat, PROGRESSIVE MIZO CHRISTIAN FOUNDATION (PROMIC) din tura hmalak mek a ni a. Mahse pawl han tih hian pawl hrang, club emaw, gang emaw, charity lam hawi pawh ni lem lovin, khawvel pum huapa Mizo Kristian tawh phawt, ngaihtuahna leh duhna thuhmun nei te inzawmkhawmna tur a ni dawn a. He pawl ina a tum bulpui ber tur chu khawvel pum huapa POSITIVE (nitin nun kawnga ngaihtuahna ṭha zawng positive attitude neihtir), PROGRESSIVE (eng dinhmunah pawh ding chunga hmasawn zel nun neihtir) leh PROSPEROUS (nun hausa, sum leh pai lama intodelh mai bakah mahni mihringpuite tana malsawmna nih tumtir) Mizo Kristian siam chhuah a tum ber ang. Chumi rual chuan Krista thutak nunpuitu nih a Pathian thu hi chetzia leh nitin nunphunga puan darh zel tum tur pawl a ni bawk ang. Chuvangin he pawl innghahna-ah pawh ‘Philipi 4:13 Mi tichaktu-ah chuan engkim ka ti thei a ni’ (Through HIM everything is possible) hman a ni.

Mizote hi hnam huaisen leh râl laka tlawm ngai lo hnam kan ni ṭhin a. Chuvangin chu dinhmun chu nei let leh turin kan rin Pathian hian Zofate hi kawng engkimah a ber kai hi min phal sak a ni tih kan ring bawk a; Pathian nung kan biaka hming hi keng kawh a, he meichher hi chhem nung zel tur kan ni nghal bawk. Amaherawhchu thil ṭha reng reng hi mahni chauha tih harsa mah se, thawhkhawma chu Kanaan ram chu thleng thei mai si tur, mithlaa kan lo hmuh ṭheuh tawh ram nuam leh hnam ropui chu din thar leh turin kut insuih khawm kan rawt a ni. Tin, nunkawng hrang hrangah ṭhianṭha leh duhsaka min fuih leh nawr kaltu nei lova mahni chauha lo beidawng mekte, he khawvelah beisei leh chuan tur nei tawh lo ni awm taka inhria nun beidawng mek te chhanchhuah tum pâwl a ni bawk ang. Mite hriat lova mahni chhunga sual awm chu a ruka rinawm taka lo do tu te hi mi ropui leh fel an ni zawk a ni tih hrethiamin, chu indona-ah chuan kan lama ṭang an awm ve tih hriattira tumruhna thar inpek tawn chu kan tum ber pakhat a ni bawk.

He pawl hi khawvel pumpui huap (Global organization) a nih dawn avangin hmun tinah Chapter (branch/unit ang hi) din phawt ṭulin kan hria a, chumi atan chuan member pasarih tal inhlawmkhawmin a din theih a. He chapter-ah hian Chairman, Secretary leh Treasurer bakah committee member pali tal neih a din tur a ni ang a. Membership fee atan INR `100 (One hundred rupees only) ngai tura ngaih a ni a, chumi membership fee pawh chu nakinah a remchan dan azirin kan Global headquarters tur Aizawl, Mizoram lama la chhun luh tura ngaih a ni. Chuvangin he kan thil tum min hriatthiampui a min phurpuitu khawvel khawi hmuna Mizo Kristian tawh phawt, rilru ang khat pu, mahni ram leh hnam hmangaih te, Pathian ram zau zel nana thawh inhuam te leh khawvel thila a ber thlentum tlatte he pawla lo tel tur hian kan sawm che u a ni.

Conveners:
1. Samuel Lalrozama Hmar, email: sammylrza@gmail.com, +91-9886447684.
2. Hriata Chhangte. Email: lalpahriata@gmail.com, +91-7259524059

Dated: The 19th October 2012, 22:30 hrs IST at 377, CPWD Quarters, Koramangala, Bangalore-560034.

Mizo: Zoluti laklet lehna kha SAILAM a ni

Zoluti lakleh thu-ah hian thu inchuh a awm a, sap hoin an lakletlehna khua hi Thenzawl, Sailam leh Kawlri te niin sawi a awm a. Mahse Serchhip ṭanna leh dinchhan hi zahawmin ngaihnawm hle mah se Zoluti lak kir lehna khau chu Bengkhuaia khua Sailamah ngei a ni tiin dah ila a pawm a nuam ber e, tiin Mizo historian zinga chik tak leh uluk tak, sorkar hriatpui meuha kan hnam chanchin chhui ṭhintu Pu B.Lalthangliana chuan ‘Mizo chanchin chik taka chhuina’ tih bu-ah a dah. A ṭanna te chu he’ng mi rintlak tak takte ziah aṭang hian a ni. KA ṭhiante hian in lo hriat ve mai maiah ka’n tarlang e:

1. Mizo chanchin ziak hmasa ber Rev.LIANGKHAIA chuan, “Vai lian chu an kal zel a, Sailam an thleng a. Bengkhuaia te chuan kap loin an lo bia a, an tum ber sap naupang chu an pe leh ta a. Jan 21 1872 ah hian Zoluti chu an la chhuak leh ta a ni,….” A ti. A lehkhabuchhut 4-na ah MAL chuan Kawlri tiin an lo thlaksak

2. Pastor CHALLIANA chuan, ”Sap pakhat Winchester an tih chu an that  a. A fanu kum ruk mi lek hi an man a, an hruai haw ta a. Hmar lam lal Bengkhuaia Sailalm lal inah kum khat chu a awm. Kum 1872 vek chuan Vai an lo lian ta a…. Mingo naupang Mary Winchester an tih te chu an la chhuah leh ta a ni..” tiin a ziak. Pastor Challiana hi kum 1970 ah sap upa kaihhruaiin pastor Chuautera nen sap ramah an kal a, Zoluti ngei an  zu hmu leh a, a inah an lenga chaw pawh vawi eng emaw zat an ei. Mizote zinga hmu leh hmasa ber a ni awm e. Chuvangin a thusawi hi a pawmawm.

3. Pastor VANCHHUNGA chuan Bengkhuaia chanchin sawiin, “Sailam tlang sangah khua a siam a, 1000 khua a nei a. Cachar vai a run a, thingpui huan sap naupang hmeichhia a mana , a khua-ah a hawn a… a hmingah Zoluti a ti. A sap hming chu Mary Winchester a ni. Kum khat lai chinah chuan sawrkarin Col. Lewin sap chu laktir turin a tir a, Mizote’n hming an vuah a, Thangliana an ti; chu chuan kum 1872 vel khan a la kir a…” tiin a lo ziak

Pastor Vanchhunga pawh hian a lehkhabu  thuhmahuria-ah kum 1881 ah khan upa kum 90 leh 70 mi tur hote hian mihring chanchin hlui, hun kal ta thute hi an sawi fo ṭhin a. Upate thu chu lehkha nei loin bengin kum 1891-96 inkar ka ngaithla a. A chang chanigin mi upa zual leh thil chanchin hre thiam awma ka rin ka hmuh hian chanchin hlui ka zawt fo ṭhin a, kum 1906-ah chuan chanchin hlui ziak khawmna bu ka nei a..”a ti bawk . Chuvangin hmanlai upate a kawm pha ṭhahnem hle a, a be tam bawk a, a thu ziakte hi a pawm a hahdam viau awm e.

4. Pu LALMAMA pawhin Lt.Col.TH Lewin chanchin sawiin, “He mite hi Sailam thlengnin an kal a, chutah chuan Bengkhua-a sap naupang sal kawl kha inkah pawh awmloin inbe remin an laksak leh ta a. Chu kum 1821 Jan ni 21 a ni. Sap naupang an man hi Mizo chuan Zoluti tiin a hming an phah a, a sap hming chu Mary Winchester a ni.”

5. Pu VL SIAMA pawhin Bengkhuaia phaitual run thu sawiin, “Sap pakhat Winchester leh a fanu kum 5 mi lek hi thingpui huanah chuan an leng a.. a pa chu an that a, a fanu chu an nung chungin an man a, Sailam khuaah Bengkhuaia inah a awm a, a hming chu Mary Winchester a ni a. mizo hming atan Zoluti an ti a… Jan ni 21 1872 kumin an han la chhuak leh ta . Mizoramah kum khat dawn a awm a nih chu…”

Pu Lalmama Mizo Titi pawh hi primary school zirtirtur kum 1957 vela an ziah tir a ni a.  VL siam Mizo history pawh middle school zir turin kum 1953-ah an ziahtir a ni bawk. Tichuan thlur thumah sikul zirlai bua hmangin kum 30-50 vel lai Bengkhuaia khua sailam aṭangin Zoluti lak kir thu hi ram pumah zir a lo ni tawh.

6. Mizoram bawrhsap pawhin, “Dr.Winchester-a chu an kap thlu a, a fanu Mary chu manin Mizoram laili lamah an hruai a, Sialsuk khaw bul Bengkhuaia sailo lal hnenah him taka enkawl a ni,” tiin a ziak.

7. Mizorama kum 20 lai rawngbawla awm Rev.JM Loyd chuan Alexandrapur rammut ṭumin 22 Jan 1963 thawhleh zana biak ina inkhawmna-ah thu a sawiin, “Zoluti chu tun hma kum 92 ah chuan Jan 23 ah man a ni tih leh Sailam lal Bengkhuaia inah an hruai tih kan hria..”a lo ti ve bawk.

(pic source: zotuithiang.webnode.com)

Mizo: MIZO KAN NI, KAN LAWM E!

“Mizo kan ni kan hmel a tha,
Kan tum a sang bawk si;

Kan rilru pawh a sang e,
Kan hming a thang bawk si;

Chutin kan hmingthan mawina chuan,
Khuavel a deng chhuak ang.”

-Rokunga

Black is beautiful cultural movement USA-a Midum hoin 1960-a an ṭanah chuan mahni nihnaa chian an inzirtira, ‘I am beautiful and I’m black’ [ka mawi/tha a ka dum a ni] tih thupui te an lo theh lar tawh ang khan keini pawh hian kan pianzia [tawi bing terh?] leh hmel [hnar bawng leh chhia?] te hi chhuang ila, hnam dang aiin kan mawl bikin kan chhe bik hauh lo a, mi tih ang kan thei ve vek a ni tiin, MIZO-a Pathianin min lo siam hi i lawm ang u.

Mizo Nationalist ropui Pu rokunga’n hlain a sawi ang deuh hian mahni insit lohna leh inpawmna hian nasa takin hmasawnna a thlen thei a ni tih hre rengin ke i pen ang u. MIZO HNAM dam reng rawh se