Mizo: Ngaihtuahna RIL

Kum zathum kalta, China ram Ming lalchhungkua (Dynasty)-in an awp lai (1368 to 1644), khan kung fu thiam pakhat Wong Long-a hi a awm a; pa tumruh leh ngaihtuahna sêng tam mi, ram leh hnam hmangaih tak, hlawhtlin hma-a bei ngar ngar thin mi a ni. Khatih hunlai khan mipa te inelna ber chu insual thiamah a ni a, ani pawh chuan Shaolin kung fu a zirthiam hnu chuan intuaihriam lehzual duhin a rilru a siam a, kawng thar zawng turin a mit a len kual ta a ni.  Shaolin temple a zawm nachhan ber erawh chu insual huai nih duh vang hrim hrim ni lo-in, hnam dang: Manchurian hnam ho-in China an awp bet chu a laknata a thinrim vang a ni a; ram leh hnam zalenna suala an ram riãngtè chu laklet duhna rilru a put vang a ni. Chu kawng zawh tur chuan insual thiam tak nih a tulin a hria a, a duh ber pawh a ni. Chuti anga mithiam a lo nih chuan Manchurian ho dotu helpawl hruaitu-ah a tan chhoh hial theih a beisei. Mahse a rin phak bak, kum tam tak thlenga inthlahchhawn tur thil thar siamna kawnga ngaihtuahna thar chu a thluakah a la in mûng reng mai tih erawh a hre pha hauh lo. [Chhui dan thenkhatah chuan he sytle lo chhuahna hi Song Dynasty atangin ni-a sawi a ni. Wang Long-a chu Abbot Fu Ju (福居) (1203–1275)-a’n Shaolin Kung fu tihhmasawn leh tih chak a tumna lama master tha 18 a thlan chhuah te zinga tel ve-in, chuta a tihhmasawn tumna-a a siam chu niin sawi a ni. Amaherawhchu Ming dynasty hunlai, tuna kan sawi tur anga thleng anga chhui let hi a tam zawk].

Chutih mek lai chuan Manchurian dotu helpawl zingah phiarrutu officer an awm vangin helpawlin Ching lalchhungkua paihthla-a Ming lalchhungkua dintir leh an tum chu an lo hlawhchham ve chiah a. Shaolin Temple chu helpawl ho tana tlankhawmna hmunah a chang chho zel ta ni. Roreltu Manchurian ho chuan Shaolin temple chu tuma tihbuai loha mahni inrelbawl (autonomous) hmun a nih vang leh helpawl tlanluhna hmun tha tak a nih vangin an ngaihven ta hle a.

Chu chuan awmnawmlohna a thlen a, chu dinhmun chuan, Shaolin temple chu hel ho-in sahimna’na an hman ber a nih vangin, ram roreltute zingah awmnawmlohna a thlen a, chu dinhmun chuan an ram lal ber chu thuchhuah siam turin a tur ta hial a ni. Shaolin temple zawng zawng hàla monk te chu thah vek turin thu a pe ta pawp mai. Tichuan tihchimit tumin an veh a, an that ta chiam mai a ni. Wong-a pawh chu a thian damchhuak thenkhatte tlanchhia-in Shan Tung chheh vel tlângdungah an inbengnel ta a, chutah chuan an sakhuana leh insual thiamna te chu an tharthawh tha chho leh a, intuaihriamin an inti chak thar leh a ni. An zirtirtu a thih hnu chuan Wong-a leh amah aia senior pakhat monk Feng-a te chu an pawl hotu ber an ni chho zui.

Hun a kal zela, Wong-a pawh chu insual thiam tak a ni chho a, mahse Feng-a chu an insual fiam chang chuan a hneh thei tlat lo thung. Chu chuan a rilru a kap hle. A thiamna te chu tha tawk lo-a hria-in a inngaihtuah nasa hle a, ngaihtuahna ril tak nen mahni-a hun hmangin rilru fim takin a inngaihtuah ngut ngut thin. Chutih mêk lai chuan Feng-a chuan Shaolin monk ho tih thin danin kum thum chhung China khaw hrang hrangah sakhuana thil vanga zin kual turin feh chhuah a tum a, a inpuahchah ve a. A nau-in a hneh loh vangin a lungawi lo a ni tih erawh a hriatpui a, rilru puitling tak pu-in thawidam sak ngei a duh a, Wong-a chu kum thum hnu-a a kir leh hnu chuan a hma aia a lo that tawh leh tawh loh en turin a tiam a, a kalsan ta a.

STYLE THAR A PIANG

Tichuan Wong-a chu chhum lo chat lo-in nitin a intuaithara, phaitual hnim hring dup zinga zîng khawvàr tantirh vela insawizawi chu a tih thin dan tlangpui a ni. Ni khat chu chem vai a zir hah hnep hnu chuan a thu hahchawl a, Buddhism chungchang lehkhabu a chhiar laiin a kiang leia thãwm ri ser ser a hriat chuan a ngaihtuahna a la peng ta a. A han en chian chuan rannung pahnih uifãwm (praying mantis) leh khau chi khat (cicada) insual hi a lo ni a, rei lote chhung chuan uifawm chuan a that a, a ban chak tak hmang chuan a chep a, a ei ta mai a. Wong-a chu, uifãwm mize tihbaiawmtak chuan a chawkphur nasa mai; a chet kual dan vel leh a bân chu a hmelmate mana pawt hnai tura a lek dan vel chuan a impress hle bawk. Chu rannung themthiamna kawlhrawng tak mai chu a thiamna neihsa nen chuan chawhpawlha chhunfin a tum ta a ni. Hmawlh te reuh tê a la a, uifãwm chu a infiampui a, a themthiamna te chu natna pumpelhna’na a hman dan leh hmelmate hnehna’na a hman thiamzia a en chîk a, chuti ang chuan  nitin a ti thin.

Ni rei lo te hnu-ah, uifãwm insual dan a zir atang chuan, mihring tana hman theih turin step hrang hrang a rem fel a, a ban chezia te chu chi sawmpahnihin a then ta a ni. Chu’ngte chu: kou (hook), lou (grasp), t'sai (strike), kwa (upward block), tiao (hook), chin (advance), peng (recede), ta (strike first), chan (contact), nien (cling), tieh (tag), leh k'ao (lean).

 A thil thiam thar tifamkim tur chuan a ke chheh chu tihchak a tul tih a hria a, chu chu China rama zâwng ho chezia atangin a siam ta bawk a; an che-hmang leh mize dangdai, ninhlei tak mai chu a ke chheh, uifawm kut che zia puibawmtu rinawm tak atan a hmang ta a ni.

Chu a thiamthil thar chuan bulthut nghet tak pein a hria a Style sawmpasarih dan te chu chumi hmanga her dang lam turin hma a la ta hial a. Cu’ngte chu:

1) chen kuen technique by Tai Jo,

2) ton boi kuen technique by Hon Tong,

3) mein feng technique by Chen Yun,

4) dune kuen technique by Won Yuen,

5) dune da technique by Mah Jaik,

6) hau kuen technique by Shuin Hong,

7) kau sun dune da technique by Wong Chien

8) mien jueng technique by Mien Sai,

9) koi sow tong kuen technique by Gow Soing,

10) sut gung ngang bung technique by Wy Duk,

11) kou lou t'sai technique by Liu Hsing,

12) gwon lau gwoon yee technique by Tam Fong,

13) gim la dit fait technique by Yen Ching,

14) yin yang guet technique by Lum Chong,

15) chut sai lin guen technique by Man Gum,

16) wa lai fou choi technique by Tsai Lein,

17) gwan choi yup jak technique by Ung Gwon.

Chu thiamna awmsa a thildang belhna chuan a hnu zela thangthar te tan kawng tha lutuk mai chinthan dan ngai (traditional) ngawt lo deuha mahni ngaihtuahna hmanga kawng thar zawn nachang hriatna te a thlen bawk. He’ng style sawmpasarih mai bakah hian technique dang tha tak tak shaolin law hon gong breathing exercises, iron palm, and northern style weapons te a belh bawk. Chu thiamna thar chu tha chakna hlanga innghat a nih tak loh vangin hard leh soft tactic in lungrualna ni-a ngaih a ni.

Tichuan monk Feng-a chu kum thum hnua a rawn let leh chuan an han infiam leh a, Wong-a chua awlsam takin a chak ta mai a, a unaupa mak ti tak chu a thil hmuhchhuah thar chu a hrilh a, an pahnih chuan a insualna thiamthil hmuhchhuah thar chu praying mantis kung fu ti-a phuah an remti ta a ni. An zir dun a, an thlifim sel bawk a, a kalhmang awmzia leh chetzia-a felhlel lai te an siam tha zel bawk a. Tha tawk ta ni-a an hriat hnu chuan midang hnenah thil dang zawng aia chungnung, kung fu level sâng tak angin an zirtir ve ta a ni.

THAWHRIMNA RAH

Kum tam tak hnuah Wong Long-a chu a thi a, praying mantis kung fu chhuanvawr tak chu Shaolin monk ho hnenah chauh zirtir zui a ni a; Sil Tao Yen-a, ngaihtuahna thui tak nei mi a rawn thlenna chuan pawnlam mite hnena zirtirna a rawn chawchhuak. Temple a luh tirh chuan a hma-a a la hmuh ngai reng reng loh insual dan kalhmang thar a hmuh chuan a mit a le hle. A tirah chuan a ni deuh uih uihin a tha tawk lo-in a hria. A hmuh hmaih chu tangkai taka taksa pum thiam taka rilru leh tisa chakna zawng zawng phochhuahna’na hman dan kawng a lo inthup ru reng tih chu a ni. Chu technique tha tak mai, zirthiam har tak si hmang chuan monk ho chuan tihrawl chakna leh rei fe hah lo-a inbei thei tura an zir thin  ‘hard style shaolin kung fu’ an tih chu zir ngai ta lo-in an duh ang thalin hnehna chang turin an che thei ta niin  an ngai hial a ni.

Li-a chu Fushan-ah pêmin a thehdarh zel a, chu hmuna a zirtir pakhat, Lo Kwon Yuk chuan mi dang tam tak a zirtir chhuak a; chu’ng zinga lar tak chu Wong Hon Fun, Hong Kong–a "Mantis King," ti-a hriat bawk chu a ni. Chupa chuan northern praying mantis kung fu system chanchin lehkhabu siamin chhuah sawmli (40 volumes)  lai a siam chhuak hial a, tunlai thleng pawha he system zirmite kaihruai bertu a la ni hial. Wong-a chu kum 1973-ah a boral a, a zirtirte tam tak hnenah a thiamna a thlahchhawng a, chu’ng zinga chhuanawm tak chu Al Cheng, Hong Kong-a full contact champion, fo tawh thin a ni. Canada-ah a in beng bel a,  kum 1979 atangin a zirtir tan a, kum tam tak Vancouver's Chinatown-ah a zirtir hnu-in a zirtir chhuan ber Jon Funk (tuna Executive Director of the Praying Mantis Kung Fu Federation ni ta) hnenah thuneihna a hlan chhawng a ni. Vawiin thlengin la inzirtir chhoh zel a ni a, Khawthlang ramah phei chuan mi tam takin eizawnna berah hmangin sum tam tak pawh an hailut hial. Tin, style dang tam tak hneh chhotu pawh a la ni zui zel.

MIZO TE VE HI!

Heti ang hian mipakhat ‘ngaihtuahna ril’ tak chuan martial arts khawvel a sawi dang lam ve tlat mai! Keini hian eng ngaihtuahna nge kan put ve dâwn? Thil chîk mi kan ni ve em? Ngaihtuahna ril neiha, engkim mai chîk taka zir chunga tûn kan dinhmun aia tha-a ding thei tura beihtheihna kawng àwn fo hi kan tihtur ber a ni dawn lo’m ni? Midangte tluk lo ni-a inhriatna hian anmahni ngaihsànna a nih lèm loh chuan mahni insitna a thlen duh fo. Mahni tlukpui te ni-a ngaihte’n min khúm hian rilru a nuam lo duh thin. Chuti ang hunah chuan Wong-a ang hian, kan tluklohte chu hneh ngei tumin ngaihtuahna ril tak nen bei ila, inelna thianghlimin i cho thin ang u, inerna bawlhhlawh tak ni lo-in. Miin min el an lo tum a nih pawhin Funk-a ang hian rilru zau leh puitling tak pu-in min tluklotute chu fuih chungin hmachhawn ngam ila a tha awm e.

Eng dinhmun zawk zawka ding pawh ni ila hnam khat leh rinna (thlarauah) khat pu kan nih chhung hi chuan thawhho dan kawng hi zawng zel ta ila kan hnam hi a lo ropui-in a lo thanglian leh zual ngei ang le. Zofa, tlemtè te hian midang nuna ngaihsantlak kan hmuh lai theuh hi phawrh lan sak ngam ila, inchawimawi thiam tawn ila, in er lo-in thianghlim takin in el zawk ila, kan vela hnam dang ho mithmuhah kan va sâng leh zual dawn em! Mi pakhat thluak ai chuan pahnih thluak hi a lo tha fo thin bawk si! I ngaihtuah ve ngai em? Ril takin han ngaihtuah ve teh khai…

References:

1.       Kohn, Livia. Daoism Handbook. Leiden: Brill, 2000 (ISBN 9004112081)

2.       atlantamartialarts site

3.       Wikipedia online encyclopaedia

4.       mantiskungfu site

  [He thuziak hi Bangalore Mizo Association official newspaper Vol XVII Issue no.42 ah kaihtawia chhuah a ni a, hei hi a full version a ni]

Mizo: Zoram chin khawiah nge? (Chin-Lushai-Kuki ram)

ZORO PRESS STATEMENT

Zoram chin khawiah nge?
(Chin-Lushai-Kuki ram)

British hoten Indiaa an ram lak an tih zau zel takah khan Zoram khawthlang lam pawh an rawn nek chhoh lai khan kan indona hmasa ber chu Chittagong bial hrul Fenny lui kamah, 1761 kumah a ni a. Chutih lai chuan sapho chuan Bengali-in min lo kohna angin Kuki min ti a, Kuki tih hi tlangmi tihna mai a ni. Hemi \um hian keimahni lam min rawn nawr vak lovin Tripura lam nawr pheiin Agartala an la nghe nghe a. Hetih lai hian Agartala Raja inti chuan chhak lam tlangram chu a ram vek niin a sawi a, British ho Survey record-ah erawh chuan independent lal ram vek an nih thu an sawi a, amah Tripura Raja inti zawk hi Raja ni lovin Moghul lal hoten Tipera phai ram loneitute enkawl tur atana Jaminder-a an ruat mai a ni zawk tih an ziak a ni.
British ho nen hian kan innawr zui vak lova, amaherawhchu, British ten 1824-a Anglo-Burmese War an siam hnu, Arakan leh Tenesserine leh Assam te British chana an dah tak hnuah kha chuan zawi zawiin Zoram chu kil hrang hrang atangin an rawn nek tan ta a ni.

Kum 1826-ah chuan Manipur Raja te tanpuinain hmar lam leh khawchhak lamah min rawn nek tan a. 1832-ah chuan Cachar pawh an lal an thah avangin British Territory-ah an puang ta hial bawk a. Tin, 1840-leh 1850 inkarah Chittagong lam atangin min rawn nawr chho zel a. Heng kil hrang hranga an ram lakahte hian sum hmuh nan tiin thingpui huan siam an phalrai a, London atang te pawhin thingpui huan siam an lo kal hlawm a. ‘Thingpui huan atan’ tiin hmar lam leh khawthlang lam atangin kan ram chu min rawn nek chho zel a. Burma lam atang pawhin 1852-ah Second Anglo-Burmese War siamin Arrawady lui dung rawn zawh chhovin Pakhoku khua hial an rawn thleng chho ta a ni. Hetianga khawchhak lama an lo luh ve takah hian khawthlang lampang tlang rama awm mihringte chu kawlho hming vuah angin Chin an ti a, ‘Chin’ tih chu ‘bawmphur ho’ tihna mai a ni tiin an tarlang bawk a. 

Hetiang anga kan han innek chhoh tak zelah hian ram chhunga lal hote chu ‘Lushai Lal’ tih an lo nih avangin ‘Lushai-Kuki’ ti te pawhin an ziak bawk \hin a. Hetianga kiltina indona a lo awm reng takah hi chuan 1850-ah Chittagong lampang bial Chandraguna-ah D.C. \huthmun te rawn siamin Rangamati-ah Outpost te an rawn dah a. Thingpui huan atana an rawn vah te leh lo an rawn neih tir zel te chu duh lovin Lushai lalho chuan an lo zu um darh ve bawk \hin a. Chuvang chuan 1850 -ah ‘British te leh Kuki te inkar ramri chu - ‘hmar lam atanga Rangamati-a lo luang lut chhim lam hawia kal zel Sazai lui (annin Chingri lui tia an hriat) chhim leh hmar zawnga luang hi a ni e’ tiin an puang ta hial a. Hei hian a hnar lamah tuna Tripura awp chhung Longtoroi tlangdung zuiin Kailasahar-a Syhlet District a su ta a ni. A chhim lamah erawh chuan Rangamati atangin Chandraguna-ah, chuta tanga tlangram chin zela kalin Sungoo lui chhuah-ah Bay of Bengal a fin a ni. Hemi chin hi Fenny lui kama an indo vakna atanga khawchhak lam mel 10 velah rawn sawn chhoh a ni tawh nghe nghe a ni.

China writer Fancho’chuan Zo fate hian AD 862-ah Chindwin phai ruamah hian lal ram rawn dinin khawthlang lamah Bay of Bengal thleng an \hut thu a lo ziak tawh a. British te pawhin, Anglo-Burmese War pathumna nei chho tura an inbuatsaih hnua Zoram (Chin-Lushai-Kuki ram) palzal tur leh awpzui tura an han inbuatsaih takah khan Pakhoku atangin Chindwin luidung zuiin Ganggow leh Kalemyo-ah te outpost an rawn siam chho ta zel a. Hmar lam deuhah Manipur Raja hmang tangkaiin Tuibangpui, Meihlang (Moirang) khaw hrulah outpost an rawn siam ve a. Tin, Assam lam Cachar atang pawhin ‘thingpui huan atan’ tiin tlang ram lampang, chhim, chhak leh hmar lam hawi tein an rawn nek chho zel a. 1832-a British awp hnuaia Cachar an rawn dah takah phei kha chuan phai zawl aia inkhaithli deuh, tlangram lam deuhah thingpui huan a that duh avangin min rawn nek nasa zual ta a. Heng avang hian British hovin kan ram min rawn ti buai ta reng mai a ni. 

Hmar lam atanga min rawn run hmasak ber chu 1850 a ni a, hemi avang hian Lushai lal Suakpuilala, Vanhnuailiana leh Vanpuilala (Sentlang lal Ngura fapa) te nen pawh an lo indawr fo thin a, 1850 khan Suakpuilala te nen pawh inremna an lo siam hial a. Chungte chu Treaty and Sanad tih buah pawh an chuan tir a. Heta ramri an lo intih buainaah pawh hian tuna Sichar atanga chhim lam ‘leilawn tuiin a chim’ kan tih thin kiangah khuan Zo lal pakhat Sepuia khua chu British hoten chhiah an lo chawi tir a. Hemi chungchang thu avang hian 1850 pawh khan British te chuan Captain Lister-a, Syhlet Infantry ami hmangin Ngur-a khua chu an lo run tawh a. A khua hi in 1000 lai tur a ni a, January ni 16, 1850 khan nunau tam tak tihluma an hal bawk avangin khawlaiah thisen te a luang ngiai nguai a, chuvangin Ngura khua tih mai \hin kha ‘Sentlang’ an tih phah ta a ni. Heta \ang hian ‘thingpui huanah’ tiin min rawn nawr chho leh a. 1850-a Tuirial chhuah Sonaimukh a\anga khawthlang hawia Derby Tea Estate paltlanga Hailakandi-Lalaghat Hachhek tlang zui thlaa Kailasahar zuk sua ramri an lo siam hmasak chu bawhchhiain 1870 chuan Dholai-ah te, Maniarkhal Hailakandi leh Tuiruang kam Midnadar khuaah te 1872ah outpost an rawn din chhoh tak zel avangin chu rin chu Lushai ram run (vailian vawi khatna) tlawhchhanah an rawn hmang a, chumi vek chu BEFR tlawhchhanah hmangin ‘Southern Cachar Boundary’ tiin an ziak lut ta nghe nghe a ni. (Mahse, hetih lai hian min la awp lova, chuvang chuan heng Inner-line an rin te hi phalna la lova an kal pelha Lushai rama mite an lo man theih chin tihna a ni. Hetiang hian 1930 thleng khan BEFR hi hman a ni a, chumi hnuah erawh chuan tuna kan hman ang hian a lehlingin Mizoram pawn lam mite phalna la lova an lo luh khuahkhirh nan an hmang ta zawk a ni).

British ten Burma phai zawl engemaw chen an lak a, Assam leh Bengal te, Manipur leh Tripura te an han awp tak hnuah hian a kaltlang mai theih lohva Zoram (annin Chin-Lushai ram an tih) a lo tlazep ta chu an ngaimawh em avangin 1888 October thlaah Army Chief order angin Zoram tukdawl turin hma an la ta a. Chhak leh thlang chhim leh hmar atangin Brigadier General ho, sipai sang tel \heuh hruaiin min rawn bei ta a. Chutianga min beitu, Silchar leh Chittagong lam a\anga lokal te chu tuna Mizoram lai Pangzawl velah an intawk a. Tripura Kailasahar a\ang lo kal ten Langkaih dung an rawn thleng a, Manipur a\anga lo kalten Tipaimukh (Tuivai an lam thiam loh avangin Tipai an ti a, a chhuah chu anni \awng chuan ‘mukh’ a ni a, ‘Tuivai chhuah’ tihna mai a ni) an rawn thleng a, chhak lam (Burma) a\anga lo kalten |iau an rawn thleng bawk a. Tichuan, sipai pawltin te ram lak chin \heuh chu an lo kalna State leh Province-ah an beh darh tir ta hlawm a. Tichuan, Zoram (Chin-Lushai-Kuki ram) chu \hendarhin a lo awm ta a ni.
Hei hi min laa min \hendarhtu British te ngei pawh khan \ha an ti lova, ‘Chin-Lushai Conference’ vuahin Calcutta Fort William-ah January Ni 29, 1892-ah Conference neiin chumi hun laia British roretute aiawh zo ngei kalkhawm chuan a rang thei ang bera Zoram chu rorelna pakhat hnuaia awm turin an lo rel fel diam a. A ram huam chin tur ruangam pawh British hotena ‘Chin-Lushai-Kuki ram’ an tih, ‘Hnam kawlhsen ho (Savage Area) an tih bawk te awmna chin hi a ni ang an ti a. Khawmuala

ramri rin tak tak erawh chu hemi zaizuia la siam ni sela tiin a tlang an kawm zui nghe nghe a ni.
Tuna kan han tarlan huam chin hi Zoram kan tih chu a ni a, hei hi hnial rual loh, khawvel sorkar dang leh UNO thleng pawhina min hriatpui chu a ni.

UNO hian khawvel hnam tenau dikna leh chanvo tih chhiat sak tawh zawng zawngte chu tundin sak leh a, dik lo taka an ram lo \hendarh te pawh siam fel sak leh a tum a. Hemi tih hlawhtlin nan hian UNO member zawng zawngte pawh theihtawp chhuah turin an intiam tlang vek a. Keini Zo fa, India, Burma, Bangladesh awp hnuaia awmte hi min tih behna ramah hnam tenau (minority) kan ni \heuh bawk a. Heng Tual\o hnam dikna leh chanvo lo chhe tawh te tundin leh theih nana UN-in dan thar a siam tak (UNDRIP) hmanga hma la turin UNO memberte chuan rem an ti tlang a, chung zingah chuan India leh Burma te pawh a remtitute zinga ban phar ngei an ni. Amaherawhchu, UN Charter chuan ‘heng hmalakna kawngah hian Tualchhung thil (Domestic Affairs)-ah a inrawlh lovang’ tiin a inveng leh bawk a. Hetih lai hian keini Zo fa, India, Burma, Bangladesh hnuaia awm te hi domestic affairs a nih tak loh avangin Zo hnam aiawhtute chu hengho chungchang sawina huang UNO-in a buatsaihah kan tel ve ta thin a, an dan thar siam UNDRIP pawh hi hmang thei turin India President aiawh Mizoram Governor pawhin Vanapa Hall-ah ‘Zo Inpui’ min hawn sak a, UNO flag pawt parhin August ni 9, 2010, International Day of World Indigenous Peoples hman (celebrate) ni khan a nemnghet ta a ni.

Mizo: Thawhpui nuam i ni em?

MITEN ENGTIN NGE MIN HMUH?

Kum 1971 khan Rangmati Police Bazarah Pathan Captain Ibram chuan MNF volunteer Capt. Lalhleia leh Maj.Khualchhawna hnenah, "Mizo sipaite hi in huaisena in zinga khawsak a nuam ngei mai. Keini chu kan ram chhan kan ni a, mahni ram chhanna-ah chuan thih pawh huam ila a awm. Nangni ho hi chu kan mikhualte in ni a, dawihzep deuh pawh ni ula a awm lo miah lo a, mahse keini aiin in huaisen zawk daih mai hi chu ka fak tawp thei lo che u a ni," a ti a,

Maj.Khuala chu a kawk a "Hei hi mi huasen diktak Field officer puitling a nih hi, a hova ral kah a nuamin a thlamuan thlak hle a ni," a ti bawk.

Heti ang hian Zofate hi hnam dang zinga kan thawhna-ah kan thawhpuite'n min la ti reng em? Heti anga min fak theih zelna'n,  a bikin ram pawna thawk te, hian Pathian ring chungin ṭan la thar ang u hmiang; ram chhunga mite pawhin kan thiltih apiangah ber nih tum ṭheuhin aw....  Zoram Tan

Mizo: MNF tawng lettu thuthang

RAMBUAI LAI THUTHANG (I compiled this for my blog only):

Kum 1972-a MNF-in Burma communist ho nen thawk dun tura an inbiak tan dawna Arakan an luh laia an inbiaka tawng lettu thukhawchang:

Pu Denga leh Communist hotu an inbia a, Pu Vanhlira’n tawng a let a. Pu Vanhlira'n tawng a lehlin lai hian pu Laldenga sawi tel loh UNO teih te a sawi ri tel a, an inkawm zawh hnu-ah pu Denga;’n “Pu Vanhlir, Uno tih te kha ka sawi tel miah si lo a, engatizia nge i sawi rik tel? “ tiin a chhuahchhal deuh a, “I thusawi nen khan inphaman riau-in ka hria a, ka sawi kai tel zawk a nih kha, pawi vak turah pawh ka lo ngai hlei nem,” Pu Vanhlira’n a ti.

“Tawnglettu hi khawl ang inni a, ka sawi bak nangma thu i sawi ve a thiang hlei nem, ka sawi ang chiah chaih chauh i sawi tur a ni,” tiin pu Laldenga’n a kamkhat a, “Chuti a nih chuan i sawi ang chiah chiahin ka let tawh ang a, I khuh pawhin ka khuh ve ang a, I hahchhiau pawhin ka hahchhiau ve ang,” Pu Vanhlira’n a ti a. An nuih a za na-in an nui tha ngam si lo a, an nui deuh rah rah hlawm a.

A tukah chuan Communist Secretary Chawmia hote nen an inbe leh a, hemi tum hi chuan rammu sorkara CBI director, Pu Zahmingthanga’n thu a sawi ve a, “Kan tum leh duh zawngte thuhmun lo mah sela,” tih te a sawi kual ta deuh duah mai a, Pu Denga’n a han melh thin a, Pu Zahmingthanga’n a hrethiam si lo a.

An inbiak zawh hnuah pu Denga’n “Pu Zahming engtizia nge kan tum leh duh te thuhmun lo mahse tithe I sawi tel kher ni, heti ang inbiakna-ah chuan kan tan tlanna tur leh kan thawh hoh theihna tur a lawm sawi tur.” Pu Vanhlira lam a hawi a, “Pu Vanhlir, a sawi ang khan em ni I leh?” A ti a; Py Vanhlira’n, "ka pu keichu khawl ang ka ni a, keima thu-in engmah ka sawi a thiang lo a, a awi ang chiah chiah khan a ni ka lehlin,” a ti a. An nuih a za tlang a ni ang, an nui ta ham ham a.