YMA v/s Kohhran

A chunga kan thupui hmuh avang khian YMA leh Kohhran kan indo tir dawn tihna a ni lo tih lo hre hmasa phawt ila a tha awm e. A huho rawngbawlna lian tak ve ve ni si, kalphung inang chiahlo an ni mai a. Mi tamtak, YMA leh Kohhran thliarhran tum an awm thin a, hei hi a thalo hle a ni.

YMA chu kan hriat theuh angin, tlawmngai pawl lian ber tia hriatlar a ni a, a dintu te pawh Kristianna rawn paw luttu kan Zosap Missionary te tho kha an ni a, an din tan tirhte atangin Kristianna nena inmil takin, rin dan leh tihdan hrang neih avanga Kohhran anga rawngbawlho theilo ten tlawmngaihna nena midangte an tanpui theihna tura pawl din a ni a, a thupui (Motto) atana an thlanchhuahte pawh thil tha tak tak vek a ni tih chu hrilh nawn kher ngai lova hresa vek turah ka ruat che u.

Tichuan, Kohhran pawh chu Kristian tena kan biak ber ‘Pathian’ tana thawktu, amaherawhchu, tihdan hrang hrang nei leh kalphung hrang hrang nei, tum thuhmun vek si kan ni leh mai a. A bik takin he Kohhran huangchhungah hi chuan Thlarau bo chhanchhuah hna thawh hi kan tulpui ber a ni.

Hetiang hi thil awmzia a lo nih takah chuan YMA leh Kohhran hi thliarhran theih anih lohna chhan chu :

Motto 1: ‘Hunawl Hmanthat’ tih chu KTP innghahna “Thil tha ti atan a siama awmin, chu thil tha tih chu kanturin a lo buatsaih lawk a ni – Ephesi 2:10” tih nen hian a inmil em em a. awmna

Motto 2: ‘Tanpui ngaite tanpui’ tih pawh hi SAY te innghahna “Thi tura hruaite chu chhanchhuak thuai la, thah mai turte chu chhanchhuak rawh – Thufingte ” tih nen hian a inmil hle bawk a.

Motto 3: ‘Mizo nundan tha ngaihsan’ tih hian a khaikhawm leh vek a, kan pi leh pute hun atanga vawiin thleng hian kan Mizo Society- a thil \halo te bansanin, a tha laite chhawm nun zel hi YMA tihtur niin a lang.

Khitiang zel khian heng YMA Motto hrang hrangte nena inmil tur zawng hian Kohhran hrang hrang thalaite hian innghahna Bible chang kan lo nei vek mai hi a lo ni a. Khingte khi ka hriatchian zualte an nih avangin ka han tarlang mai a ni e. Chuvangin, YMA leh Kohhran hi engti kawng zawnga tih hran chi leh thliar hran chi a ni loa, thliar theih pawh a ni bawk lovang. Mahse, Kohhran a lenglo zawng zawng hi YMA huangchhungah a leng bik chuanglo tih erawh kan hriat a pawimawh hle.

A tawp berah chuan, YMA Motto leh thupui te hi ngun taka ngaihtuah chuan Kristian tha tak tan lo chuan YMA Member tha tak nih a har tih hi kan hriat a ngai a ni. Chhiartute, enge in ngaih ve dan?

[He thuziak tha tak mai ka thian tha tak LALHRUAITLUANGA HMAR (Vala)-in Bangalore Mizo official newspaper (Vol.XV Issue no.19 dated 9th Aug 2009)-a a ziah a ni a, editor ka nih laia chhuah a ni. Amah hi ICFAi University, Mizoram-ah System administrator a ni. Hetianga ngaihdan tha tak min rawn phawrh sak a vang hian kan khawthlir a zau phah sawt a beiseiawm. - Samuel Lalrozâma Hmar]