.jpg)
Mizoram, zâu lo tak, 21,087 sq.km. chhûngah hian Zofâte chu inzârpharhin kan inthlah pung ve zêl a. 2001 census-ah khân literacy rate-ah 88.80% lâi kan kai, Pathian zârah. Tin, sorkar hnuaia hnathawk tam ber awmna(23%) chu education department-ah a ni tlat (2005 statistics); chu chuan zirna kan ngaihpawimawhzia a lantîr a, hmâ kan sâwn ngei ang tih a chiang bawk. Zofâte hmasâwnna, a bîk takin a langsâr zualte, hi chanchintha lo thlen (1891) nêna kal kawp tlat a ni. Sâppui thluak tha te’n kum 1893-ah ‘Â, ÂW, B’ min siam tan sak a, a kumlehah lehkha thiam hmasa ber (Khamliana) kan nei nghal; chû kum vêkah chuan zirna rûn hmasa ber siam a ni bawk; tin, kum 1898-ah sikul hmasa ber hawn a ni (a hnuah Primary-1901, Middle-1903, High-1944). Kum 1924-ah Graduate (B.A.) hmasa ber (Hrawva leh Lianhnuna) kan nei a, officer hmasa ber (Doluta) kum 1892-ah kan nei bawk.
Kum 1910-ah Aizawl Bazar, Kâwlsâp-in a hawng a; rângva in (Khamliana, 1819) leh concrete building (Dr.Thantluanga, 1956) kan nei chho; kum1942-ah C.Rochhînga’n a vawikhatna atân motor a rawn khalh lût a; kum 1977-ah Aizawl Town bus a tlân tan a, a kum lehah Aizawl Taxi hman tan a ni. Kum 1972-ah U.T. niin kum 1986-ah state puitling kan ni ve a, hmâ kan sâwn chho zêl. Chû kum (1986)-ah vêk chuan Tuirial Airfield atangin Vayudut a thlâwk tan a, kum sâwmpahnih hnuah Lengpui Airport atangin commercial flight (1998) tan a ni ve leh. Kum 2000 a inher chhoh meuh chuan Aerospace Engineer (Zodinliana) leh Aircraft Maintenance Engineer (Samuel Lalrozâma Hmar & Becky Zatluângpuii) zir chhuak (hmasa) an rawn awm. Pilot hmasa ber (Lt. Col. Pau Khan Thang) erawh kum 1951 khan kan nei tawh. Tunah chuan India ram pumah Aviation industry-a thawk kan awm ta teuh mai.
ZIRNA in tha tak tak te nei chhoin mi thiam leh chhuanawm tak tak, Zoram leh phai lam zirna rûnah te, kan in chher chhuak chho zel a nih hi. College hmasa ber (Aijal College) kum 1958-ah din a ni a, tunah (2007-2008 statistics) chuan college-22 leh Polytechnic–2 lâi kan nei ta. Mizoram University (2001) pawh la naupang hlê mahse lehkhathiam a chher chhuak hnem tawh hle. Engineering leh Medical line-ah phai mi te aia ti tha zâwk leh University toppers sawi tur, leh India rama college tha ber bera P.G. zir thei tura inziâktling, mi tumruh, kan awm ta teuh mai. (CSIR hnuaiah) Scientist [C.Sâwmliana (1999) & Samuel Lalnghatliana Râlte (2002)] te kan awm chho a, Super specialist Doctor pawh pali lai kan nei ta. Laminectomy (sciatica zai) leh total hip replacement ti tura phâi lam mithiam te pan ngai thin pawh kum 1994 atang khân a ngai ta lo, mithiam (Dr.Thangchungnunga) kan nei ve tawh. Tin, mahnia inhaikuaa line thar (animation, designing etc.) zawma hlawhtling te kan awm teuh ta a, Ph.D zo pawh line hrang hrangah kan ngah tawh. Central service lam ni se, kum tin mai, tling hming hriat tur a awm chho tan. U.T. kan nih hma daih tawh khân Indian Air Force sergeant (Vânmawia, 1943) te neiin, I.A.S. (Jamchawnga Nampui, 1955)-ah pawh kan lo inziak tling thei a ni. Khawvêla tlâng sâng leh vawt ber te zinga mi, Mt.Everest, lâwn chhuak thei tlêmte zingah Mizo hming (Dr.Capt.Samuel Lalrintluânga, 2009) pawh a lang ve ta. Tin, Politician (Dr.H.T.Sângliana), ram dang (Karnataka)-a M.P. ni thei hial; hnam dang te ngaihsan hlawha, a chanchin film-a an siam (Sangliana 1 & 2) hial te pawh kan awm chho.
Sorkar laipui sum ngawt ring lo deuha inchâwm theihna, small scale leh cottage INDUSTRIES (hmasa ber 1939) te, din a ni chho. Thlai (aieng, sawhthîng etc.) thenkhat te pawh ram pâwna thawn chhuak theiin kan intodelh; M.I.F.C.O. products te phei chuan hnam dang te fak a hlawh hle. ‘A.H. & Vety’ Dept.-in ‘Artificial Insemination in Turkey’ chu hlawhtling takin Selesihah a kalpui mêk. Ran vulh, chhungkaw tamtak intunnunna ni mêk, atanga kumkhat chhunga sum dehchhuah chu Mizoram sum dehchhuaha thawh hlawk ber pawl a ni hial. Kan ngah em em, mâu, pawh ‘Bamboo development Authority of Mizoram’ chuan insaknâna hman dânte leh a chî vawn that dân kawng te a ruahman chho mêk. Bamboo Charcoal and Vinegar Industry sâwmpanga bâkah Bamboo industry puitling sâwm dâwn lai leh puitling chho mêk pariat leh hmalâk chhoh tum, provisional registration nei, mi zathum dâwn lai an awm tawh a ni (August 2009 statistics). Chû’ng atang te chuan Mizoramin kum tin, sum, vaibêlchhe 2500 vel la lût thei tura ngaih a ni (source - Environment & Forest Minister H.Rohluna, 2009). Bairabi-a ‘Malsawm Bamboo Industry’-te phei chuan hnawmhnawk atanga boruak alh thei siam chhuaka electric êng (75KW) pek chhuah lehna khâwl, ‘Bio Mass Gasifier Plant,’ an siam chhuak bawk (2008). Handicraft lamah ‘Hnam Chhantu Pâwl’ hi an fakawm hle. Changêl hrui hmanga thil siam te; hnâng hlâina leh âr hmul pawhna khâwl siamchhuah a lo ni ta. Lalsângzuâla wood carvings te phei chu foreigners leh phai mite’n an duh em em a, Central lam atang pawhin K.V.I. board kal tlangin an rawn demand belh hial. Chû mai a la ni lo, Engineering zir hauh loin bike modification lamah a chemkal hle a, Honda Company (Japan) phei chuan an company-a thawk turin an ît a, a kutchhuak te pawh a hmun ngeia en turin Design Adviser an rawn tîr ngat a ni. Innovative skills-a hmâ kan sâwnna chikhat a ni. Tin, private hospital tha tak tak a rawn ding chho zel [hmasa ber-Greenwood (1992), New Life, Bethesda etc.].
Zofâte hi hnam inpumkhat tak mai kan ni a, khawihmunah pawh NGO te kan din thei zel. Tlawmngâi pawl, YMA (1935-a din) hian hniak a nei tha hle; Govt. of India hnen atangin ‘Indira Priyadarshini Vrikshamitra Award' (1986) leh 'Indira Gandhi Paryavaran Puruskar' (1993) te pawh a lo dawng tawh hial.
Tin, THEOLOGY lamah ke kan pên nasa a; ram pâwn(Shimla)-a martyr hmasa ber (Chalchhuna) pawh chanchintha thlen atanga reilo tê (1916) khân kan nei daih tawh a; tunah phei chuan khawvel hmun kilkhawr tak tak te kan ên mêk. Chu chuân thlarau lama kan hmasâwnna pawh a târ lang. Kum sawmhnih mai ral ta(1986)-a Ph.D (theology) hmasa ber (Rev.Dr.Zaihmingthanga) nei ve chauh mah ni ila, India ram hmun tin hmun tangah a sûl sutu te niin (theology) hna chhuanawm tak tak chelhin kan awm fur ta. Bible lehlin khawvela a ber (World Record) ni, Rev.Dr.Tongkhojang Lunkim, pawh Zofa a ni tlat. Kum lî leh a chanve (May’64-Dec’68) chhûngin Thuthlunghlui (Hebrew) leh thar (Greek) bû te Kûki tawngah a let zo. Double Honorary Doctorate degree (‘Louisville Theological College’, USA, 1984 & the ‘Senate of Serampore’, 1994) hlan a ni bawk a; hmârchhak kohhran hruaitu te zinga awm zen zen lo a ni.
Kawng lehlamah INFIAMmi tak mai kan ni a, Education Department atanga Sport & Youth Services indanna (1986) la rei lo hlê mahse infiammi te’n ram aiawha ke pênin lawmman an rawn hûi lût teuh tawh. Asian Games (1951) a tel hmasa ber, Thanghnûna, India rama fei khawh thui ber thin, atang khân han thlîr ila, hmâ kan sâwn chho hle. A bîkin combat sports-ah kan hnufual lo khawp. Boxing khawvêlah Zoramthanga’n (World no.3’90) meichher a lo chhî a, a hnung zuitu Rosema Kâwlnî (Int. Gold’96 & ‘99), Jenny Lalremliani (World no.1’06, Mizo hmeicchhe International Gold medalist hmasa ber) etc., te pawhin hniâk an nei tha hle. H.V.L.T.Mâwia’n kum 1978-ah Zofate tân Martial Arts kawngkhâr a rawn hawng a, tunah chuan Taekwondo [Lalremkimi (Asian Bronze’05)], Wushu [Lalduhkima Hmar (Int. Gold’96), Vanlalhruaikima (Int. Gold’96) etc.] leh Muay Thai [Johny Ngurthansânga (Asian Gold’07)]-ah international medal la kan awm nual ta. Kickboxing-a coach mumal nei loa ram aiawhtu Samuel Lalrozâma Hmar [world no.3, WFK’05, Muay Thai-a lût ta] leh Indian Kickboxer black-belt naupang ber [Kevin Larinmawia (kum ruk)] te hian kan theihna leh hmasâwnna a tilang zual.
Olympian [Vanlaldâwla (Silver medal, Boxing’72), Zomuana Ralte (Hockey’88) leh C.Lalremsânga (Archery’96 & 2000)] te pawh kan nei chho zêl. Kan tui tlânna Football-ah India rama club tha tak taka khêl thei, season khatah pawh nuai chuang la lut, tein kan inchher chhuak (Jerrry Zirsanga, Malsawmtluanga etc.). Chess-ah lah Rochhûnga Râlte chu India team hruaiin India ram pâwnah a lo fehchuak tawh (2006). Kan game hmelhriat lêmloh, sepaktakraw-ah Lawmzuâla leh Lalhmingmâwia te chu India team-a telin World Championship’09 an khêl a; tin, Remlalfaka paw’n Sri Lanka-ah Rugby khêlin, ‘The Telegraph School Award For Exellence’-ah ‘Best Sports Person of The Year 2005’ a dawng nghe nghe a ni. Basketball (Tv.H.Laldinsânga, Indian National Basketball Team Vice-Captain’05 ni hial tawh) leh hockey players (Lalremruati leh Rosalind Lalchhanhimi Ralte) ram aiawh thei te kan awm ta zel. Tin, Union Sports ministry meuhin ngaihvena, Germany-a tennis coaching hmachhawn tura a tirchhuah, Basil L. Khuma (Asian Under-14 Tennis champion’09) chuan beiseina a siam hle. Coach tha tak tak leh official, India ram pâwna feh chhuak [1981 (Zoliana Royte) to Present day] leh ram pâwna nihna nei phâte [Hrângaua (Chairman, East Pakistan Hockey Federation’84), Zosângliana (National Coach, Bangladesh Army’80-’85), Zomuana Ralte (National Coach, Bangladesh, 2002-2007)] pawh zuk awm zel a. Rahbi thar kan kai lehna, Indoor Shooting Gallery (International standard range) hmasa ber chu Kulikawn Indoor stadium-ah hawn (12.08.09) niin stadium puitling (Rajiv Gandhi Sports Complex) hmasa ber tur pawh Mualpui-ah sak tan (24.07.09) a ni ta.
Tin, MEDIA lam hian min uap tha hle a, helamah pawh hian hmâ kan sâwn thawkhat. Chanchinbu hmasa ber, ‘Mizo chanchin Laisuih,’ chu J.Shakespeare-a kaihhruainain kum1898-ah tihchhuah niin printing press hmasa ber (Loch Printing press) kum 1911 khân kan nei ve a; Computer hmasa ber, Economic & Statistic Dept. chuân, kum1986 khân a nei tan ve bawk. Chû kum atanga kum sawmhnih âwrh a ral tihin tuipuirâl college (Trinity College, Dublin)-a Computer Science professor (Dr.John Lalzoliana) ni thei hial kan awm zui.
Tunah chuan chanchinbu te a tamin a changkâng tawh; ‘thu leh hla’ leh zirtir tha tak neiin, kan tukverh zâwngdaikalh âwng phên bâk pelh ngai loa min tihausatu a tam ta. Chu mai niloin, internet-ah Mizo website tha tak tak a tam tawh hle. Star TV, kum 1990-ah, Skylinks-in pe chhuak tanin, Mizo programme, ‘Best Vision’ in a pe chhuak (1991) hmasa ber a; tunah chuan local channels a tam ta. Zofâte themthiamna hâichhuah tumin inelna tha tak tak an rawn irh chhuak a, a bîkin thalai te cho tharin, hmathlîr a ti zauin a tinuam hle a ni. Computer nise kum1972-ah Ph.D(Computer Science) zo (R. Zam Khen Thang), siam thiam kan nei tawh a; hmang thiam leh siam thiam kan pung mêk zel bawk. Printing machines leh a khawihtu pawh tha tak tak neiin, banner leh poster siam tura phairam chulhnu pan ngai loin kan intodelh tawh. Video coverage-ah kan sâng tawh a, music video te pawh changkâng leh tha, ram danga thawn chhuah atân pawha zahpuiawmloh kan siam chhuak thei ta.
Chû’ng thil te vêk chuan kan nun dan leh inkawm dan kawng a thlak danglam hle. Ei leh in kan fimkhur tawh a, hriselna kan ngaipawimawh. A hmei a p^in taksa enkawl hna kan thawk uar tawh. Luhkapui bul kawtchhuaha bahsamseihniangi te nên chhawrthlapui êng hnuaia hmangaih biahthu ’D inhlan ai chuan internet leh mobile phone hmanga kâwlvalênchhama lênrual lungduh lêng te leh ram lam hla taka thinlai luahtu ber te nena chat emaw biahthu ’D inhlan zai rêl emaw kan thlang zawk ta. Internet kal tlanga group SMS (Gupshup) te hmang tangkaiin information thehdarhin inpumkhatna kawngah kan lo hmang ve ta bawk. Naupang intihhlimna pawh inlungvâwr leh inkâwibah te ni ta loin computer games khelh te, iPod leh mp3 player-a hla ngaihthlak te a ni ta. SMS hmang tein print media leh T.V.-ah te ngaihdân sawiin Reality shows-ah vote te kan thlâk tam tawh. Hmasâwnna hmêl vek a ni.
Media-in a ken tel tlat LITERATURE lamah pawh, kan thlîr tawh atang te’n hmâ kan sâwn tih a hriat theih. India rama chawimawina sâng, Padma Bushan dawng thei (Capt.L.Z.Sailo, 2007) neiin Padma Shri award dawngtu pawh mi sâwmpasarih lâi kan nei tawh (A.Sawihlira, 1984 to Dr.Laltluangliana Khiangte, 2006). Bible (1895, Luka) tih loha lehkhabu lehlin hmasa ber (‘Pathian Lehkhabu chanchinthu’ – Rev.Challiana, 1909) atang khân tawng hrang hrang atang tea lehlin bû a awm ta nuk mai. Dr.Rochunga Pudaite (Founder and Chairman of ‘Bibles for the World’) phei chuan India hmâr-chhak ram tawng hrang hrang (Hmar, Darlong, Hrangkhol, Chorei, Rongmei, Naga leh Dzongkha of Bhutan)-a Bible lehlin hna thawk thei hialin a thiam hnem a, “Cambridge Who's Who”-ah a lang ve hial bawk. An p^wl hian Thuthlungthar bû maktaduai sâwmpanga chuang a thlâwnin ram zâ-pariat chuangah an sem tawh. Zofate tân rahbi pawimawh tak a ni.
Han chhui ta zel ila, RIMAWI-in kan zonunmawi hi a luan hneh hlê a ni tih a chianga, kan hmasâwnnaah hmun pawimawh tak awhin khawvêlin min hriat chhan ber pawh a ni. Kan lehkhabu chhut neih hmasak pâwl pawh ‘Kristian hlabu’ (1899) a ni. Hotel changkang leh Club lian hrang hranga rimawi tuma che kual hmasa ber, P.S.Chawngthu (1945-55), hnung zuiin Star hotel-a sum tam tak hlawha zâi an awm ta nual. Tin, Mizo zaipâwl te hi tuipuirâlah hial pawh mi hlut ber pâwl a lo ni ta. India ram pâwnah pawh kum 1978 daih tawh khân, conductor C.Thansiama kaihhruainain, zaipâwl an lo feh chhuak a, radio (Guwahati) artist (Thanthuami) pawh kum 1957 khan kan nei tawh. North-east hmeichhe A.I.R. top grade artiste awm chhun (Vânhlupuii) pawh mizo a ni tlat. Tin, rimawi lama national award (‘Dr.B.R.Ambedkar Utrist Gayan Puraskar’ leh ‘Sangeet Ratna’) dawng thei hial (V.R.Râlte) te pawh kan awm ta.
Rimawi tum leh lâmah te pawh hmâ kan sawn. Vânkhama’n kum 1926 daih tawh khân violin tum a chîng chhuak a, Hawaiin Guitar Album siam thei (Thanhmingi, 2004) te pawh kan nei ta. Professional dancer (Kristian Lalmuanpuia), Malaysia rama pakhatna (2005) ni thei, a music video leh album(2009) pawh ‘World Dance-sport Council’, ‘Oxford & Cambridge Examination Board’ etc. te’na an pawmpui mi kan awm ta bawk. Tin, recording studio pawh 1979 (OTTO Recording) atangin tha tak tak kan nei chho zêl. Ram dang thil pûk reng mai kan nihna dinhmun te pawh a rawn inlet ve ta, ‘NEXO Geo D Line Array System’ (World no.1), South Asia-a nei tha ber, Delta Sound, chuan phâi lama hman turin a hawhchhuah tîr ve ta (Aug’09). Cassette-a record siam hmasak ber (Lalsângzuali Sailo, 1977) leh audio album hmasa ber (ZODI) record te kha tunlai mi nên khaikhin chuan a danglam khawp. Music Band (Magdalene, IIIrd Sovereign etc.) tha tak, (India) ram pum huapa mi hriat hlawh, ram pum inelnaah pawh top three a lang tham hriat tur an awm ta teuh bawk.
Chutiang zêlin kan HMEICHHIA te hian mipa te chhangdâwl an thiamin hmâ an sâwn êm êm a; bân inelh tihlohah chuan mipa ho hian tluk/hneh lohna kan ngah hle a ni. Graduate (Lalsangpuii, B.A., 1942), Doctor (Dr.Lalêngi Khiangte, 1964), I.A.S. (L.Tochhawng, 1979) Engineer (Lalhmingliani Hmar, 1986) leh Padma Shri award dawng (R.Nuchhungi, 1986) te pawh kan neihna a rei tawh. Mimal, album siam hnem ber pawh hmeichhia [Lalsângzuali Sailo (27 albums)] niin B.Ed phei chu mipa (C.Biakchhawna, 1962) aiin hmeichhia (Lalsângpuii, 1954) kan nei hmasa zawk a; tin, Theology lama nasa taka sûl sûa double doctorate degree nei/la thei hmasa ber [Dr.Lalrinawmi Râlte (Doctor of Ministry, Boston’93 leh Doctor of Theology, Serampore’05)] pawh hmeichhia a ni tlat mai. Pian (nalh) leh finna hmanga ei zawng, professional model (Cindy Khawzâwl), Bollywood film:Bombay Summer(2008)-ah pawh role pawimawh tak neia lo chang tawh hial te an awm bawk. Tin, chutiang (E-Media) industry lama sûlsutu [Thangritluangi Hnamte, MSc. (E-Media) hmasa ber] pawh hmeichia a ni leh pek.
Kawng lehlamah picnic spot, historical park leh HMUN nuam tha tak tak, lên vahna tur kan nei ve ta a; Shopping-complex [Solomon’s Cave, Millenium centre (2006) etc.] tha te pawh a rawn pung zel Inter-state vehicle terminals (Ch.Chhûnga Bus terminal leh Ch.Sâprawnga Truck terminal) tha tak te neiin rêl (train) kawng pawh Sairâng thlenga luhtîr tura ruahman chhoh a ni ta (2009 statistics). Mizoram hi hmâr-chhak rama tourist centre lian ber pâwlah chang mêkin, kan chantir thei zel a ni tih i hria ang u. Mahse chutih rualin hmasawnna tih hian a tha lam chauh a ni lêm loa, hmasâwnnain a ken tel sualna lamah pawh hmâ kan sâwn khawp. Thiamna lo sâng chuan ruihtheih thil leh mipat-hmeichhiatna kawngah mobile phone, T.V., Video etc. hmangain thalaite a bei nasa hle. Chûvângin Pathian zârah hmasâwnna kan ngah a, hmabâk kan nei teuh bawk; kan tawng chi hrang te chawi nun thiama, tanruala inpumkhatna kawng ngaihtuah ila; nu leh pâte’n kan fâte hmasâwnna te hriatpuiin ti phûr ila; tun aia mahni inrintâwkna neiin, hnam dang kârah châi ngam bawk ila, kan hmabâk neih te chu kan hlenchhuaha hma kan sâwn belh ngêi a rinawm. Engpawh nise kan rin Pathian nung dik tak hi dah lal phawt mai ila, ‘..mi fel leh mi fing leh an thiltihte chu Pathian kuta awm a lo ni..- Thuhriltu 9:1,’ tih ziak ang khân.
Ref.:
Wikipedia online encyclopedia
Mizoram GK-Lalhmachhuana Zofa
Mizoram Sports Chanchin – Zoliana Royte
Lelte Magazine
*Heta hming lang te ngei biak rawn an ni bawk
[He essay/article hi Bangalore Mizo Association-in Silver Jubilee special magazine (2009) a thu thlur bing (Zofate hmasawnna leh hmabak) chhui zauna topic a tel a ni a; Khawvel pum Zofate huap essay inziahsiaka lawmman pahnihna dawngtu a ni bawk.-Samuel Lalrozâma Hmar (Sammy)]
No comments:
Post a Comment