Mizo: LAWMIN i lo KHAT ngei ang (Skit)

SUMIN A LEI THEIH LOH THIL I CHAN FO HI NGAIHTUAH BAWK LA LAWMIN I LO KHAT NGEI ANG.

Tv. Sammyan a hmalamah thinlung lem lehkha khawng rawngsen hmai tiat vel awrh (khai) sela chu thinlungah chuan a lawm theih lohna chhan hrang hrang in ziak sela chu chu en sela hlim lo takin lo thu se. A hnunglamah khatiang bawk khan thinlung var awrh se chutah chuan lawm thu sawina lam awm ve thung se la.

Hetih lai hian Nl. Kimkimi lo lang sela.

Kimkimi: Ekha Sammy chu i va mal ve, khawnge i thiante ho?

Sammy: Vawiin chu tumah vak pawh ka kawp lo.

Kimkimi. Engatinge i hlim theih teh lul thin nen vawiin chu i rilru a hah hmel tlatin ka hria.

Sammy: Ah.... nia.... chutia mi han zawh takah chuan sawi tur a tam mai. Tun lai chu eng eng emaw hi ka ngaihtuah a, a chang leh ka inngaihtuah lunghnur ti tih a, vanduai bik riauva inhriatna te ka nei thin a.

Kimkimi: Nang kan tlangval chhuanvawr ber, hlim thei bera kan ngaih tibuai tu che chu eng engte maw ni le?

Sammy: A... a mak thei khawp mai. Hei ka theih ang tawkin Pathian hi ka tih ve-in ka hria a. Nu leh pa leh zirtirtute thu pawh hi ka awih ve thawkhatin ka hria a. Ka zirna lamah pawh ka theihtawp ka chhuah v reng a, mak ka tih deuh mai chu ka hriat chian ve tak tak Pathian pawh ngaihsak miah lo te hi kei aiin mark an hmu tha in Mobile phone thar tha tha an nei thei tlat bawk si a, a chang chuan Pathian hi fair lo deuhin ka hriat ka hre thin.

Kimkimi: A ni khawp mai, eh kha enge i hma lama i awrh hi.

Sammy: En rawh ka han sawi ang chi Pathian laka ka vui na a nih hlawm kha.

Kimkimi: Ka rinaiin vui vaina i ngah daih mai a, hei i class mate nang aiia mark hmuh that vang te, i thianpa mobile thar neih zin thute, incheina an neih thar zin zia te, chhung ten pawisa an thawn zin bik thu te..... (Hetah hian Bangalore thalaite tana inmil (relevant) deuh dah ni ta se.

Sammy: A lenglo mah mah a, ziak tur pawh ka la nei teuh a sin.

Kimkimi: Ka hrethiam khawp mai Sammy, mahse zawh duh che thenkhat ka nei a, min chhang thei angem?

Sammy: Han sawi ta che.

Kimkimi: Kum sawm kal ta kha han chhut kir la, damdawi Inah vawi engzatnge dam lova i luth tawh?

Sammy: A inngaihtuah a- Ngawiteh damdawi Inah ka pianga chu bak chu damlo kana ka tlawh tih loh chu damdawi inah ka la lut lo.

Kimkimi: A nih Pathian hnenah lawmthu i sawi em?

Sammy: Engvang chuan maw?

Kimkimi: A reng rengah tunkum ralta leh vawiin thleng hian damdawiah engzatnge i sen min hrilh thei em?

Sammy: Krismas lai vela Bike-a ka tluk tuma detol ka lei tih loh chu ka hman pawh ka hre lo.

Kim kimi: A nih leh chung avangte chuan Pathian hnenah lawmthu i sawi ngai em?

Sammy: Sawi nang, hengte chu a tur ve rengah ka ngai mai a sin.

Kimkimi: Sammy ngun takin ngaihtuah teh, kha leh chen kha Lalpan damna tha tak a pe che a, zirna lamah i tluang viau bawk a, heng Bangalore khawpuiah te i zir thei lehnghal a ni a, inngaihtuah chiang teh.

Sammy: Khawimaw kha enge, ?

Kimkimi: Hman ni khan Vellore-ah ka va kala, damlo ho thenkhatte thla ka lak puite ho thlalak a nih hi.

Sammy: Khawimaw ka’n en ve lawk? I hmelhriatte ho em ni?

Kimkimi: Hei hi Pu Thlenga a ni a, a ni hi a kal thlak a ngai a, a donate tu an zawng mek a, chutih chhung chuan dialysis tih nan sum tam tak a seng tawh a sin. Hei hi Pi Pari a ni a, a ni hi a thin a cancer vangin a ni pawh thlak a ngai donate tu an zawng mek, an hmu anih pawhin cheng nuai fe sen a ngai ang.

Sammy: A! hei chu ka hmelhriat tlat, thianpa Lawma anih hi, kan veng a mi a lawm, a dam lo ve a ni maw? Enge a natna?

Kimkimi: A ni hi thisen cancer a ni a, doctor ten a dam chhuah theih an beisei loh avangin he mi thla kan lak ni hian Mizoram lamah an hawnpui ta anih kha.

Sammy: (A inngaihtuah vang vang a,) Lawma.. a ni thei lovang, engatinge a chhungte pawhin a awm min hriattir miah loh, ka hmuh lohin mual min liam san dawn a ni maw. Ngawiteh Kimkim, Pathian hnenah ngaihdam dil a tulin ka hre tlat mai.

Kimkimi: A ni chiah a sin, ngawiteh Sammy hei hnunglamah i lawmna tur i lo dah daih anih hi. Hei Pathian malsawmna i dawn zawng zawng a in ziak vek a lawm, i complain ai tam daih lawmna tur i nei a nih hi.

Sammy: A ni ti raw, engvanginnge ka lawmtheih lohna te hian min tihbuai fo ang, khawnge hnunglamah ka han dah vek ange, (Hnunglama thinlung kha hmalamah dah se). E khai, a lo nih tak hi, lawmna tur hlir a lo nih hi. Lalpa hnenah ngaihdam ka dil a ngai a ni.

Kimkimi: A ni chiah a sin, Sammy, Sum leh pai-in a lei theih thil kan neih loh vang hian kan lungawi thei lo thin a, Sumin a lei theih loh thil kan chan zawng zawng hi han ngaihtuah ila lawmna veng veng tur hi a awm a sin. En ta che, hei, a lang reng a lawm, (Kimkimi khan Sammy hmalama thinlung var chhunga inziak kha chhiar sela) i hriselna te, thenrual tha i neihnna te, hmangaihtu chhung leh khat i nei te, tumah pawh huat i nei mai ni lovin, hawtu, che pawh i nei vak lo a nih hi, . Thlamuang takin zanahte i mu thei thin a ni maw. Sum leh paiin a lei theih loh hlir a nih hi.

Sammy: Pathian hnenah ngaihdam dilna leh lawmthu sawina ka han nei nghal ange.

MANGANG LEH LUNGNGAIA TAN I TUM TE HIAN

Tih kha chang hnih thleng sak ni se.

[He skit hi pu LALTLANKIMA HNAMLER ziah a ni a, January 27th 2008-a Bangalore Mizo Christian Fellowship inkhawmnaa ka thiannu Kimkimi nena mipui hmaa kan chan a ni. Hlawkna i nei ve thei em ka unau? - Samuel Lalrozama Hmar]